
马尔巴大师教言集MARPA1བཀའ་བཞི་བརྒྱུད་པ་རིན་ཆེན་མཛོད།
1-1-1a

༄༅། །བཀའ་བཞི་བརྒྱུད་པ་རིན་ཆེན་མཛོད།
༄། །སྒྲུབ་པའི་བརྒྱུད་པ་ལས་ཇི་ལྟར་བརྒྱུད་པ།
༄༅། །རྗེ་བཙུན་ཆེན་པོ་མར་པ་ཆོས་ཀྱི་བློ་གྲོས་ཀྱི་བཀའ་འབུམ་བཞུགས་སོ། །
1-1-1b

༄༅༅། །ན་མོ་འགུ་(གུ་)རུ་དེ་བ་ཌཱ་ཀི་ནི་ས་མ་ཡ་མ་ནུ་སྨ་ར་སིཏ་དྷྱཾ་ཏུ་མྨེ། སྟོང་
དང་སྙིང་རྗེ་གཉིས་མེད་ཉམས་ཀྱིས་གར་མཛད་དཔལ་ལྡན་རྡོ་རྗེ་འཛིན། །གྲུབ་པའི་
དབང་ཕྱུག་དུ་མས་བྱིན་བརླབས་(རླབས་)བཀའ་བབས་ཆུ་བོ་འདུས་པའི་གཏེར། །ཟག་མེད་
1-1-2a

ཏིང་འཛིན་ནོར་བུའི་གདེངས་ཅན་དབང་པོ་སྐྱོབ་པ་ཏིལ་རྡུང་ཞབས། །གང་གིས་བཅུ་གཉིས་དཀའ་བའི་སྤྱོད་པས་མཉེས་བྱས་བདེན་གཟིགས་ནཱ་རོ་པ། །རིག་པའི་སྐྱེས་བུ་གྲུབ་
པ་ཡི། །བྱིན་བརླབས་(རླབས་)བརྒྱུད་པ་མ་ཆད་པས། །དངོས་གྲུབ་གཉིས་ལ་མངའ་བརྙེས་པའི། །གྲུབ་ཐོབ་བརྒྱུད་པའི་ཞབས་ལ་འདུད། །བཀའ་བཞི་བརྒྱུད་པ་རིན་ཆེན་མཛོད། །གང་གིས་མི་ཕྱེད་
རྒྱས་བཏབ་པ། །མཁའ་འགྲོའི་གསང་ཚིག་ལྡེ་མིག་གིས། །རྡོ་རྗེའི་ཚིག་དོན་དབྱེ་བར་བྱ། །སྙན་བརྒྱུད་བརྡ་ཐབས་ཉིན་མོའི་དཔལ་འཛིན་ལ། །ལྷ་མིན་སྒྲ་གཅན་རང་བཟོས་རབ་འཇིགས་
ནས། །ཕྱི་རབས་དོན་ཕྱིར་ཡི་གེར་བཞག་པ་ལ། །མཁའ་འགྲོས་བཟོད་མཛོད་བྱིན་གྱིས་བརླབ་ཏུ་གསོལ། །འདིར་སངས་རྒྱས་ནས་གྲུབ་(སྒྲུབ་)པའི་བརྒྱུད་པ་ལས་ཇི་ལྟར་བརྒྱུད་པ་དང་། བརྒྱུད་
པའི་ཆོས་ཡིད་ཆེས་བཞི་ལྡན་གྱི་གདམས་པ་ངོས་བཟུང་བའོ། །དང་པོ་ནི། བྱིན་བརླབས་(རླབས་)བརྒྱུད་པ་དང་བྲལ་བའི་ཆོས་ཟབ་ཟབ་པོ་ནི་ཡིད་ཆེས་ཀྱི་གནས་དང་བྲལ་བ་སྟེ། གསུངས་པ་གདམས་
1-1-2b

པ་བདུད་རྩི་ཤིན་ཏུ་འོ་མ་མར་གྱུར་ཀྱང་། །བྱིན་བརླབས་(རླབས་)བརྒྱུད་པ་མེད་ན་བཀོད་མའི་ཆུ་དང་མཚུངས། །ཞེས་བཀག་ནས། རྡོ་རྗེ་ཕྲེང་བ་ལས། དད་པས་བླ་མ་བརྒྱུད་པ་ལས། །མན་ངག་དག་ནི་བསླབ་པར་བྱ། །གང་ཕྱིར་བརྒྱུད་པའི་ལུང་གིས་ཁྱབ། །
བརྒྱུད་པའི་རིམ་པས་གནས་པར་བྱེད། །ཅེས་པའི་ཚུལ་ལ་ཐེག་པ་མཆོག་གི་རྣལ་འབྱོར་འདི་གང་ནས་བྱུང་ན། རྒྱུད་སྡེ་ཟབ་མོ་རྣམས་ནས་བྱུང་བའོ། །དེ་གང་གིས་གསུངས་ན་ཚད་མར་གྱུར་པའི་སངས་རྒྱས་ཀྱིས་སོ། །ཇི་ལྟར་སངས་རྒྱས་
ནས་གསུངས་ཤེས་(ཅེ་)ན། ཐུགས་བསྐྱེད། ཚོགས་འདུམས། ཡེ་ཤེས་བརྙེས་པའི་ཚེ་གསུངས་ཏེ། དང་པོ་ཇི་ལྟར་ཐུགས་བསྐྱེད་ཅེ་ན་དེ་བཞིན་གཤེགས་པ་སྔོན་བྱུང་བ། དཔག་མེད་བསྐལ་པ་འདས་པའི་དུས། །ཐུབ་པ་ཆེན་པོ་མར་མེ་མཛད། །
ང་ནི་བྲམ་ཟེར་གྱུར་པ་ཡིས། །སེམས་བསྐྱེད་ཞུས་ཚེ་བརྟེན་པ་ན། །མངོན་པར་ལུང་བསྟན་ཐོབ་པར་གྱུར། །ཞེས་བྱུང་བ་ལྟར་སྟོང་པ་དང་སྙིང་རྗེ་གཉིས་སུ་མེད་པའི་བྱང་ཆུབ་མཆོག་ཏུ་ཐུགས་བསྐྱེད་དོ། །གཉིས་པ་ཚོགས་ཇི་ལྟར་འདུམས་པས་
སློབ་པའི་ཟུང་འཇུག་མཐར་ཕྱིན་ཅེ་ན། བྱང་ཆུབ་ཀྱི་ཕྱོགས་དང་ཕ་རོལ་ཏུ་ཕྱིན་པ་ལ་སོགས་པའི་གོ་(སྒོ་)ནས་ཚོགས་བསགས་ཏེ། རྡོ་རྗེ་ཐེག་པ་འདིར་བསྐྱེད་པའི་རིམ་པ་ལ་བསླབས་ནས། ཇི་སྲིད་རྫོགས་པའི་རིམ་པ་མ་ཐོབ་ཀྱི་བར་དེ་སྲིད་དུ།
སེམས་དཔའ་དེ་ཡང་དང་ཡང་དུ་བདེ་འགྲོར་སྐྱེ་བ་ཐོབ་པ་རྣམས་སུ་དགེ་བའི་བཤེས་གཉེན་མཉེས་པར་བྱས་ནས། ས་བདུན་པའི་བར་དུ་ཀུན་རྫོབ་ཀྱི་བདེན་པ་རྫོགས་པར་མཛད། ས་བརྒྱད་པ་ནས་རྣམ་པར་དབེན་པའི་དོན་ཐོབ་སྟེ། ས་བཅུ་པའི་
1-1-3a

བར་དུ་སྣང་བ་རྣམ་པར་དག་པ་སྦྱངས་པས་སློབ་པའི་ཟུང་འཇུག་མངོན་དུ་མཛད་དོ། །གསུམ་པ་ཡེ་ཤེས་ཇི་ལྟར་བརྙེས་པས་སངས་རྒྱས་སུ་གྱུར་ཞེ་ན། འདི་ལ་དོན་མཐུན་དང་བློ་མཐུན་དུ་བཤད་པའི་ལུགས་གཉིས་སོ། །དང་པོ་ལྟར་ན།
མི་སློབ་པའི་ཟུང་དུ་འཇུག་པའི་རིམ་པས་ཀུན་ཏུ་བཟང་པོའི་ས་ལ་དོན་དམ་པའི་བདེན་པ་ལྷུན་གྱིས་གྲུབ་པས། ཕྱི་ནང་གི་སྤྲོས་པ་ལས་འདས་པའི་ཆོས་ཀྱི་དབྱིངས་དང་དབྱེ་བ་མེད་པར་བྱང་ཆུབ་པ། ཡེ་ཤེས་ཆོས་ཀྱི་སྐུ་མཉམ་
པ་ཉིད་བརྙེས་པ་ལས་མ་གཡོས་བཞིན་དུ། དུས་གསུམ་གྱི་དེ་བཞིན་གཤེགས་པ་ཐམས་ཅད་མངོན་པར་གྲུབ་པའི་གནས་འོག་མིན་ཆེན་པོར། ངེས་པ་ལྔ་དང་ལྡན་པའི་ལོངས་སྤྱོད་རྫོགས་པ་སྔགས་ཀྱི་སྐུ་ཡི་རིགས་མཐའ་ཡས་
པའི་དཀྱིལ་འཁོར་ཆོས་ཀྱི་དབྱིངས་རྒྱན་སྟུག་པོ་བཀོད་པ་སྤྲོ་བས། གསུང་གི་དབང་ཕྱུག་གི་སྣང་བ་རྣམ་པར་གསལ་བའི་སྤྲིན་གྱི་དྲ་བ་མི་ཟད་པ་ཀུན་ནས་འཕྲོ་བའི་མྱ་ངན་ལས་འདས་པའི་རྒྱལ་སྲིད་ཆེན་པོས་འབྱོར་བར་སྟོན་པ་ལས་ཀྱང་མ་ཉམས་
བཞིན་དུ། སྨོན་ལམ་རྫོགས་པ་དང་། ཞིང་དག་པ་དང་། གདུལ་བྱ་དགེ་བས་སྨིན་པའི་དུས་ལ་བབ་པ་གསུམ་འཛོམ་པ་ན། སངས་རྒྱས་ཀྱི་སྤྲུལ་པ་སྒྱུ་མ་འབྱུང་བའི་རྣམ་པར་ཐར་པ་ཚད་མེད་པས། ལུས་ཅན་ཡེ་ཤེས་དང་ལྡན་པ་དག་གི་ཁམས་དང་
མཉམ་པར་འཇུག་པའི་ཕྲིན་ལས་མི་ཟད་པ་རྒྱན་གྱི་འཁོར་ལོ་སྐོར་བའི་ཚུལ་རྒྱ་མཚོ་སྙེད་ལ་དབང་འབྱོར་བར་ཡང་སྣང་ལ་གནས་སྐབས་དེ་དང་དེ་འདྲ་བ་རྫོགས་པ་ན་ཐིམ་པར་ཡང་སྟོན་པར་མཛད་པ་ཉིད་ཡིན་ནོ། །འདི་ནི་སྤྱིར་འགྲོ་བ་དོན་འཐུན་དུ་
1-1-3b

བསྟན་པའོ། །གཉིས་པ་གདུལ་བྱའི་བློ་ལ་སྣང་བ་དང་འཐུན་པར་ཕྱོགས་གཅིག་བཤད་ན། གང་དུ་འདིར་ནི་མངོན་བསྟན་པ། །སངས་རྒྱས་འཇིག་རྟེན་འབྱུང་བ་དག །མངོན་པར་བྱང་ཆུབ་གནས་ཉིད་ལས། །འབྱུང་དང་འཇུག་པར་གནས་
པ་དང་། །འཕྲིན་ལས་མཛད་པ་དུ་མར་སྟོན། །དགའ་ལྡན་གནས་ནས་འཕོ་ཚུལ་དང་། །ལྷུམས་སུ་ཞུགས་དང་སྐུ་བལྟམས་དང་། །གཞོན་ནུ་རོལ་དང་ཁབ་གནས་དང་། །སྐྱེད་མོས་ཚལ་བྱོན་གནས་གཟིགས་ཏེ། །
མངོན་པར་བཞུགས་དང་གཤེགས་མཛད་ཅིང་། །དཀའ་སྤྱད་མཛད་དང་བཞེངས་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་བཅོམ་མངོན་པར་བྱང་ཆུབ་པ། །ཆོས་ཀྱི་འཁོར་ལོ་སྐོར་(བསྐོར་)མཛད་དེ། །འདི་ནི་དུས་
རྣམས་ཀུན་ཏུ་ཡང་། །ཐོག་མར་ཐུན་མོང་ལམ་བསྟན་ཅིང་། །བར་དུ་དགེ་བས་མཚན་མ་མེད། །ཐ་མར་ཐེ་ཚོམ་སེལ་བ་ཡི། །བྱང་ཆུབ་སེམས་ཀྱི་སྤྱོད་ཡུལ་དང་། །རྣམ་པར་ངེས་པ་ཕྲ་བར་བསྟན། །སངས་རྒྱས་མ་
ལུས་འདི་དག་ཉིད། །ཞི་བར་འཇུག་པ་སྟོན་པ་དག །བླ་ན་མེད་པའི་སྤྱོད་ཡུལ་ལོ། །ཞེས་འབྱུང་བ་ལྟར་ན། དང་པོར་རེ་ཤིག་བཅོམ་ལྡན་འདས་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའི་གནས་སྐབས་སུ་
གཟིགས་པ་རྣམ་པ་ལྔས་དགའ་ལྡན་ནས་འཛམ་བུའི་གླིང་དུ་བབས། མི་ཡི་དབང་པོ་ཤཱཀྱའི་རིགས་ཟས་གཙང་གི་ལྷ་མོ་སྒྱུ་འཕྲུལ་མའི་ལྷུམས་སུ་ཞུགས། གཞོན་ནུ་དོན་ཐམས་ཅད་གྲུབ་པ་བལྟམས། 
1-1-4a

རོལ་རྩེད། སྒྱུ་རྩལ་ཐམས་ཅད་ལ་མཁས་པ་དང་། ཁབ་ནས་ངེས་པར་འབྱུང་བ་སྟོན་པ་དང་། དཀའ་བ་སྤྱོད་པ་ན་དེ་བཞིན་གཤེགས་པ་ཐམས་ཅད་ཀྱིས་སེ་གོལ་གྱི་སྒྲས་བསྐུལ་བས་མི་གཡོ་
བའི་ཏིང་ངེ་འཛིན་ལས་སད་པར་མཛད་དེ། དཀའ་ཐུབ་ཀྱི་རྟེན་སྤྲུལ་པའི་གཟུགས་མི་ཡི་ཡུལ་དུ་བཞག་ནས། ཡིད་གནས་གྱུར་པའི་ཏིང་ངེ་འཛིན་གྱི་ལུས་འོག་མིན་དུ་གཤེགས། མངོན་པར་
བྱང་ཆུབ་པ་ལྔ་བརྙེས། གསང་སྔགས་ཚུལ་གྱིས་མངོན་པར་རྫོགས་པར་སངས་རྒྱས། ཚངས་པ་ཆེན་པོའི་གནས་དང་། དབང་སྒྱུར་གྱི་ཁང་པ་དང་། རི་རབ་ཀྱི་སྟེང་ལ་སོགས་པར་ལྷ་རྣམས་བཏུལ།
སླར་ཡང་མི་ཡི་འཇིག་རྟེན་དུ་བྱོན། རྡོ་རྗེའི་གདན་ལ་སངས་རྒྱས་པའི་ཚུལ་བསྟན་ཏེ། ལྷ་དང་མི་ལ་སོགས་པ་འདུལ་བའི་ཐབས་མང་དུ་གསུངས་ཏེ། འདོད་ཆགས་དང་བྲལ་བའི་གཟུགས་ཀྱིས་དམན་པ་ལ་མོས་
པ་རྣམས་ལ་འཕགས་པའི་བདེན་པ་བཞི་དང་། ཞི་བའི་ལམ་དང་། འདོད་ཆགས་དང་བྲལ་བའི་སྤྱོད་པ་བསྟན་ཏོ། །མཆོག་ཏུ་གྱུར་པའི་གཟུགས་ཀྱིས་ཐེག་པ་ཆེན་པོ་ལ་ཞེན་པ་རྣམས་ལ་བདག་མེད་པ་དང་ས་དང་ཕ་རོལ་
ཏུ་ཕྱིན་པའི་སྤྱོད་པ་བསྟན་ཏོ། །རྡོ་རྗེ་འཆང་གཟུགས་ཀྱིས་ཟབ་མོ་ལ་ལྷག་པར་མོས་པ་རྣམས་ལ་བདེན་པ་གཉིས་རྟོགས་པ་རྡོ་རྗེ་འཛིན་པའི་དབུགས་དབྱུང་བ་དང་འདོད་ཆགས་ཀྱི་སྤྱོད་པ་རབ་ཏུ་བསྟན་ཏོ། །འདི་ལ་ཡང་གདུལ་བྱའི་
1-1-4b

འདོད་ཆགས་ཀྱི་དབྱེ་བས། བྱ་བ་དང་། སྤྱོད་པ་དང་། རྣལ་འབྱོར་དང་། རྣལ་འབྱོར་ཆེན་པོའི་རྒྱུད་དང་བཞི་གསུངས་པ་ཡིན་ནོ། །དེ་ལྟར་སངས་རྒྱས་ནས་བཤད་པའི་རྒྱུད་སྡེ་དེ་དག་གི་ནང་ནས། འདིར་སྟོན་པའི་ཟབ་མོའི་ལམ་འདི་གང་
ལས་འབྱུང་བ་ཡིན་ཞེ་ན། རྣལ་འབྱོར་ཆེན་པོ་བླ་ན་མེད་པའི་རྒྱུད་རྣམས་ནས་འབྱུང་བའོ། །དེ་ལ་ཡང་ཕ་རྒྱུད་དང་། མ་རྒྱུད་དང་། གཉིས་སུ་མེད་པའི་རྒྱུད་ལ་སོགས་པ་བཞུགས་མོད་ཀྱི། སྤྱིར་དེ་ཐམས་ཅད་ཀྱི་ཟབ་
དོན་དྲིལ་བ་ཡིན་ལ། ཁྱད་པར་དུ་ཕ་རྒྱུད་ཀྱི་གསང་བ་འདུས་པ་དང་། མ་རྒྱུད་ཀྱི་མ་ཧཱ་མ་ཡ་དང་། སངས་རྒྱས་ཐོད་པ་དང་། རྡོ་རྗེ་གདན་བཞི་དང་། འཁོར་ལོ་བདེ་མཆོག་དང་། སྙིང་པོ་ཀྱེའི་རྡོ་རྗེ་རྣམས་ལ་གཙོ་ཆེར་རྟེན་(བརྟེན་)པ་ཡིན་
གསུང་ངོ་། །དེ་སངས་རྒྱས་ཀྱིས་གང་ལ་གསུངས། གང་ཟག་སུ་ལ་ཇི་ལྟར་བརྒྱུད་ཅེ་ན། རྡོ་རྗེ་འཆང་གིས། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས། ཨིནྡྲ་བོ་དྷི་ཆེན་པོ་དང་། ཡེ་ཤེས་ཀྱི་མཁའ་འགྲོ་མ་རྣམས་ལ་གསུངས།
དེ་གྲུབ་པ་ཐོབ་པའི་རྣལ་འབྱོར་གྱི་དབང་ཕྱུག་ཆེན་པོ་རྣམས་ལ་བརྒྱུད་པའོ། །ཇི་ལྟར་བརྒྱུད་ན། དཔལ་ཏེ་ལོ་པ་ཆེན་པོ་ལ་རྟོགས་པ་བྱིན་བརླབས་(རླབས་)ཀྱི་བརྒྱུད་པ་དང་། བཀའ་བབས་ཉམས་ཀྱི་བརྒྱུད་པ་གཉིས་མངའ་བ་ལས། དང་པོ་ནི་ང་
1-1-5a

ལ་མི་ཡི་བླ་མ་མེད། །ང་ཡི་བླ་མ་ཐམས་ཅད་མཁྱེན་ཞེས་གསུང་བ་ལྟར། རྡོ་རྗེ་འཆང་དང་དངོས་སུ་འབྱལ(མཇལ)། འཁོར་ལོ་སྡོམ་པས་བྱིན་གྱིས་བརླབས། ཡེ་ཤེས་ཀྱི་མཁའ་འགྲོ་མ་རྣམས་ལ་རྗེས་སུ་བསྟན་པ་ཐོབ་པའོ། །
གཉིས་པ་ལྟར་ན། ང་ལ་མི་ཡི་བླ་མ་ཡོད། །ཀླུ་གྲུབ་(སྒྲུབ་)ཙརྱ་ལྭ་བ་པ། །སྐལ་བ་བཟང་མོ་ང་ཡི་ནི། །བཀའ་བབས་བཞིའི་བླ་མ་ཡིན་གསུང་བ་ལ། བླ་མ་འགའ་ཞིག་གི་བཞེད་ཀྱིས། རྡོ་རྗེ་འཆང་། རྒྱལ་པོ་ཨིནྡྲ་བོ་དྷི་ཆེན་པོ། ཀླུ་ལས་
གྱུར་པའི་རྣལ་འབྱོར་མ། རྒྱལ་པོ་བྷི་སུ་ཀལྤ། ས་ར་ཧ་ཆེན་པོ། ཀླུ་གྲུབ་(སྒྲུབ)། མ་ཏྃ་ཀི། ཏེ་ལོ་པའོ།། །།
༄། །བརྒྱུད་པའི་ཆོས་ཡིད་ཆེས་བཞི་ལྡན་གྱི་གདམས་པ་ངོས་བཟུང་བ། བཀའ་བབས་པ་དང་པོ།
བརྒྱུད་པ་འདི་ནས་ཕ་རྒྱུད་གསང་བ་འདུས་པ་དང་། དེ་ལ་བརྟེན་པ་ལམ་ཟབ་མོ་རིམ་པ་ལྔའི་དམར་ཁྲིད་ལ་སོགས་པ་
རིམ་ལྔའི་སྐོར་མ་ལུས་པ་དང་། རྡོ་རྗེ་གདན་བཞི་ཡི་རྒྱུད་དང་། རྒྱུད་ཀྱི་མན་ངག་འཕོ་བ་དང་། གྲོང་འཇུག་ལ་སོགས་པའི་བཀའ་བབས་པ་སྟེ། དང་པོའོ། །རྡོ་རྗེ་འཆང་། ཡེ་ཤེས་མཁའ་འགྲོ། ཀུ་ཀཱུ་རི་པ།
ཙརྱ་པ། ཏེ་ལོ་པའོ། །འདི་ལས་སྒྱུ་མ་ཆེན་མོའི་རྒྱུད་དང་། རྒྱུད་ལ་བརྟེན་པ། དབྱིབས་རྣལ་འབྱོར་གསུམ་དང་། སྒྱུ་མ་སུམ་རྒྱུད་ལ་སོགས་པའི་བཀའ་བབས་པ་སྟེ། གཉིས་པའོ།། །།
རྡོ་རྗེ་འཆང་། ཕྱག་ན་རྡོ་རྗེ། ཌོྃ་བི་ཧེ་རུ་ཀ །བྷི་ན་པ་བཛྲ། ལྭ་བ་པ། ཏེ་ལོ་པའོ། །དེ་ལས་ཕ་རྒྱུད་མ་རྒྱུད་མཐའ་དག་ལ་བརྟེན་པ་ཆོས་དྲུག་ལ་སོགས་པའི་བཀའ་བབས་ཏེ་གསུམ་པའོ།། །།རྡོ་རྗེ་འཆང་། ཕྱག་ན་
1-1-5b

རྡོ་རྗེ། ཡན་ལག་མེད་པའི་རྡོ་རྗེ། པདྨ་བཛྲ། ཌཱ་ཀི་མ་སྐལ་བ་བཟང་མོ། ཏེ་ལོ་པའོ། །དེ་ལས་རྒྱུད་དགྱེས་པ་རྡོ་རྗེ་དང་། དེ་ལས་བརྟེན་པའི་ཆོས་དྲུག་ལ་སོགས་པའི་བཀའ་བབས་ཏེ་བཞི་པའོ།། །།འདི་རྒྱུད་དང་མན་ངག་སོ་སོའི་
བཀའ་བབས་ལུགས་སོ། །ཡང་བླ་མ་མར་པ་དང་། གཙོར་ཏེ་ཕུ་པ་ལ་སོགས་པ་འཐུན་པར། རྡོ་རྗེ་འཆང་། ལྷ་ཡི་བུ་བྱང་ཆུབ་སེམས་དཔའ་བློ་གྲོས་རིན་ཆེན། འཕགས་པ་ཀླུ་གྲུབ་(སྒྲུབ་)མ་ཏྃ་ཀི་པ་ནས་རིམ་པ་ལྔ་དང་། གྲོང་
འཇུག་གི་བཀའ་བབས། ཡང་རྡོ་རྗེ་འཆང་། ཕྱག་ན་རྡོ་རྗེ། ས་ར་ཧ། ལུ་ཨི་པ། ཌེཾ་ཀི་པ། དེ་ལས་ཕྱག་རྒྱ་ཆེན་པོ་ལ་སོགས་པའི་བཀའ་བབས་སོ། །སུ་མ་ཏི་ཀུན་ཏུ་བཟང་མོ། ཐང་ལོ་པ། ཀརྣ་རི་པ། དེ་ལས་
གཏུམ་མོ་ལ་སོགས་པའི་བཀའ་བབས་སོ། །ཌོྃ་བི་ཧེ་རུ་ཀ །བྷི་ན་པ། ལ་བ་པ། ཨིནྡྲ་བོ་དྷི་ཆུང་བ། དེ་ལས་འོད་གསལ་དང་སྒྱུ་ལུས་ལ་སོགས་པའི་བཀའ་བབས་ཞེས་བཞེད། འདི་ནི་བཀའ་བབས་བཞིའི་མན་ངག་བསྲེ་འཕོ་འཚམས་(མཚམས་)
སྦྱོར་དུ་དྲིལ་བའི་ལུགས་སོ། །
༈ རིང་བརྒྱུད་བཀའ་བཞི་བླ་མའི་རྣམ་ཐར།
༈ ཆོས་རྒྱལ་ཨིནྡྲ་བོ་དྷི།
དེ་ཡང་བཀའ་བབས་དང་པོ་ལ་རིང་དང་ཉེ་བའི་ལུགས་གཉིས་ལས། དང་པོ་ནི། དཔལ་ཡེ་ཤེས་ཐིག་ལེའི་རྒྱུད་ལས། ལྷ་མོས་གསོལ་པ། གསང་བ་ཆེན་པོའི་རྒྱུད་འདི་ནི། 
1-1-6a

ཤེས་པ་དང་ནི་བཤད་པ་སུ། བཅོམ་ལྡན་འདས་ཀྱིས་བཀའ་སྩལ་པ། བྱང་ཕྱོགས་སུ་དཔལ་རྡོ་རྗེའི་གནས་ཨུ་རྒྱུན་དུ་རྒྱལ་པོ་ཨིནྡྲ་བྷོ་དྷི་ཞེས་བྱ་བས་ཤེས་པ་དང་བཤད་པ་དང་སེམས་ཅན་ལ་གསལ་བར་བྱེད་དོ། །ལྷ་
མོས་གསོལ་པ། ཀྱེ་བཅོམ་ལྡན་འདས། རྒྱལ་པོ་ཆེན་པོ་ཨིནྡྲ་བྷོ་དྷི་ཞེས་བྱ་བ་དེས་དུ་ཡི་དབང་ཕྱུག་ལགས་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། དཔལ་ཡེ་ཤེས་ཐིག་ལེའི་རྒྱུད་ཀྱི་རྒྱལ་པོ་ལས། གང་ཞིག་ངས་
བསྟན་པའི་རྒྱལ་པོ་ཨིནྡྲ་བོ་དྷི་དེ་ཉིད་ཕྱག་ན་རྡོ་རྗེའི་སྤྲུལ་པའི་སྐུ། ས་བཅུའི་དབང་ཕྱུག །ཡེ་ཤེས་ཀྱི་སྐུ་ས་བཅུ་བཞིའི་དབང་ཕྱུག་གོ། །ཞེས་ལུང་བསྟན་པ་བཞིན་རྡོ་རྗེའི་གནས་ཨུ་རྒྱན་དུ་བྱུང་བའི་སྤྲུལ་པའི་རྒྱལ་པོ་ཨིནྡྲ་བྷོ་དྷི་ཞེས་བྱ་བ་ཕོ་བྲང་བཙུན་མོའི་འཁོར་
ཉམས་དགའ་བ་དང་བཅས་པའི་དབུས་སུ་རོལ་བ་ཞིག་ཡོད་པ་ལས། དེའི་ཚེ་སྟེང་གི་ནམ་མཁའ་ལ་ཉན་ཐོས་ཀྱི་དགེ་འདུན་རྣམས་སྔ་དྲོ་ཤར་དང་ཕྱི་དྲོ་ནུབ་དུ་(ཏུ་)རྫུ་འཕྲུལ་གྱིས་འགྲོ་བ་གཟིགས་ནས། དྲིས་པས། སངས་རྒྱས་ཤཱཀྱ་ཐུབ་པའི་ཉན་ཐོས་སོ། །
ཟེར་བ་ཐོས་ནས། དད་དེ་མཆོད་པ་རྒྱ་ཆེན་པོ་བཤམས་ནས་གསོལ་བ་བཏབ་པས། བཅོམ་ལྡན་འདས་འཁོར་དང་བཅས་པ་བྱོན་པ་ལ་བསྙེན་བཀུར། ཆོས་ཞུས་པས། སྤྱི་དང་བྱེ་བྲག་གི་འདོད་ཡོན་ལ་སྤྱད་པའི་ཉེས་པ། འདོད་པ་སྤངས་པའི་ཕན་ཡོན་དཔེ་དུ་
མས་མཚོན་ནས་བསྟན་པས། རྒྱལ་པོས་གསོལ་པ། ལུམ་བིའི་ཚལ་ནི་ཉམས་དགའ་བས། །ཝ་ཉིད་སེང་གེར་གྱུར་ཀྱང་བླའི(སླའི)། །འདོད་པ་སྤངས་པའི་ཐར་པ་ནི། །གོའུ་ཏ་མ་ནམ་ཡང་མིན། །ཞེས་པ་དང་། བཅོམ་ལྡན་འདས་ཀྱིས་རྒྱལ་པོ་དེ་ཉོན་མོངས་པའི་སྐྱེ་མཆེད་
1-1-6b

རགས་པ། ཤེས་རབ་ཀྱི་དཔྱོད་ཆེ་བ། བརྩོན་འགྲུས་ཀྱི་ཤུགས་དྲག་པ། ངང་ངམ་ཡིད་ཐུང་བ། ཐུན་མོང་གི་བསགས་པ་རབ་ཏུ་གྱུར་པས་གསང་སྔགས་རྡོ་རྗེ་ཐེག་པ་མིན་པས་མི་འདུལ་བར་གཟིགས་ནས། འདོད་ཡོན་མ་སྤངས་པར་སངས་རྒྱས་པའི་ཐབས་
ཡོད་གསུངས་པས། འོ་ན་དེ་བདག་ལ་རྩོལ་ཅིག་ཞུ་བ་ལ། སེ་གོལ་གྱི་སྒྲས་སྐུལ་བར་མཛད་པའི་སྐད་ཅིག་གིས། གནས་འོག་མིན། སྟོན་པ་དཔལ་གསང་བ་འདུས་པ་མི་བསྐྱོད་པ་རྡོ་རྗེ་འཆང་། དགྲ་བཅོམ་པ་ལ་སོགས་པའི་འཁོར་རྣམས་སངས་རྒྱས་
དང་བྱང་ཆུབ་སེམས་དཔར་གྱུར་ནས། སྤྲུལ་པའི་དཀྱིལ་འཁོར་དེ་ཉིད་དུ་རྒྱལ་པོ་ལ་སོགས་པ་ཉན་པའི་སྐལ་བ་དང་ལྡན་པ་རྣམས་ལ་དབང་བྱིན་ནས། རྒྱུད་བསྟན། རྡོ་རྗེ་ཆོས་ལ་རྒྱུད་གཏད། དབང་གི་ཡེ་ཤེས་རྟོགས་པའི་རྒྱལ་པོ་ཆེན་པོ་དེས་དགའ་བའི་ཡིད་
ཅན་གྱི་རྣལ་འབྱོར་མ་རྣམས་དང་ལྷན་ཅིག་རོལ་པའི་སྤྱོད་པས། སྤྲོས་བཅས་དང་། སྤྲོས་མེད་དང་ཤིན་ཏུ་སྤྲོས་མེད་ཀྱི་སྤྱོད་པ་གསུམ་མཐར་ཕྱིན་པར་མཛད་དེ། ཕུང་པོའི་ཁོག་པ་བརྗེས་པ། རྡོ་རྗེའི་ལུས་སུ་གྱུར་པས་བཙུན་མོའི་འཁོར་དང་བཅས་པ་མི་
སྣང་བར་གྱུར་ནས། ཡོན་ཏན་བརྒྱུད་དང་ལྡན་པའི་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་གཤེགས་སོ། །དེ་ལྟར་དེ་མཆོག་གི་མཁའ་སྤྱོད་དུ་གཤེགས་པའི་འོག་ཏུ་ཡུལ་དེ་སྟོངས་ནས། མཚོ་ཆེན་པོ་ཀླུས་གང་བ་ཞིག་ཏུ་གྱུར་ཏེ། སླར་ཡང་
ཕྱག་ན་རྡོ་རྗེས་ཀླུ་དེ་དག་སྨིན་པར་མཛད་པ་ལས་དེ་རྣམས་རིམས་ཀྱིས་མིར་གྱུར་ནས་མཚོའི་འགྲམ་དུ་གྲོང་ཁྱེར་ཆགས་ཤིང་། དེ་དག་གིས་རྡོ་རྗེ་ཐེག་པ་ཉམས་སུ་བླངས་པས་གྲུབ་པ་བརྙེས་ཏེ་དཔའ་བོ་དང་རྣལ་འབྱོར་མར་གྱུར། སྐལ་བ་དང་བྲལ་བ་རྣམས་
1-1-7a

གཞན་དུ་དེངས། མཚོ་དེ་ཡང་སྐམས་པའི་ཤུལ་དུ་ཧེ་རུ་ཀ་རང་བྱུང་གི་ལྷ་ཁང་བྱུང་བ་ན། དེར་ཡེ་ཤེས་ཀྱི་དཔའ་བོ་དང་མཁའ་འགྲོ་རྣམས་བཞུགས་པ་ལས། ཕྱག་ན་རྡོ་རྗེས་རྒྱུད་སྡེ་རིན་པོ་ཆེ་མཐའ་དག་རིན་པོ་ཆེ་ཞུན་མས་བྲིས་པའི་གླེགས་བམ་
རྣམས། དེ་རྣམས་ལ་གཏད་དེ་སྤྲུལ་པ་བསྡུ་བ་མཛད་དོ། །
༈ རྒྱལ་པོ་བྷི་སུ་ཀལྤ།
དེའི་ཚེ་རྒྱ་གར་ལྷོ་ཕྱོགས་ཨོ་དེ་ཤ་ན་རྒྱལ་པོ་བྷི་སུ་ཀལྤ། ཞེས་བྱ་བ་ཡུལ་དབུས་ཀྱི་རྒྱལ་པོ་རྒྱལ་སྲིད་མ་ཟིན་པས་སྐྱོ་ནས་རབ་ཏུ་བྱུང་བ་རྒྱུ་མཚན་ཉིད་ཀྱི་ཐེག་པ་ལ་མཁས་པ་ཞིག་བཞུགས་ཏེ། དེའི་
ཐུགས་དགོངས་ལ་ཕ་རོལ་ཏུ་ཕྱིན་པའི་ཚུལ་འདིར། ལས་དང་པོ་བས་འདོད་ཡོན་སྤངས་ནས་བསླབ་པ་གསུམ་ལ་དཀའ་ཐུབ་དང་དཀའ་སྤྱད་ཀྱི་ལམ་བསྒོམས་ནས། ཉོན་མོངས་སྤངས་ཏེ་བྱང་ཆུབ་སྒྲུབ་པ་གཙོ་ཆེར་སྣང་བ་ལ། ཡང་མདོ་ལས་སེམས་ཉིད་
བྱང་ཆུབ་ཡིན་པ་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །ཞེས་སོགས་དབང་པོ་རྣོན་པོ་དང་པོ་ནས་སེམས་ཅན་སངས་རྒྱས་སུ་སྒོམ་པའི་ཚུལ་དང་། ཡང་སྡུད་པར། དེ་ཚེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་། །ཞེས་སོགས་དང་འོད་སྲུངས་ཀྱིས་
ཞུས་པར། ཇི་ལྟར་གྲོང་ཁྱེར་སྐྱེ་བོའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེས་ནི་སངས་རྒྱས་ཆོས་རྣམས་སྐྱེད་ལ་ཕན། །ཞེས་འདོད་ཡོན་ལ་སྤྱོད་ཅིང་ཉོན་མོངས་གྲོགས་སུ་འཆར་བའི་
ལམ་སྟོན་པའི་ཚིག་གི་ས་བོན་བྱུང་བ་ལ། ཉམས་སུ་ལེན་ཚུལ་གསལ་བར་བསྟན་པ་མ་བྱུང་བས། དེ་ལྟ་བུའི་ཐེག་པ་མཆོག་ཅིག་དང་འབྱལ་(མཇལ་)བར་ཤོག་ཅིག་ཅེས་སྨོན་པའི་ཚེ། རྨི་ལམ་དུ་མཁའ་འགྲོས་ལུང་བསྟན་བྱུང་ནས། ཨུ་རྒྱན་གྱི་གནས་སུ་བྱོན། ཧེ་རུ་
1-1-7b

ཀ་རང་བྱུང་གི་ལྷ་ཁང་གི་སྒོ་བཞི་ནས་རིམ་བཞིན་བསྐོར་ཞིང་ཕྱག་བྱས། སླར་ཤར་སྒོ་ནས། ཕྱག་བྱས་གསོལ་བ་བཏབ་པའི་རྗེས་སུ། རྣལ་འབྱོར་མ་ཅིག་བྱུང་ནས། སྐལ་བ་དྲིས། ནང་དུ་བཅུག །དབང་བསྐུར། རྒྱུད་བཤད། རྗེས་སུ་བསྟན་པ་མཐའ་དག་གནང་། གླེགས་
བམ་གཏད་དོ། །དེས་ཀྱང་དེའི་དོན་ཉམས་སུ་བླངས་པས་ཕྱག་རྒྱ་ཆེན་པོའི་དངོས་གྲུབ་བརྙེས་སོ། །
༈ གྲུབ་བརྒྱའི་སྤྱི་མེས་ས་ར་ཧ་པ།
ཡང་དེའི་ཚེ་ཡུལ་རཱ་དྷཱ་ན། བྲམ་ཟེ་ཞིག་ལ་སྲས་སྒྲའི་བསྟན་བཅོས་དང་རིག་པའི་གནས་མང་པོ་ལ་ལེགས་པར་སྦྱངས་ཤིང་མཁས་པ་བཞི་ཡོད་པ་ལས། དེའི་ནང་ནས་སློབ་དཔོན་
འདི་ནི་མཁའ་འགྲོའི་སྲས་ཡིན་པས་དཔའ་བོ་ཡིན་ཏེ་བསྟན་པ་ལ་དད་ནས་མཁན་པོ་སྒྲ་གཅན་འཛིན་བཟང་པོ་ལས་རབ་ཏུ་བྱུང་། མཚན་ཡང་སྒྲ་གཅན་འཛིན་བཟང་པོར་གསོལ། མཚན་ཉིད་ཀྱི་སྡེ་སྣོད་ལ་ལེགས་པར་སྦྱངས་པའི་པཎྜི་ཏ་མཁས་པ་ཆེན་པོར་གྱུར།
དཔལ་བྷི་ཀྲ་མ་ཤི་ལའི་གཙུག་ལག་ཁང་གི་མཁན་པོ་མཛད། བསྟན་པའི་བྱ་བ་བསྒྲུབ་པའི་ཚེ། ལུང་བསྟན་ཐོས་ནས་རྒྱལ་པོ་བྷི་སུ་ཀལྤ་ག་ལ་བ་དེར་སོང་། མན་ཌལ་ཕུལ། གསོལ་བ་བཏབ། དེས་ཀྱང་རྗེས་སུ་བཟུང་ནས་རྗེས་སུ་བསྟན་པ་མཐའ་དག་གནང་། དེ་ནས་
དེའི་དོན་ཉམས་སུ་བླངས་པས་བསྐྱེད་རྫོགས་ལ་བརྟན་པ་ཅུང་ཟད་ཐོབ་སྟེ། དེ་མཐར་ཕྱིན་པར་བྱ་བའི་ཕྱིར། རབ་བྱུང་གི་ཆ་ལུགས་སྦས་ཏེ། བྲན་མོ་ཞིག་ཁྲིད་ནས་ནགས་ཞིག་ཏུ་སྒྲུབ་པ་མཛད་པའི་ཚེ། ལ་ཕུད་གི་ཚོད་མ་ཟ་ཟེར། ཆུང་མས་མ་ཧེའི་ཞོ་དང་ལ་ཕུད་
སྦྱར་བ་འདྲེན་དུ་ཕྱིན་པ་ལ། ཏིང་ངེ་འཛིན་ལ་བཞུགས་འདུག་པས་མ་བསླང་བར་ལོག །རྒྱུན་དེ་ལས་ལོ་བཅུ་གཉིས་སོང་ནས་སད་པ་ན། ཟས་དྲངས་པ་གསོལ་ནས་ལ་ཕུད་ཀྱི་ཚོད་མ་ག་རེ་ཟེར། བྲན་མོས་ལོ་བཅུ་གཉིས་ཏིང་ངེ་འཛིན་ལ་(ལས་)མ་གཞེངས་(བཞེངས་)པས་ད་ག་ན་འོང་། 
1-1-8a

ད་ལྟ་དཔྱིད་ཀྱི་དུས་ཡིན་པས་མེད་ཅེས་སྨྲས་པ་ལ། ང་རི་ཁར་སྒྲུབ་པ་ལ་འགྲོ་གསུང་། མོ་ན་རེ་ལུས་དབེན་པ་མ་ལགས། སེམས་མཚན་མ་དང་རྣམ་རྟོག་གིས་དབེན་ན་ནི་དབེན་པའི་མཆོག་ལགས་ཏེ། ཁྱེད་ཀྱིས་ལོ་གཉིས་ཀྱི་བར་དུ་ཏིང་ངེ་འཛིན་
ལ་བཞུགས་པ་ལ། མཚན་མོ་ཕྲ་མོ་ལ་ཕུག་གི་རྟོག་པ་མ་ཆོད་ན་རི་ཁར་ཕྱིན་པས་ཅི་ཕན། ཅེས་སྨྲས་པས། བདེན་པར་གོ་སྟེ་མདའ་མཁན་མོ་དང་ལྷན་ཅིག་སྤྱོད་པ་ལ་གཤེགས་ནས་མདའ་འཕེན་པའི་སྤྱོད་པ་མཛད་པས། མདའ་ལེགས་པར་བསྲང་ན་གནད་དུ་འཕོག་
པ་བཞིན་དུ་སེམས་ཉིད་གནས་ལུགས་ཀྱི་སྟེང་དུ་སྲོངས་ན་གྲོལ་བར་རྟོགས་ནས། མཚན་མ་དང་རྣམ་པར་རྟོག་པ་སྤངས་ནས། གཉུག་མའི་དོན་ཉམས་སུ་བླངས་པས། ཕྱག་རྒྱ་ཆེན་པོའི་དངོས་གྲུབ་བརྙེས་ཏེ། ཁར་སང་ཕན་ཆད་བྲམ་ཟེ་མིན། །དི་རིང་ཚུན་ཆད་བྲམ་ཟེ་
ཡིན། །དོན་གྱི་བྲམ་ཟེ་ཚངས་པ་ཆེ། །ཧེ་རུ་ཀ་དཔལ་བྲམ་ཟེའི་མཆོག །ཁར་སང་ཕན་ཆད་དགེ་སྦྱོང་མིན། །དི་རིང་ཚུན་ཆད་དགེ་སྦྱོང་ཡིན། །དོན་གྱི་དགེ་སྦྱོང་གསོ་སྦྱོང་ཆེ། །ཧེ་རུ་ཀ་དཔལ་དགེ་སློང་མཆོག །ཅེས་གསུངས་ཏེ། དེའི་ཚེ་ས་ར་ཧ་སྟེ་མདའ་བསྣུན་ཞེས་
གྲགས་ལ། མི་ཀུན་རིགས་ཉམས་སོ་ཞེས་བཅའ་ཞིང་རྒྱལ་པོ་མ་ཧ་པ་ལ་ལ་བསྙད་པ་ལས། དུས་དེར་མ་དད་པ་ཟློག་པའི་རྫུ་འཕྲུལ་བསྟན། རྒྱལ་པོ་བཙུན་མོ་འཁོར་དང་བཅས་པ་ལ། རང་གི་རྟོགས་པའི་དོན་གླུར་བླངས་པའི་ཆོས་བསྟན་པས་གྲོལ་བར་
མཛད། དེ་ནས་དཔལ་གྱི་རི་ལ་གཤེགས། ལོ་སུམ་སྟོང་དང་བཞི་བརྒྱ་བཞུགས་སྐལ་ལྡན་གྱི་དོན་མཛད་དེ་མཁའ་སྤྱོད་དུ་གཤེགས་སོ། །
༈ དཔལ་མགོན་འཕགས་པ་ཀླུ་སྒྲུབ།
ཡང་དེའི་ཚེ་འཇམ་དཔལ་རྩ་རྒྱུད་ལས། དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་
1-1-8b

འབོད་འབྱུང་། །བསྟན་པ་ལ་ནི་དད་ཅིང་ཕན། །རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་མོ་དེས་ཀྱང་འགྲུབ། །བསྟན་བཅོས་སྣ་ཚོགས་དོན་དང་ནི། །དངོས་པོ་མེད་པའི་དོན་དེ་རིག །གང་ཚེ་ལུས་དེ་བོར་བ་ན། །བདེ་བ་ཅན་
དུ་སྐྱེ་བར་འགྱུར། །དེ་ནི་མཐར་གྱིས་སངས་རྒྱས་ཉིད། །ངེས་པ་ཁོ་ནར་ཡང་དག་འཐོབ། །ཅེས་དང་། ལང་ཀར་གཤེགས་པ་ལས། ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་ཐེག་པ་འཇིག་རྟེན་དུ། །
བླ་མེད་ཐེག་ཆེན་རབ་བཤད་ནས། །རབ་ཏུ་དགའ་བའི་ས་བསྒྲུབས་ནས། །བདེ་བ་ཅན་དུ་དེ་འགྲོའོ། །ཞེས་དང་། འཕགས་པ་སྤྲིན་ཆེན་པོ་སྟོང་ཕྲག་བཅུ་གཉིས་པ་ལས་ཀྱང་། ཀུན་དགའོ། ལི་ཙ་བྱི་གཞོན་ནུ་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བ་འདི་ནི། ང་མྱ་ངན་
ལས་འདས་ནས་ལོ་བཞི་བརྒྱ་ལོན་པ་ན་ཀླུ་ཞེས་བྱ་བའི་དགེ་སློང་དུ་གྱུར་ནས། ངའི་བསྟན་པ་རྒྱས་པར་རབ་ཏུ་བསྟན་ཏེ། མཐར་གྱིས་རབ་ཏུ་དང་བའི་འོད་ཅེས་བྱ་བའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཞེས་བྱ་བར་འགྱུར་རོ། །ཞེས་པ་ལྟར་
ལྷོ་ཕྱོགས་བེ་ཏའི་ཡུལ་དུ་བྲམ་ཟེ་ཕུན་སུམ་ཚོགས་པ་ཞིག་ལ་བུ་མེད་ནས། རྨི་ལམ་དུ་བྲམ་ཟེ་བརྒྱ་ལ་ཆོས་སྟོན་དྲངས་ན་བུ་རྙེད་ཅེས། ལྷས་ལུང་བསྟན་ཏོ། །དེ་ལྟར་བྱས་པའི་ཟླ་བ་བཅུ་ན་ཁྱེའུ་ཅིག་བཙས་ཏེ། མཚན་བསྟན་པས་མཚན་བཟང་མོད། འོན་ཀྱང་ཞག་
བདུན་གྱི་ཚེ་ལས་མེད་ཟེར་རོ། །ཅི་ཕན་དྲིས་པས་བྲམ་ཟེ་བརྒྱ་ལ་ཆོས་སྟོན་དྲངས་ན་ཟླ་བ་བདུན། དགེ་སློང་བརྒྱ་ལ་ཆོས་སྟོན་དྲངས་ན་ལོ་བདུན་ཐུབ། དེ་ནས་ཐབས་མེད་ཟེར་རོ། །དེ་བཞིན་བྱས་ཏེ་ལོ་བདུན་དུ་ཉེ་བ་ན་བུའི་རོ་མཐོང་བ། ཕ་མས་མི་བཟོད་པས་གཡོག་དང་བཅས་པ་འཁྱམ་དུ་
1-1-9a

བཏང་ངོ་། །དེ་རིམས་ཀྱིས་སོང་སོང་ནས་ཁ་སར་པ་ཎེའི་ཞལ་བལྟས་ཏེ། ཡང་རིམས་ཀྱིས་སོང་བ་ལས་དཔལ་ན་ལེན་ཏྲའི་སྒོ་དྲུང་དུ་སྙན་དངགས་ཀྱི་རིགས་བྱེད་དག་སྦྲེངས་པ་ན། དེ་ན་བྲམ་ཟེ་ས་ར་ཧ་བཞུགས་པས་གསན་ནས། ནང་དུ་ཁྲིད། ཇི་ལྟར་གྱུར་པའི་རྒྱུ་མཚན་
བཤད་པས། སློབ་དཔོན་ན་རེ་རབ་ཏུ་བྱུང་ནུས་ན་ཐབས་ཡོད་གསུང་བ་ལ། ཁས་བླངས་པས་ཚེ་དཔག་མེད་འཆི་བདག་འཇོམས་པའི་དཀྱིལ་འཁོར་དུ་དབང་བསྐུར་ནས་གཟུངས་འདོན་དུ་བཅུག །ཁྱད་པར་དུ་ལོ་བདུན་ལོན་པའི་ནུབ་མོ་མཚན་ཐོག་ཐག་བཏོན་པས་འཆི་བདག་གི་ཆད་པ་ལས་
ཐར། མཁན་པོ་དེ་ཉིད་ལས་རབ་ཏུ་བྱུང་། ཤེས་བྱ་རིག་པའི་གནས་རྣམས་དང་ཐེག་པ་ཆེ་ཆུང་ཐམས་ཅད་ལ་མཁས་པར་སྦྱངས་སོ། །དཔལ་གསང་བ་འདུས་པ་ལ་སོགས་པ་འབྲས་བུ་སྔགས་ཀྱི་དབང་རྒྱུད། གདམས་པ་མ་ལུས་པ་གསན་ནོ། །དེའི་ཚེ་མཁན་པོས་ལོ་བཅུ་གཉིས་
སུ་མུ་གེ་འོང་བས། གཙུག་ལག་ཁང་ཉམས་དམས་པར་གཟིགས་ནས། དགེ་འདུན་གྱི་ཞལ་ཏ་བར་དགེ་སློང་དཔལ་ལྡན་བསྐོས་ཏེ་དཔལ་གྱི་རི་ལ་གཤེགས་སོ། །དེར་སློབ་དཔོན་གྱི་ཐུགས་དགོངས་ལ་གསེར་འགྱུར་གྱི་རྩི་བྱས་ལ་དཀོན་མཆོག་དང་དགེ་འདུན་གྱི་ཞབས་ཏོག་བྱའོ་
དགོངས། སློབ་དཔོན་བྷ་ལི་པ་ཞེས་བྱ་བ་ལ་གསེར་འགྱུར་གྱི་གདམས་པ་ཞུས། གླིང་བར་ནས་གསེར་འགྱུར་གྱི་རྫས་རྣམས་བླངས་ཏེ་གསེར་འགྱུར་བྱས་པས་མ་གྲུབ། ཆང་འཚོང་མ་ཞིག་གི་སྐྱ་བ་གསེར་དུ་འདུག་པ་མཐོང་ནས། དེ་ལ་ཞུས་པས་གསེར་འགྱུར་གྲུབ། ཟངས་
རྣམས་གསེར་དུ་བསྒྱུར། མུ་གེ་མ་བྱུང་བའི་ས་ནས་འབྲུ་མང་པོ་དྲངས་ཏེ་དགེ་འདུན་གྱི་གདུགས་ཚོད་སྦྱར་དེའི་ཚེ་ཡུལ་ཕྱོགས་ཀྱིས་མི་སྟོབས་མེད་པ་རྣམས་ཤི། སྟོབས་ཅན་རྣམས་གཞན་དུ་དེངས་ཏེ་ཡུལ་སྟོངས་པར་གྱུར་ཏོ། །དེ་ལྟར་གྱུར་པ་པཎྜི་ཏ་རྣམས་ཀྱིས་རིག་ནས། ཁྱེད་ཀྱིས་དགེ་
1-1-9b

འདུན་ལ་མ་ཞུས་པར་གསེར་འགྱུར་བྱས། དགེ་འདུན་ལོག་འཚོ་ལ་བཀོད་འདུག་པས། གནས་ནས་བྱུང་ལ་གཙུག་ལག་དང་མཆོད་རྟེན་བྱེ་བ་གྱིས་ཤིག་ཅེས་བསྒོའོ། །དེའི་ཚེ་དགེ་སློང་བདེ་བྱེད་ཅེས་བྱ་བས། རིག་པའི་རྒྱན་ཞེས་བྱ་བའི་གཞུང་འབུམ་ཕྲག་བཅུ་གཉིས་པ་
བྱས་ནས། ཐམས་ཅད་སུན་འབྱིན་པ་བྱུང་བས། དེའི་གཉེན་པོར་ཆོས་སྡེ་སྣོད་མང་པོ་གསུངས་ནས་ལྟ་བ་ལོག་པ་རྣམས་སུན་ཕྱུང་། དུས་དེར། བྱིས་པ་གཉིས་ཆོས་ཉན་དུ་འོངས་པའི་ཚེ་དྲི་ཞིམ་པོས་འཁོར་ཀུན་ཏུ་ཁྱབ་པར་གྱུར་ཅིང་། སོང་བ་ན་དྲི་མེད་པར་གྱུར་པ་དང་དེར་
དེ་གཉིས་ལ་རྒྱུ་མཚན་དྲིས་པས། དེ་དག་ན་རེ་ངེད་ཀླུའི་རྒྱལ་པོ་འཇོག་པོའི་བུ་ཡིན། མི་ཡུལ་དུ་འགྲོ་བ་ལ་ཙན་དན་གོར་ཤི་ཤའི་སྲུང་བ་བྱས་པ་ཡིན་ཟེར་རོ། །སྒྲོལ་མའི་སྐུ་ཅིག་གཞེངས་(བཞེངས་)ན་ཕན་ཡོན་ཆེ་བར་དགོངས་ཏེ། ཙནྡན་དེ་བསླང་དུ་ཡོད་དམ་བྱས་པས། ཡབ་ལ་
དྲི་ཡིས་ཟེར་དྲིས་པས། སློབ་དཔོན་ཀླུ་ཡི་ཡུལ་དུ་འབྱོན་ན་འབུལ་ཟེར་ནས་ཞལ་གྱིས་བཞེས་ཏེ་ཀླུ་ཡུལ་དུ་བྱོན། ཀླུའི་ཁབ་སྒོ་ན་བཞུགས་པ་དང་། ཀླུའི་རྒྱལ་པོ་ན་རེ་དུག་གིས་མི་ཚུགས་ན་ནང་དུ་བྱོན་ཟེར་ནས་བྱོན། ཀླུའི་རྒྱལ་པོ་འཁོར་དང་བཅས་པ་ལ་ཆོས་
བསྟན། བསོད་སྙོམས་བཞེས་སོ། །དེའི་ཚེ་ཀླུ་རྣམས་ཀྱིས་བཞུགས་པར་ཞུས་པས། ད་ང་མཆོད་རྟེན་བྱེ་བ་བཞེངས་པའི་འདམ་ཚོལ་བ་དང་། འབུམ་གདན་འདྲེན་དུ་འོངས་ཀྱི། བསྡད་མི་ཁོམ་ཕྱིས་འོང་སྲིད་གསུང་སྟེ་འདམ་མང་པོ་དང་། འབུམ་དང་ཡི་གེ་ཉུང་ངུ་
ཡང་གདན་དྲངས་ཏེ་འབུམ་གྱི་ཞབས་ནས་བག་ཙམ་ཀླུས་མ་བསྐུར་ཞེས་གྲགས་སོ། །དེ་ནས་འདམ་དེས་མཆོད་རྟེན་ལ་སོགས་པ་ཀླུ་རྣམས་ཀྱིས་གྲོགས་བྱས་ནས་ཕལ་ཆེར་གྲུབ་ལ་འགའ་ཞིག་ཀླུའི་ཡུལ་དུ་མི་འགོ་བའི་ཕྱིར་མ་བྱས་ཏེ། དེ་ནས་ཀླུ་གྲུབ་(སྒྲུབ་)ཅེས་མིང་དུ་ཆགས་སོ། །ན་གརྫུ་
1-1-10a

ནཱའི་ན་ག་ནི་ཀླུ་སྟེ། ཆོས་དབྱིངས་སུ་སྐྱེས་པ་རྟག་ཆད་གཉིས་ཀྱི་མཐའ་ལ་མི་གནས་པ། གསུང་རབ་རིན་པོ་ཆེའི་བང་མཛོད་ལ་མངའ་བརྙེས་པ་སྲེག་ཅིང་གསལ་བའི་ལྟ་བ་དང་ལྡན་པས་ཀླུའོ། །ཨར་རྫུན་ནི་སྲིད་སྒྲུབ་སྟེ་ཆོས་ཀྱི་རྒྱལ་སྲིད་སྐྱོང་བ་དང་། ཉེས་པའི་
དགྲ་ཚོགས་འདུལ་བས། སྲིད་སྒྲུབ་པོས་ཏེ་བསྡུས་པས་ཀླུ་གྲུབ་(སྒྲུབ་)བོ། །ཚིག་གསལ་དུ། གང་ཞིག་མཐའ་གཉིས་གནས་ལ་གནས་གསལ་ཞིང་། །རྫོགས་སངས་རྒྱས་བློ་རྒྱ་མཚོར་སྐྱེ་བ་བརྙེས། །དམ་ཆོས་མཛོད་ཀྱི་ཟབ་མོ་ཉིད་ཇི་ལྟར། །རྗེས་སུ་རྟོགས་བཞིན་ཐུགས་རྗེས་སྟོན་པར་
མཛད། །གང་གི་ལྟ་བའི་མེ་དག་གིས། །ད་དུང་ཕས་རྒོལ་གཞུང་ལུགས་ཀྱི། །བུད་ཤིང་དང་ནི་འཇིག་རྟེན་གྱི། །ཡིད་ཀྱི་མུན་རྣམས་འཇོམས་པར་མཛད། །གང་གི་གཉིས་མེད་ཡེ་ཤེས་གསུང་མདའི་ཚོགས། །ལྷ་དང་བཅས་པའི་གདུལ་བྱའི་འཇིག་རྟེན་ལ། །ཁམས་གསུམ་དག་ཏུ་རྒྱལ་
ཐབས་ལེགས་མཛད་པས། །སྲིད་པའི་དགྲ་སྡེ་མ་ལུས་འཇོམས་མཛད་པ། །ཀླུ་གྲུབ་(སྒྲུབ་)དེ་ལ་ཕྱག་འཚལ་ནས་ནི་དེའི་ཞེས་གསུངས་སོ། །དེ་ནས་ལི་ཁ་ར་ཤིང་འཕེལ་དུ་གསེར་འགྱུར་བྱས་ཤིང་སྦྱིན་པ་རྒྱ་ཆེན་པོ་བྱིན། དེའི་ཚེ་བྲམ་ཟེ་རྒན་རྒོན་གཉིས་ལ་གསེར་མང་པོ་གནང་བས་
དད་དེ། རྒད་པོས་ཉེ་གནས་བྱས་ནས་ཆོས་མཉན། དེ་ཤི་ནས། སློབ་དཔོན་ཀླུའི་བྱང་ཆུབ་ཏུ་གྱུར་ཏོ། །དེ་ནས་ཤར་ཕྱོགས་པ་ཎ་ཊ་བཱེ་ས་དང་ཡུལ་ར་ཊ་ལ་སོགས་པར་བྱོན་ནས་ལྷ་ཁང་མང་པོ་བཞེངས། སེང་ལྡེང་གི་ནགས་དྲི་ལྡན་འདབ་དྲིལ་བུ་ལྟ་བུའི་བྲག་གསེར་
དུ་སྒྱུར་བར་རྩོམ་པའི་ཚེ་མ་ཧེ་འཚོ་བའི་བྱིས་པ་ཅིག་ནགས་ཀྱི་ནང་དུ་ཕྱིན་པས། དེ་ན་རྒན་མོ་ཅིག་སྣང་བ་ན་རེ། ཁྱོད་ཀྱིས་བཙུན་པ་མ་གི་ཚོའི་ནང་ན་ཀླུ་གྲུབ་(སྒྲུབ་)བྱ་བ་ཞིག་ཡོད་ཀྱིས། དེ་ལ་ཁྱོད་རང་གི་མ་ན་རེ། འདིར་ཤོག་གྱིས་དང་ཟེར། ཕྱིན་པས་ཕྱིན་པས་ཀྱང་གང་ཡིན་ངོ་མ་ཤེས་སླར་ལོག་
1-1-10b

འོངས་པས། ཏ་ལའི་ལོ་མ་བཟུང་ནས་ཁ་ཏ་བྱེད་པ་དེ་ཡིན། ཆོས་གོས་ཀྱི་རྒྱབ་ན་ཡི་གེ་ཨ་ཅིག་ཀྱང་ཡོད་གསུང་། དེར་དེས། དེ་ལ་དེ་སྐད་བྱས་པས། ཀླུ་གྲུབ་(སྒྲུབ་)ཀྱིས་བྱོན་པའི་ཚེ། དེ་སྒྲོལ་མ་ལྷ་ལྔར་ཞལ་གཟིགས། ཁ་ཅིག་ལྷ་གསུམ་དུ་མཐོང་ཟེར། དེའི་ཞལ་ནས། ཁྱོད་ཀྱི་
གསེར་འགྱུར་གྱིས་སེམས་ཅན་གྱི་དོན་བྱས་པ་ཡང་བཟང་སྟེ། དེ་བས་ཀྱང་མཆོག་བསྒྲུབས་ན་སེམས་ཅན་གྱི་དོན་ཆེན་པོ་དེ་ལས་འབྱུང་བས། དཔལ་གྱི་རི་ལ་སྒྲུབ་པ་གྱིས་ཤིག་གསུང་སྟེ་མི་སྣང་བར་
གཤེགས་སོ། །དེར་དེའི་སྒྲུབ་ཐབས་ཀྱང་མཛད་དོ། །དེ་ནས་སྒྲ་མི་སྙན་དུ་གཤེགས་པའི་ལམ་དུ། གྲོང་ཁྱེར་ས་ལ་མ་ནའི་བྱིས་པ་ཛེ་ཏ་ཀའི་ལག་རིས་ལས་རྒྱལ་པོར་ལུང་བསྟན། སྒྲ་མི་སྙན་དུ་ཕེབས་པ་ལ་ན་བཟའ་ཤིང་ལ་བཀལ་ནས་ཁྲུས་མཛད་པས། གོས་གཞན་གྱིས་ཁྱེར་བ་ལ། ངའི་
ཡིན་བྱས་པས། ང་བདག་ཅན་ཟེར་སྐད། དེར་སེམས་ཅན་གྱི་དོན་བྱས། བདུད་རྩི་བླངས་ནས་དཔལ་གྱི་རི་ལ་གཤེགས་པར་དགོངས་པའི་ལམ་དུ། སྔར་ལུང་བསྟན་པའི་བྱིས་པ་རྒྱལ་པོར་གྱུར་པས། གཏན་དུའམ། ཐ་ནའང་ལོ་གསུམ་བཞུགས་པར་ཞུས་པས། ལོ་གསུམ་བཞུགས།
དེ་བར་རྒྱལ་པོའི་བཙུན་མོ་ལ་སོགས་པས་ཆགས་པའི་དབང་གིས་རང་གི་སྒྱུ་རྩལ་བསྟན་ཡང་བསྐྱོད་པར་ནི་མ་ནུས། སྐུར་བ་བཏབ་པ་དེའི་ཚེ་སློབ་དཔོན་འདྲ་བའི་རྒྱལ་བུ་ཞིག་ཀྱང་བཙས། མི་རྣམས་ཀྱང་བཙའ་བར་གྱུར་པ་ལ། སློབ་དཔོན་ཨརྱ་དེ་བས་གྲོང་ཁྱེར་གྱི་ཉེ་ལོགས་མ་ཧེ་འདུ་བའི་
སར། ཤོག་འདག་གི་མ་ཧེ་དཀར་ཟལ་མཛེས་པ་ཤིག་(ཞིག་)བཤམས། དེ་ལ་མ་ཧེ་མོ་ཐམས་ཅད་ལྟ་ཞིང་འཁོར་བས་དེའི་རྟེན་འབྲེལ་གྱིས། ཕྱི་ནས་མ་ཧེའི་བུ་རྣམས་ཀར་ཟལ་དུ་བྱུང་བས། སྐུར་པ་སངས། དེ་ནས་དཔལ་གྱི་རིར་བྱོན། བྲམ་ཟེ་ཆེན་པོ་དང་འབྱལ(འཇལ)། བདུད་རྩི་བསྒྲུབས་པ་བུམ་པ་གང་
1-1-11a

ཕུལ་བས། ཁྱེད་དེ་ལ་དགའ་ན་འདི་ལྟར་གསུང་ནས། སྐད་ཅིག་གིས་རྒྱ་མཚོ་བདུད་རྩིར་བྱས། རྗེས་སུ་གདམས་པ་ཡང་གནང་ངོ་། །དེ་ནས་སློབ་དཔོན་ཡབ་སྲས་ཀྱིས་ལོ་བཅུ་གཉིས་བསྒྲུབ་པ་མཛད་ཅིང་བཞུགས་པའི་ཚེ། སྔར་གྱི་རྒྱལ་པོ་དེ་ལ་བུ་ཅིག་(གཅིག་)ཡོད་པས་དེ་
ལ་མས་གོས་རིན་པོ་ཆེ་ཞིག་བྱིན་པས། འདི་སྦས་ལ་བདག་རྒྱལ་སྲིད་སྐྱོང་བ་ན་བགོ་བར་བྱའོ་ཞེས། མས་ཁྱོད་ཀྱི་ཕ་སློབ་དཔོན་འཕགས་པ་ཀླུ་གྲུབ་(སྒྲུབ་)དང་ཚེ་མཉམ་པའི་བཅུད་ལེན་གྲུབ་པས་སློབ་དཔོན་མ་དྲོངས་(གྲོངས་)བར་དུ་མི་འཆི་བས་ཁྱོད་རྒྱལ་སྲིད་སྐྱོང་བར་མི་ཡོང་ཟེར། བུ་མྱ་ངན་སྐྱེས་
ཏེ་ངུས་པས། མ་ན་རེ། དེ་ཙམ་དུ་མི་དགོས། སློབ་དཔོན་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་གནས་པས་དབུ་བསླངས་པས་སྟེར་བར་འགྱུར་ཟེར། དེར་རྒྱལ་བུས་དབུ་བསླངས་པས་བྱིན། རལ་གྲིས་བཅད་པས་མ་ཆོད། དེར་རྒྱལ་བུ་སྡིག་ཅན་ན་རེ། དགེ་སྦྱོང་རྫུན་མ།
རང་གིས་ཁས་བླངས་ནས་མི་སྦྱིན་ཟེར། སློབ་དཔོན་གྱིས་རྒྱ་མཚོའི་འགྲམ་ནས་ཀུ་ཤ་ལོང་ལ་རྒྱོབ་གསུང་། དེ་ལྟར་བྱས་པས། དབུ་བཅད་པའི་འཚམས་(མཚམས་)ནས་བདུད་རྩི་འོ་རྒྱུན་ལྟར་བབ། རྩ་སྦུབས་གསུམ་ནས། ཚིགས་སུ་བཅད་པ་གསུམ་བྱུང་། ང་ནི་འདི་ནས་བདེ་བ་ཅན་དུ་འགྲོ། །
ཕྱི་ནས་ལུས་འདི་ལ་ཡང་འཇུག་པར་འགྱུར། །ཞེས་བྱུང་ངོ་། །དེ་ནས་རྒྱལ་བུས་དབུ་འབྱར་གྱིས་དོགས་ནས་དཔག་ཚད་དུ་དོར། སློབ་དཔོན་བཅུད་ལེན་གྲུབ་པས་སྐུ་ལུས་དང་དབུ་གཉིས་རྡོ་རུ་གྱུར་ནས་གནས་ཞེས་གྲག་གོ། །ཚིག་གསལ་དུ། དབུ་ནི་དོན་དུ་གཉེར་བ་འོངས་ལ་ཐུགས་
རྗེས་དབུ་ནི་བཅད་དེ་བཙལ་མཛད་ནས། བདེ་བ་ཅན་དུ་རྒྱལ་བའི་སྲས་པོ་ཀླུ་གྲུབ་(སྒྲུབ་)གཤེགས་པར་གྱུར་པ་དེས་མཛད་པ། ཅེས་པས་སློབ་དཔོན་འདིས་མདོ་སྔགས་ཀྱི་བསྟན་བཅོས་རྣམ་དག་མང་དུ་མཛད་ཅིང་། ཁྱད་པར་རིམ་པ་ལྔ་ལས་བཞི་མཛད་དོ། །[མ་དཔེར། སློབ་དཔོན་ཆེན་པོ་མ་ཏཾ་གི་པའི་རྣམ་ཐར་ཆད་པ་ལྟ་བུ་སྣང་།]
༈ སློབ་དཔོན་མ་ཏཾ་གི།
འདིར་སློབ་དཔོན་མ་
1-1-11b

ཏཾ་གི་པ་ཞེས་པ་དང་། གསང་སྤྱོད་དུ་མཛད་པས་མཚན་གསང་དང་། མ་ཏཾ་ཀིའི་སྤྱིལ་པོ་ན་བཞུགས་པ་ལས་མ་ཏཾ་ཀི་པ་ཞེས་གྲགས་པ་སྐུ་ཚད་གཞན་ལས་ཆེ་ཞིང་གཟི་བརྗིད་དང་ལྡན་པ་ཞིག་གདའ་སྐད་དེ། འདི་ནི་སློབ་དཔོན་ཀཧྞ་པ་དང་གཅིག་པར་བཞེད་པའང་ཡོད་དོ། །
༈ སློབ་དཔོན་ཀུ་ཀུ་རི་པ།
བཀའ་བབས་གཉིས་པའི་སློབ་དཔོན་ཀུ་ཀུ་རི་པ་ནི། སློབ་དཔོན་དེ་རྣལ་འབྱོར་པའི་སྤྱོད་པས་རྒྱུ་ཞིང་སོང་བའི་ལམ་ན་ཁྱེ་གུ་ཅིག་འདུག་པ་ལ་སྙིང་རྗེ་སྐྱེས་ནས། དེ་མ་དོར་བར་སངས་རྒྱས་འཁྲུངས་པའི་ཡུལ་ཀ་པི་ལ་ས་ཧུར་ཁུར་ཕྱིན་ནས། ཡུལ་དེའི་ཕྱོགས་ཅིག་ན་རང་བཞིན་
གྱིས་གྲུབ་པའི་ཕུག་ཅིག་ཡོད་པར་བཞུགས། ཁྱེ་གུ་དེར་བོར་ཏེ་རྣལ་འབྱོར་པས་གྲོང་དུ་བསོད་སྙོམས་མཛད་ཅིང་ལོ་གཉིས་སུ་བསྒྲུབས་པས་མངོན་པར་ཤེས་པ་ལ་སོགས་པ་ཐུན་མོང་གི་དངོས་གྲུབ་ཐོབ། སུམ་ཅུ་རྩ་གསུམ་གྱི་ལྷ་རྣམས་ཀྱིས་མཆོད། དེའི་ཚེ་སློབ་
དཔོན་གྱི་སྔར་གྱི་ཁྱི་དྲན་པ་ལ་བརྩེ་བའི་ཐུགས་ཀྱིས་ལྷ་རྣམས་ཀྱིས་བཀག་ཀྱང་མ་དགོངས་ཏེ་ཕུག་ཏུ་བྱོན་པས། ཁྱི་དེས་ནང་དུ་བྲུས་ནས་ས་འོག་ནས་ཆུ་བྱུང་འདུག །ཐེ་ཚོམ་སྐྱེས་ཙམ་ན། དེ་མཁའ་འགྲོ་མར་གྱུར་ནས་སྨྲས་པ། རིགས་ཀྱི་བུ་ལེགས་སོ། །ཁྱོད་ལྷ་རྣམས་ཀྱི་
བར་ཆད་ཀྱི་དབང་དུ་མ་སོང་གིས། སྔ་མའི་དངོས་གྲུབ་བརྫུན་ཡིན་ལ། དེང་མཆོག་གི་དངོས་གྲུབ་འཐོབ་བོ་ཟེར། དེ་དང་ལྷན་ཅིག་སྤྱོད་པ་མཛད་པས་ཕྱག་རྒྱ་ཆེན་པོའི་དངོས་གྲུབ་བརྙེས་ཏེ་སློབ་དཔོན་ཀུ་ཀུ་རི་པ་ཞེས་གྲགས། ཀ་པི་ལའི་གྲོང་ཁྱེར་གྱི་སྐྱེ་བོའི་ཚོགས་ལ་
ཆོས་བསྟན་ནས་དེ་དག་དང་ལྷན་ཅིག་མཁའ་སྤྱོད་དུ་གཤེགས་སོ། །
༈ སློབ་དཔོན་ཙརྱ་པ།
སློབ་དཔོན་ཙརྱ་པ་ནི་ཤར་ཕྱོགས་བྷཾ་ག་ལའི་བྱེ་བྲག་ཨུར་བྷི་ཤའི་ཡུལ་དུ། རིགས་རྗེའུ་རྟེན་དགེ་སློང་། བླ་མ་ཀུ་ཀུ་རི་ཛ་ལན་དྷ་ར་པ་ལ་སོགས་པ་ལ་མ་ཧཱ་མ་ཡ་ལ་སོགས་པའི་རྗེས་སུ་བསྟན་པ་ཐོབ། རྒྱུད་སྡེ་མཐའ་དག་ལ་
1-1-12a

སྦྱངས། བསྐྱེད་རྫོགས་ཀྱི་ཏིང་འཛིན་ལ་མཉམ་པར་བཞག་པས་ལྟ་སྟངས་བཞི་གྲུབ་པ་ལ་སོགས་པའི་ནུས་པ་ཕྲ་མོ་བརྙེས་པ་དང་། བླ་མ་པ་ལང་ཀ་པུ་རིར་སྤྱོད་པ་ལ་འགྲོ་བར་གསོལ་བས། སྤྱོད་པ་བྱེད་པ་ལ་དྲོད་ཐོབ་པ། ཚར་གཅད་རྗེས་འཛིན་ནུས་པ་
དགོས། ཁྱོད་ལ་ཅི་ཡོད་གསུང་སྟག་ལ་རེངས་པ། ཀིཥྞ་ས་རེ་ལ་དགུག་པ། མ་ཧེ་ལ་དབང་། ཤིང་ཐོག་ལ་ལྷུང་བའི་བལྟ་སྟངས་མཛད་པས་གྲུབ། ད་ཁྲོལ་གསུང་། དགྲོལ་བར་མ་ནུས་པ་དང་། སློབ་དཔོན་གྱིས་བཀྲོལ་ནས། སྤྱོད་པ་བྱེད་པ་ལ་རྣམ་ཤེས་དང་ཡེ་ཤེས་
ཀྱི་ལས་ཆ་མཉམ་པ། བསད་གསོ་གཉིས་ཀ་ནུས་དགོས་པ་ད་རུང་མ་འགྲོ་གསུང་། འཁོར་གྱི་ནང་དུ་ཁས་བླངས་ཟིན་པས་ཅིས་ཀྱང་འགྲོ་ཞུས་པས་ཅིས་ཀྱང་འགྲོ་ན་དེ་བི་ཀོ་ཊིར་མ་འགྲོ་གསུངས། འཁོར་སུམ་སྟོང་དང་བཅས་ཏེ། ཞབས་ཁྲུ་གང་གི་ས་ལ་མ་རེག །གདུགས་བདུན་འཛིན་
པ་མེད་པར་ནམ་མཁའ་ལ་འགྲོ། ཌ་མ་རུ་བདུན་རྐྱེན་མེད་པར་བར་སྣང་ལ་འཁྲོལ་བའི་རྫུ་འཕྲུལ་གྱིས་བྱོན། ག་གའི་འགྲམ་དུ་སླེབ་པ་ན། མཛེ་མོ་ཞིག །ང་ཆུ་ལས་སྒྲོལ་ལ་གྲོང་ཕ་གིའི་འདབས་སུ་སྐྱོལ་ཟེར། འདིའི་རྣག་ཁྲག་གིས་རྒྱན་ཆུད་འཇའ་ཞིང་མཛེ་གོས་ན། བྱང་ཆུབ་
སྒྲུབ་པའི་བར་ཆད་དུ་འགྱུར་སྙམ་ནས་མ་ཁུར་བར་ཆུ་ལ་ན་བཟའ་བཏིང་ནས། མ་བྱིང་བར་བཞུད་པས་བླ་མ་ལའང་འདི་ཙམ་ལས་མེད་སྙམ་པའི་ང་རྒྱལ་སྐྱེས་པ་དང་ཆུར་བྱིང་། མོས་གུས་བྱས་པས་ཐོན། དེ་ནས་ཁོང་གི་སློབ་མ་བཟང་པོའི་ཞབས། ཨ་ཡེ་ལ། མ་ཧི་ལ།
ང་མ། དྲུ་མ་རྣམས་ལ་སྒྲོལ་གསུང་ཡང་། སྒྲོལ་དུ་མ་འདོད། འཁོར་གྱི་གསེབ་ནས་དགེ་ཚུལ་ཚེམ་བུ་པ་ཞེས་བྱ་བས་སྟོད་གཡོགས་ཀྱི་ཁུད་དུ་ཚམ་ཚོམ་མེད་པར་མཛེ་མོ་ཁུར་ནས་ཆུའི་དཀྱིལ་དུ་ཕྱིན་པ་ལ་མཛེ་མོ་རྡོ་རྗེ་ཕག་མོ། དགེ་ཚུལ་ཧེ་རུ་ཀར་གྱུར་ནས། ཁྱེད་ཀྱིས་
1-1-12b

སྤྱོད་པ་མི་ནུས་པར་འདུག་གིས་མ་བྱེད་ཅིས་ཀྱང་བྱེད་ན་ཌེྃ་བི་ཀོ་ཊར་མ་འགྲོ་གསུང་ནས་མཁའ་ལ་གཤེགས་སོ། །དེ་ནས་ཕྱིན་པས་རྨོན་པ་ཅིག་དང་ཕྲད། ཆང་བུམ་ས་འོག་ན་བཅུག་འདུག་པ་བླངས་པས་སྟེར་དུ་མ་འདོད་དེ་རྡོ་བ་ཞིག་ལ་ཆུ་བག་ཙམ་འཛག་པ་འདུག་པ་ལ་འཐུང་ཟེར།
མི་ངོམས་བྱས་པས་འཐུང་ནུས་པར་གྱིས། ངོམས་པར་བྱ་ཡི་ཟེར། འཐུངས་པས་མ་ཟད། དེར་རྨོན་(རྨོད་)པའི་གླང་ལ་སྡིག་འཛུབ་གཏད་པས་ཤི། ཁྱོད་སངས་རྒྱས་པའི་རྣལ་འབྱོར་པར་འདུག་པ། འདི་རྗེས་སུ་ཟུང་ཟེར་བ་ལ། གསོ་བར་མ་ནུས། རྨོན་པ་རང་གིས་བསླབ་ཡང་(ཀྱང་)
ཕར་བྱོན་པས། སྐྱེད་མོས་ཚལ་ཞིག་ན་ཤིང་ཐོག་འཛམ་བི་ར་བྱ་བ་ཆུ་སྐྱུར་མོ་འབྱུང་བ་འདུག་པ་བུ་མོས་སྲུང་ཞིང་འདུག་པ་ལ་བསླངས་པས། ཁྱོད་རྣལ་འབྱོར་པར་འདུག་པ་ནུས་པ་མེད་དམ་ཕོབ་ཟེར། ལྟ་སྟངས་ཀྱིས་ཕབ་པས་སླར་མོས་ལྟ་སྟངས་གྱེན་དུ་བཟློག་པས་
ཡར་འབྱར་ཞིང་སོང་ངོ་། །ཡང་ལྷ་ཁང་ཞིག་ན་མི་ཞིག་བརྒྱད་སྟོང་པ་ཀློག་ཅིང་འདུག་པ་ལ། པཎ་ཊི་(པཎྜི་)ཏ་འམ། རྣལ་འབྱོར་པ་འམ། ཅིས་གནས་བྱས་པས། རྣལ་འབྱོར་གྱིས་ཟེར། ཀློག་བྱེད་དམ་བྱས་པས། ཁྱོད་ཀྱིས་ཀློགས་དང་ཟེར། ཀླགས་པས་ཀློག་མ་ཤེས་སོ། །དེ་ནས་བྷཾ་ག་
ལའི་རྒྱལ་པོ་རོལ་པའི་ཟླ་བ་བྱ་བ་ཕྱི་པ་དང་། བློན་པོ་དགེ་བའི་མགོན་པོ་བྱ་བ་ནང་པ་ཡིན་པས། བློན་པོས་སློབ་དཔོན་ལ་བསུ་བ་དང་བསྙེན་བཀུར་བྱས་པས། ཅི་དོན་དུ་གཉེར་གསུང་། ལྷ་ཁང་ན་ཐུགས་རྗེ་ཆེན་པོ་དབང་ཕྱུག་གི་གཟུགས་སུ་བཅོས་པ་ཅིག་ཡོད་པ་ལ་རབ་གནས་ཞུ་
ཟེར། དེར་སུ་པྲ་ཏིཥྠ་ཞེས་སྤྱི་བོར་མེ་ཏོག་བཞག་ནས་རབ་གནས་ཟིན་གསུང་། ཡིད་མ་ཆེས་པ་ལ། སློབ་དཔོན་གྱི་མེ་ཏོག་ཁྱེར་ནས་གཤེགས་པས་སྐུ་ཡང་ཕྱི་བཞིན་གཤེགས། འགྱོད་ནས་གསོལ་བ་བཏབ་པས། ཡང་མེ་ཏོག་སྤྱི་བོར་བཞག་པས་དེ་ཉིད་དུ་བཞུགས་སོ། །གཞན་ཡང་གནས་དེར་རྫུ་
1-1-13a

འཕྲུལ་དུ་མ་བསྟན་པས་རྒྱལ་པོ་འཁོར་བཅས་དད་དེ། ཆོས་ཞུས། བྷྃ་ག་ལ་ཐམས་ཅད་སངས་རྒྱས་པ་ལ་བཀོད་དོ། །ཡང་སློབ་དཔོན་གྱིས་དེ་བི་ཀོ་ཊིར་བྱོན་པས། བུ་མོ་ཞིག་འབྲས་རྡུང་བ་ལ་བསླངས་པས་མ་སྟེར་ནས། འབྲས་ཀྱི་ཚོམས་ལ་ལྟ་སྟངས་བྱས་སྟེ་(ཏེ་)བཀས་པས།
མོས་སླར་སློབ་དཔོན་ལ་ལྟ་སྟངས་བྱས་པས་ཞལ་ནས་ཁྲག་བྱུང་། དེར་མིད་ནས་བཞུགས་སར་བྱོན་པ་ལ་བསྙུང་ནས། བླ་མའི་བཀའ་བཅག་པའི་ཉེས་པ་བྱུང་བས་ཡུལ་ཉི་ཤུ་རྩ་བཞིར་ཚོགས་འཁོར་བྱེད་དུ་སོང་ལ། དེ་ནས་མེ་ཏོག་དང་སྨན་ལོང་ལ་ཤོག་གསུང་ནས་འཁོར་རྣམས་བཏང་
བས། དེ་དག་གིས་ཀྱང་དེ་བཞིན་བྱས་ནས། སླར་ལོག་འོངས་པའི་ལམ་ན་ཁྲུས་ཀྱི་རྫིང་བུ་ཅིག་ན་བུད་མེད་མང་པོ་ཁྲུས་བྱེད་ཅིང་འདུག་པ་རྣམས་ན་རེ་ཁྲུས་མི་བྱེད་དམ་ཟེར། ལོང་མེད། སྨྲས་པས། སློབ་དཔོན་བསྙུང་དྭངས་ཟེར། དེར་ཁྲུས་བྱས་པས་སྨན་རྣམས་ཁོང་གིས་ཁྱེར་
ནས་ནམ་མཁའ་ལ་སོང་ངོ་། །སློབ་དཔོན་གྱི་དྲུང་དུ་ཕྱིན་ཙ། སློབ་དཔོན་གྱི་ཞལ་ནས། ད་མཁའ་འགྲོ་མའི་བར་ཆད་ཡིན་པས། ཚེ་འདིར་མྱ་ངན་ལས་མི་འདའ་བས་ལུས་འདི་བོར་ཏེ་བར་དོར་སངས་རྒྱས་ཐོབ་པར་བྱའོ་གསུང་ནས་མཁའ་སྤྱོད་དུ་གཤེགས་སོ། །
༈ སློབ་དཔོན་ཌོྃ་བི་པ།
བཀའ་བབས་གསུམ་པའི་
སློབ་དཔོན་ཌོྃ་བི་པ་ནི། ཡུལ་མ་ག་དྷ། རིགས་རྒྱལ་རིགས། ཐོག་མར་ནག་པོ་སྤྱོད་པ་བ་ལས་དབང་བསྐུར་བ་ཐོབ། ཀྱེའི་རྡོ་རྗེ་རྣལ་འབྱོར་སྒོམ་ཞིང་རྒྱལ་སྲིད་ཆོས་བཞིན་བསྐྱངས་པས་མི་རྣམས་བདེ་བ་ལ་བཀོད། དེ་ནས་རིགས་ངན་གླུ་མཁན་གྱི་བུ་མོ་མཚན་ཉིད་དང་ལྡན་པ་ཞིག་
ཁྲིད་རྒྱལ་སྲིད་བོར་ཏེ། ནགས་སུ་སོང་ནས་ལོ་བཅུ་གཉིས་རྩེ་གཅིག་པའི་རྣལ་འབྱོར་བསྟེན། རྡོ་རྗེ་འཆང་གིས་དངོས་སུ་བྱིན་གྱིས་བརླབས། མཆོག་གི་དངོས་གྲུབ་བརྙེད། དེ་ཙམ་ན། སྲས་དང་འབངས་ཀྱིས་རྒྱལ་སྲིད་མ་ཟིན་ནས། མི་ཀུན་གྲོས་བྱས་ནས་ནགས་སུ་སློབ་དཔོན་ཡབ་ཡུམ་
1-1-13b

ཚོལ་ཕྱིན་པས། བུ་མོ་དེ་རྒྱ་མཚོའི་ཁ་ལ་པདྨའི་ཟེ་འབྲུའི་སྟེང་ནས་མི་འབྱིང་བར་སོང་ནས་འདོམ་བཅོ་ལྔའི་འོག་ནས་ཆུ་བླངས་ཏེ་སློབ་དཔོན་ཤིང་དྲུང་ན་བཞུགས་པ་ལ་འདྲེན་པ་མཐོང་། ངོ་མཚར་ཆེར་གྱུར་ནས། སྤྱན་དྲངས་པས། ཡབ་ཡུམ་གཉིས་སྟག་དྲུས་མ་
ལ་བཅིབས། དུག་སྦྲུལ་གྱི་ལྕག་བྱས་ཏེ་ཡུལ་དུ་ཕྱིན། རྒྱལ་སྲིད་འཛིན་པར་ཞུགས་པས། རིགས་ངན་གྱི་བུ་མོ་དང་ལྷན་ཅིག་རིགས་ངན་དུ་གྱུར་པ་ཡིན་པས། རྒྱལ་སྲིད་བྱར་གར་རུང་། མེས་དག་པར་གྱིས་ཤིག །དེ་ནས་བྱ་ཡི་གསུང་ངོ་། །མི་རྣམས་ཀྱིས་ཙནྡྣ་
གོར་ཤི་ཤའི་ཡམ་ཤིང་དང་ཏིལ་མར་བསྲེག་བླུགས་ཀྱི་མེ་རབ་ཏུ་ཚ་བ་ལ་བསྲེགས། ཞག་བདུན་དུ་འབར། དེ་ཙམ་ན་བལྟས་པས། པདྨའི་ཟེ་འབྲུ་ལ་ཡབ་ཡུམ་གཉིས་ཧེ་རུ་ཀ་རང་བྱུང་གི་སྐུར་གྱུར་ནས་འདུག་སྟེ། མི་རྣམས་ཤིན་ཏུ་དད། མཚན་ཡང་སློབ་དཔོན་ཌོཾ་བི་ཧེ་རུ་ཀ་
ཞེས་གྲགས་སོ། །སློབ་དཔོན་འདིས་ཤར་ཕྱོགས་རཱ་ཌ་ལ་སོགས་པའི་མིའི་ཡུལ་དུ་[ལོ་]བདུན་བརྒྱ་བཞུགས་ནས་སེམས་ཅན་གྱི་དོན་མཛད་ནས་མཐར་གྱིས་མཁའ་སྤྱོད་དུ་གཤེགས་སོ། །
༈ སློབ་དཔོན་བྷི་ན་པ་བཛྲ།
སློབ་དཔོན་བྷི་ན་པ་ནི་ཏམ་བུ་ལ་རྟུང་བ་ཞེས་བྱ་སྟེ། ཡུལ་ག་ཧུ་རའི་རྒྱལ་པོའི་སྲས་གཅིག་པུར་གྱུར་
པས། གཅེས་པར་བསྐྱེད་བསྲིངས། སྐྱོ་བ་བསེང་བའི་རོལ་མོའི་ཚོགས་དང་ལྷན་ཅིག་བསྡད་པས་གོམས་པའི་ཤུགས་ཀྱིས་ཏམ་བུ་ལ་སྦྲེང་བ་ལ་མཁས་ཤིང་། དེའི་སྒྲ་ལ་སེམས་རྩེ་གཅིག་ཏུ་བཞུགས་པས་འཇིག་རྟེན་གྱི་བྱ་བ་གཞན་ལ་ཡིད་མི་འཇུག་པར་གྱུར་ནས།
གཞན་ཐམས་ཅད་དེ་ལ་མི་དགའ་ཞིང་། མི་སྙན་པ་སྨྲས་པ་ལ། རྒྱལ་བུ་དེ་སྐྱོ་བའི་ཚེ་སློབ་དཔོན་རྟ་མཆོག་ཅེས་བྱ་བས་གདུལ་བའི་དུས་ལ་བབ་པར་གཟིགས་ནས། ཆོས་མི་བྱེད་དམ་སྨྲས་པས། ཏྃ་བུ་ལ་མ་སྤངས་པར་འགྲུབ་པའི་ཐབས་ཡོད་ན་བགྱིད་ཞུས་པས། རྣལ་འབྱོར་པ་དེས་དབང་
1-1-14a

དང་གདམས་པ་བྱིན་ནས། ཏམ་བུ་ལའི་སྒྲ་རྣ་བར་གྲག་པ་དང་སྒྲར་རྟོག་པའི་དམིགས་པ་གཅིག་ཏུ་གྱིས་ལ་སྒོམས་ཤིག་གསུང་། ལོ་དགུར་བསྒོམས་པས་སེམས་ཀྱི་དྲི་མ་དག་ནས། མར་མེའི་རྩེ་མོ་ལྟ་བུའི་འོད་གསལ་གྱི་ཉམས་སྐྱེས། མངོན་པར་
ཤེས་པ་ལ་སོགས་པའི་ཡོན་ཏན་དུ་མ་ཐོབ། སློབ་དཔོན་ཌོཾ་བི་བས་རྗེས་སུ་བཟུང་། ཕྱག་རྒྱ་ཆེན་པོའི་དངོས་གྲུབ་བརྙེས། བྷི་ན་པ་བཛྲ་ཞེས་གྲགས་ཏེ་གྷ་རུའི་གྲོང་ཁྱེར་གྱི་སྐྱེ་བོའི་ཚོགས་ཀྱི་དོན་བྱས་ནས་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །
༈ སློབ་དཔོན་ལྭ་བ་པ།
སློབ་དཔོན་ལ་
བ་པ་འམ་ཨིནྡྲ་བོ་དྷི་ནི། ཡུལ་ཨོ་རྒྱན་གྱི་བྱེ་བྲག་སམྦྷེ་ལ་ཞེས་བྱ་བ་གྲོང་ཁྱེར་འབུམ་ཚེ་ཕྱེད་དང་གསུམ་ལ་དབང་བྱེད་པ་ཞིག་ཡིན་པ་ལས། སློབ་དཔོན་བྷི་ན་བ་དང་འབྱལ(མཇལ)། དབང་བསྐུར་བ་དང་། རྗེས་སུ་བསྟན་པ་གནང་ནས། རྒྱལ་སྲིད་ལ་ཆགས་པ་དང་རིགས་སུ་
འཛིན་པས་རྟོགས་པས་བྱང་ཆུབ་སྒྲུབ་པའི་གེགས་སུ་འགྱུར་བར་དགོངས་ནས་དུར་ཁྲོད་ཀྱིས་སྐྲའི་ལ་བ་གྱོན། བཅང་ཁམ་ཟ་ཞིང་ཕོ་བྲང་གི་སྒོ་དྲུང་གི་རྡོ་ལེབ་འདིའི་སྟེང་དུ་རྣལ་འབྱོར་རྩེ་གཅིག་པས་གཉིད་ལོག་ཅིག་ཅེས་གདམས་པར་མཛད། དེས་ཀྱང་དེ་བཞིན་
དུ་ཉམས་སུ་བླངས། སློབ་དཔོན་ཆེན་པོ་ལ་བ་པས། གྲོང་ཁྱེར་ཆེན་པོའི་སྲང་མདོ་རུ། །བཅུ་གཉིས་བར་དུ་གཉིད་ལོག་པས། ཕྱག་རྒྱ་ཆེན་པོའི་དངོས་གྲུབ་ཐོབ། དེ་ནས་སློབ་དཔོན་ཆེན་པོ་དེ་ཨིནྡྲ་བོ་དྷི་ཆུང་ངུའི་མཆོད་གནས་སུ་བཟུང་ནས། ཁོང་གི་ཆོས་སྟོན་གསོལ་ཞིང་
བཞུགས་པའི་ཚེ། དུར་ཁྲོད་མུན་པ་སྒྲ་སྒྲོགས་སུ་གསང་སྤྱོད་ལ་བྱོན་པས། དེ་ན་ཌ་ཀི་མ་འགའ་ཞིག །སྐྲ་ཡེགས། མདངས་ངན། རྒྱུན་རྙིངས་པར་འདུག འགའ་ཞིག་རྒྱུན་བཟང་། སྐྲ་གྲོལ། མདངས་ལེགས་པ་འདུག །དེའི་ཚེ་ཌ་ཀི་མ་མདངས་བཟང་བ་ཅིག །འོང་ནས་མེ་ཏོག་
1-1-14b

གཏད་པ་སློབ་དཔོན་གྱིས་བླངས་སོ། །བླངས་པས་ཌ་ཀི་མདངས་བཟང་བ་རྣམས་གདོང་མཐོ། ངན་པ་རྣམས་གདོང་དམའ་བར་སྣང་དེའི་དོན་མ་ཤེས་ནས་སློབ་དཔོན་ལོག་འོངས་པའི་ལམ་དུ། ཁོང་རང་གི་ཡུམ་ཌ་ཀི་མ་ཡིན་པ་དེ་དེར་བྱོན་ནས། ཀྱེ་མ་ཁྱེད་ཀྱིས་མེ་
ཏོག་བླངས་པ་དེ་མ་ལེགས། ཌ་ཀི་མ་མདངས་ངན་པ་རྣམས་ནང་པ། བཟང་བ་རྣམས་ཕྱི་པ་ཡིན། དེང་ཁོང་གིས་ཁྱེད་ལ་རྒྱས་བཏབ་པས་བར་ཆད་འོང་གསུང་། འདི་ལ་ཐབས་མེད་དམ་ཞུས་པས། མེད་གསུང་། ཡང་ཡང་ཞུས་པས། འོ་ན་ལུང་པ་ཡ་ཀིའི་ཕུ་
ན་མཚོ་ཅིག་ཡོད། དེ་ན་བུད་མེད་རྒན་མོ་མིག་ཚག་པ། མཆུ་ཆེ་བ། ལྦ་བ་ཡོད་པ། སྐྲ་འཛིངས་པ ཁ་ནས་བཤུས་འདེབས་པ། སྲོ་མའི་ལན་ཚར་ཅན་ཅིག་ཡོད་ཀྱིས། དེ་ལ་འཇིགས་པ་དང་ཡ་ང་བ་མེད་པར་གསོལ་བ་ཡང་དང་ཡང་དུ་ཐོབ་ཅིག །དེས་ཁྱོད་ལ་
ཕན་པའི་ཐབས་ཅིག་སྟེར་ནུས་ཀྱི་གསུང་། དེར་བྱོན་པས་ཇི་ལྟ་བ་བཞིན་འདུག་ནས། གསུང་བཞིན་བྱས་པས། ཁྲོ་སྤྲུག །བེར་ག་ས་ལ་རྡེབས་(བརྡེབས་)པ་ལ་སོགས་པ་བྱས་ནས་མ་གནང་། ཡང་ཡང་གསོལ་བ་དྲག་ཏུ་བཏབ་པས། ཇི་ཞིག་ན་དྲན་མེད་དུ་གྱུར་འདུག་པ་སངས་
ཙམ་ན། མཚོ་དེ་པདྨའི་གདན་བུད་མེད་དེ་རྗེ་བཙུན་མ། ལྦ་བ་ཕག་ཞལ། སྲོ་མའི་ཚར་རུས་རྒྱན། དབྱུག་པ་ཁ་ཊྭྃ་ལ་སོགས་པར་གྱུར་འདུག་ནས། ཌ་ཀི་མའི་རྒྱ་འགྲོལ་བ་ལ་སོགས་པའི་གདམས་པ་གནང་། དེ་རྗེས་ཁོང་རང་གི་གནས་སུ་བྱོན་ནས་བསྒོམས་པའི་ཚེ། སྲོད་ཀྱི་དུས་སུ་
ཌ་ཀི་མ་རྣམས་བར་ཆད་ཀྱི་ཕྱིར་འོངས་པ་ལས། ཅི་ཡང་མ་མཐོང་། རྟོག་པ་སྐྱེས་ཙ་ན་འདི་ན་དྲི་ཞིག་འདུག་ཟེར། མཉམ་པར་བཞག་ཙ་ན་ཅི་ཡང་མི་འདུག་ཟེར། མཚན་ཕྱེད་ཁོའི་རྣམ་ཤེས་ལ་ང་འདི་ལ་ཐིམ་ཡོད་ཟེར། ཏེ་ཁམ་ཚད་དུ་དགོས་ནས་ཟོས་སོང་། ཐོ་རངས་སློབ་
1-1-15a

དཔོན་ལ་དེ་ཁོ་ན་ཉིད་ཀྱི་རྟོགས་པ་འཁྲུངས། མི་འཇིགས་པའི་གདེང་ཐོབ་ནས་ང་འདི་ན་ཡོད་གསུང་། དེར་མཁའ་འགྲོ་མ་རྣམས་ཀྱིས་སོད་རྒྱོབ་ཀྱི་སྒྲ་དང་བཅས་པའི་རྡོའི་ཆར་ཕབ། སློབ་དཔོན་གྱིས་རེངས་པའི་ལྟ་སྟངས་ཀྱིས། རྡོའི་ཆར་རེངས་པར་བྱས། ནམ་མཁའ་རྟེན་མེད་
པ་ལ་ལིང་ངེ་ཆགས་ནས། ད་ལྟའང་ལ་བ་རྡོ་གདུགས། རྡོ་རེག་པ་མེད་པའི་ཕུག །རྡོ་ནམ་མཁའ་ལ་ལྡིང་བའི་གནས་བྱ་བ་ལ་སོགས་པར་གྲགས་པ་ཡོད་སྐད། ནང་པར་རྒྱལ་པོས་ཕོ་བྲང་དུ་སྤྱན་དྲངས་པས་སློབ་དཔོན་གཅེར་བུར་བྱོན། ལ་བ་གར་སོང་ཞུས་པས། ཁྱོད་ཀྱི་ཆུང་མ་རྣམས་
ཀྱིས་ཟོས་གསུང་། རྒྱུ་མཚན་ཞུས་པས། མུ་སྟེགས་བྱེད་ཀྱི་མཁའ་འགྲོ་མར་འདུག་གསུང་། རྒྱལ་པོ་ཐེ་ཙོམ་སྐྱེས་པ་ལ། ཡུལ་གྱི་བུད་མེད་རྣམས་སྡུས་གསུང་། བསྡུས་པ་ལ་སློབ་དཔོན་གྱིས་ལྟུང་བའི་ལྟ་སྟངས་མཛད་པས། ལ་བ་དུམ་རེ་སྐྱུགས། བསྒྲིགས་པས། དུམ་བུ་ཅུང་
ཟད་མ་ཚང་། ཡང་དགུག་པའི་ལྟ་སྟངས་ཀྱིས་བུད་མེད་དོན་གཉེར་དུ་སོང་བ་རྣམས་བཀུག་ནས་སྔར་བཞིན་བྱས་ཚང་བར་བྱུང་། དེ་ནས་སློབ་དཔོན་གྱིས་དེ་རྣམས་ཀྱི་གཙོ་མོར་གྱུར་པའི་གདུག་པ་ཆེ་བ་རྣམས་སྐྲོད་པའི་སྦྱོར་བས་གཞན་དུ་བསྐྲད། ལྷག་མ་རྣམས་ཀྱི་སྣ་ཕུག །སྣ་ལ་ཆུ་རྒྱུས་
སྤྱི་བོར་སློབ་དཔོན་གྱི་ཆགས་རེ་བཅིངས། གཞན་ལ་གནོད་པ་མི་བྱེད་པའི་དམ་ཚིག་བྱིན་ནས་བཏུལ་ལོ། །ད་ལྟ་ཡང་བུད་མེད་ཀྱི་རྒྱན་ལ་དེ་དང་རྗེས་མཐུན་པ་ཡོད་སྐད། དེ་ལྟར་གྲུབ་པ་ཐོབ་པའི་ཚེ་ན་བཟའ་ལས་མཚན་དུ་གསོལ་བ། སློབ་དཔོན་ལ་བ་པ་ཞེས་པ་གྲགས་
པ་དེས་ཡུལ་དེར་ཆོས་བསྟན་ནས་འཁོར་བདུན་དང་བཅས་པ་ལུས་དེ་ཉིད་ཀྱི་མཁའ་སྤྱོད་དུ་གཤེགས་སོ། །
༈ སློབ་དཔོན་ཡན་ལག་མེད་པའི་རྡོ་རྗེ།
བཀའ་བབས་བཞི་པའི་སློབ་དཔོན་ཡན་ལག་མེད་པའི་རྡོ་རྗེ་ནི། འདོད་ཆགས་རྡོ་རྗེ་སྟེ། ཉོན་མོངས་པའི་ཕྱོགས་འཛག་པའི་ཡན་ལག་སྤངས་པ། རྡོ་རྗེ་ལྟར་མི་ཕྱེད་པའི་མཆོག་གི་དངོས་
1-1-15b

གྲུབ་བརྙེས་པ་ཞིག་ཡིན་ལ། སློབ་དཔོན་མཚོ་སྐྱེས་རྡོ་རྗེས་དེ་བསྟན་པའི་ཚུལ་ནི། འདིའི་ཡུལ་ཀན་ཙི། ཡབ་རྒྱལ་པོ་ཨིནྡྲ་བྷོ་དྷི། གྲོང་ཁྱེར་འབུམ་ཚོ་བརྒྱད་ཅུ་རྩ་བཞི་ལ་དབང་འབྱོར་བ་ཞིག་ཡིན་ལ། སྲས་མེད་ནས་མཆོད་པ་བྱས་ཤིང་གསོལ་བ་བཏབ་པས། བཙུན་མོ་ལ་
མངལ་ཆགས་པར་གྱུར། རྒྱ་མཚོ་འཐུངས་པ་དང་ཉི་ཟླ་མིད་པ། རི་རབ་ཟ་བ། ཁམས་གསུམ་རྐང་པས་རྫི་བ་ལ་སོགས་ལྟས་ངོ་མཚར་བ་ཡང་བྱུང་། བལྟམ་པའི་ཚེ། གཏེར་རྡོལ་བ་ལ་སོགས་པ་དགེ་མཚན་ཡང་མཐོང་། ཆེར་སྐྱེས་པ་ལ། རྒྱལ་སྲིད་སྤངས། རབ་ཏུ་བྱུང་།
ཡོངས་སུ་རྫོགས་པའི་པཎ་ཌི་ཏར་གྱུར། རྒྱལ་པོའི་བླ་མཆོད་མཛད། ཆོས་གསུང་བའི་ཚེ། མཐའ་ལོགས་སུ་བུད་མེད་མི་སྡུག་པ་ཅིག་བྱུང་བས། དགའ་ཞིང་རྒོད་པ་དང་། ངུ་ཞིང་སྐྲ་འབལ་བ་ལ་སོགས་པའི་རྣམ་འགྱུར་མི་མཐུན་པ་བསྟན་ནས་སོང་དེར་སློབ་དཔོན་ཐེ་ཚོམ་སྐྱེས་ཏེ་ཕྱི་
བཞིན་སོང་ནས། རྒྱུ་མཚན་དྲིས་པས། ཚིག་ཤེས་པས་དགའ། དོན་མི་ཤེས་པར་འདུག་པས་མ་དགའ་ཟེར། དོན་ཤེས་པ་སུ་བྱས་པས། སློབ་དཔོན་ཡན་ལག་མེད་པའི་རྡོ་རྗེ་ཡིན། ལྷོ་ཕྱོགས་ཀྱི་རྒྱུད་ན་ཡོད་ཟེར། ལུང་བསྟན་པ་བཞིན་བཙལ་བས་ཕག་རྫི་རྒན་རྒོན་
གཉིས་བུ་མོ་ཅིག་དང་གསུམ་གྲོང་འདབ་ཅིག་ན་སྣང་། ཆོས་ཞུས་པས་མཐོང་བ་བཞིན་ཡང་མི་བྱེད། ཐེམ་པའི་རྩ་ར་མཎ་ཌལ་ཕུལ། གསོལ་བ་འདེབས་ཤིང་ཡུན་རིང་དུ་བཞུགས། བུ་མོས་རོལ་ནང་ནས་བསྒྲུགས་པའི་འབུའི་ཚོད་མ་ཅིག་བྱིན་པ་ཡང་མ་གསོལ།
སྤྱོད་ལམ་ལ་ཡང་ཐེ་ཚོམ་གྱི་རྟོག་པ་བག་རེ་སྐྱེས། དེར་རྒད་པོ་ན་རེ། ཁྱོད་རྒྱལ་པོའི་རིགས་དང་པཎ་ཊི་(པཎྜི་)ཏའི་ཡོན་ཏན་སྙེམས་རྟོག་པ་མང་བས་སྣོད་དུ་མི་རུང་གསུང་། ནན་ཏན་དུ་ཞུས་པས། སྤྲུལ་པའི་དཀྱིལ་འཁོར་དུ་དབང་བསྐུར། རྒྱུད་དང་གདམས་པ་གནང་། རིགས་ངན་བུ་
1-1-16a

མོ་དང་ལྷན་ཅིག་དཔལ་གྱི་རི་ལ་ལོ་བཅུ་གཉིས་བསྒྲུབ་པ་མཛད་པས་དངོས་གྲུབ་བརྙེས། མིའི་ཡུལ་དུ་མུ་གེ་བྱུང་བ་ལ་སྦྱིན་སྲེག་མཛད་ནས་ཀླུའི་རྒྱལ་པོ་བྷ་སུ་ཀི་གཟིར་བས་འབྲུ་ལ་སོགས་པའི་ཆར་ཕབ། དེ་ནས་སྔར་གྱི་རྒྱལ་པོའི་ཁབ་ཏུ་ཕྱིན་པས། རྒྱལ་
པོའི་རིགས་དང་ཡོན་ཏན་ཉམས་པར་བྱས་པས་རིགས་ངན་གྱི་བུ་མོ་དང་ལྷན་ཅིག་སྲེགས་ཤིག་ཅེས་འབངས་རྣམས་ལ་བགོ་བས། ཙནྡྣ་གྱི་མེ་ཆེན་པོ་སྤར་བའི་དབུས་སུ་བཞག །ཞག་མང་དུ་མེ་དང་དུ་བ་མ་ཆད་ནས་བལྟས་པས། དཀྱིལ་ན་མཚོ་རྡོལ་བའི་དབུས་པད་སྡོང་ཁ་
བྱེ་བའི་སྟེང་ན། སློབ་དཔོན་ཀྱེའི་རྡོ་རྗེ། ཡུམ་བདག་མེད་མར་གྱུར་ནས། ཟིལ་པ་ཕྲོམ་མེ་འདུག །རྒྱལ་པོ་དཔུང་གི་ཚོགས་དང་བཅས་པ་ཤིན་ཏུ་འགྱོད་ནས། བཟོད་པར་གསོལ་བ་ལ་ཆོས་བསྟན། མཚན་ཡང་མཚོ་སྐྱེས་རྡོ་རྗེ་ཞེས་གྲགས་ཏེ་མཐར་མཁའ་སྤྱོད་དུ་
གཤེགས་སོ། །
༈ ཌཱ་ཀི་མ་སྐལ་བ་བཟང་མོ།
ཌཱ་ཀི་མ་སྐལ་བ་བཟང་མོ་ནི། སུ་མ་ཏི་ཞེས་པ་བློ་གྲོས་བཟང་མོ་འམ། དཔལ་གྱི་བློ་གྲོས་མ་ཞེས་པ་ལ་སོགས་མཚན་གྱི་རྣམ་གྲངས་སུ་འདོད་དེ། རྒྱལ་པོ་ཨིནྟྲ་བྷོ་དྷིའི་ལྕམ་མོ་ལེགས་སྨིན་ཀ་ར་ཞེས་བྱ་བ། མཚན་ཉིད་དང་བསྟན་པ་ལ་དད་པ་ཅིག་ཡོད་པ་དེ་ལ་
སྐུ་མཛེ་བྱུང་ནས། བསྟན་པ་ལ་ཞུགས་སྤྱན་རས་གཟིགས་ལ་གསོལ་བ་བཏབ་པས། ནད་ལས་གྲོལ། སློབ་དཔོན་མཚོ་སྐྱེས་རྡོ་རྗེ་ལ་སོགས་པའི་གྲུབ་པ་ཐོབ་པའི་བླ་མ་དང་། རྡོ་རྗེ་འཆང་ལ་སོགས་པའི་སངས་རྒྱས་བྱང་སེམས་མང་པོ་ལ་རྗེས་སུ་བསྟན་པ་ཐོབ། གསང་
སྤྱོད་དུ་བསྒྲུབ་པ་མཛད་པས་དངོས་གྲུབ་བརྙེས། དེའི་ཚེ་ཡུལ་ལང་ཀ་པུ་རི་རྒྱལ་པོ་ཛྭ་ལན་ཏྲ་ཞེས་བྱ་བས་སྔོན་དུ་ལྷ་ལྕམ་བླངས་པ་ཞིག་ཡོད་པ་དེའི་སྒོ་དྲུང་དུ་སོང་ནས། སྨྱོན་མའི་བརྟུལ་ཞུགས་ཀྱི་སྤྱོད་པ་མཛད། རྒྱལ་པོའི་ཕྱག་དར་བ་ཞིག་ལ་ཆོས་བསྟན། དེ་ཙམ་ན་མི་ཀུན་
1-1-16b

གྱིས་ལ་ལས་བསྙོན་མར་མཐོང་། ལ་ལས་ལུས་འོད་ཀྱིས་ཁྱབ་པ་ལ་ལྷའི་བུ་མོ་མང་པོས་བསྙེན་བཀུར་བྱེད་པ་མཐོང་། ལ་ལས་རྣལ་འབྱོར་མ་གསུམ་གཅིག་དང་དུ་མར་སྣང་བ་མཐོང་། ཐམས་ཅད་ཐེ་ཚོམ་དུ་གྱུར་པ་ལས། ལན་ཅིག་ཁྲོམ་དུ་གྲི་གུག་གིས་རང་གི་དབུ་བཅད་
པ་ཐོད་པར་བཅུག །ཁ་ཊྭཾ་ག་ཕྲག་པ་ལ་བཀལ། གར་བྱས། མཐར་ཕྱག་དར་བ་དང་ཁ་སྦྱར་ཏེ་མཁའ་སྤྱོད་དུ་གཤེགས་སོ། །ལུགས་གཉིས་པའི་དང་པོ་ནི།
༈ ལྷ་བུ་བློ་གྲོས་རིན་ཆེན།
ས་བཅུ་པའི་བྱང་ཆུབ་སེམས་དཔའ་བློ་གྲོས་རིན་ཆེན་ཞེས་བྱ་བ་དགའ་ལྡན་གྱི་གནས་ནས། ལྷའི་བུའི་གཟུགས་ཀྱིས་
བྱོན་ནས། སློབ་དཔོན་འཕགས་པ་རྗེས་སུ་བཟུང་བ་མན་ཆད་འདྲའོ། །བཀའ་བབས་གཉིས་པའི་སློབ་དཔོན་ས་ར་ཧ་ཆེན་པོའི་ལོ་རྒྱུས་གོང་དུ་བསྟན་ནས།
༈ རི་ཁྲོད་དབང་ཕྱུག་ཤྭ་བ་རི་པ།
ས་ར་ཧ་ཆུང་ངུ་ནི། གྲོང་ཁྱེར་ཏེ་ཏེ་ན་གར་མཁན་གཟའ་མི་ལོ་ཀི་དང་། གུ་ན་གཉིས་ཀྱི་བུ་ཚ་རིགས་ངན་གླུ་གར་
གྱིས་འཚོ་བའི་མིང་སྲིང་གསུམ་ཡོད་པ་དེས་སློབ་དཔོན་ཀླུ་སྒྲུབ་བྷྃ་ག་ལའི་གྲི་པའི་དགོན་པ་ན་བཞུགས་པ་ལ་གླུ་གར་ཕུལ་ནས་སློང་དུ་ཕྱིན་པས། རིགས་ངན་ལ་རྣམ་རྟོག་མ་མཛད་པར་ནང་དུ་བོས། ཁ་ཟས་མང་པོ་བྱིན་པ་དང་། དད་པ་རྙེད། དེར་བྱང་སེམས་བློ་གྲོས་
རིན་ཆེན་གྱི་སྐུའི་རས་བྲིས་མཐོང་ནས། འདི་ཅི་ལགས་ཞུས་པས། འདི་བྱང་སེམས་ལྷའི་བུ་ཐ་མལ་པས་མི་མཐོང་བ་ཅིག་ཡིན་གསུང་། བསྟན་པར་ཞུས་པས། ངའི་སྤྱི་གཙུག་ན་ཡོད་ཀྱི་ལྟོས་གསུང་། དེ་མཐོང་བའི་སྤྱན་ཅིག་ཞུ་ཞུས་པས། འཁོར་ལོ་སྡོམ་
པའི་དཀྱིལ་འཁོར་དུ་བཅུག །རྗེས་སུ་བསྟན་པ་གནང་། ནན་ཏན་གྱིས་ཉམས་སུ་བླངས་པས་རྒྱུད་དག་ནས་ཞལ་མཐོང་། གར་དང་དྷོ་ཧ་གླུར་བླངས་པའི་མཆོད་པ་ཕུལ་བས་བྱང་སེམས་ཀྱི་ཞལ་ནས་ཁྱེད་ཀྱིས་དེའི་དོན་ཤེས་སམ་གསུང་མི་ཤེས་པས་ཞུ་ཞུས་པས། རྒྱུད་བྱིན་གྱིས་
1-1-17a

བརླབས་ཏེ་སྙིང་པོའི་དོན་བསྟན། དེ་ཉིད་དུ་དེ་ཁོ་ན་ཉིད་ཀྱི་རྟོགས་པ་ཐོབ་པར་གྱུར་ཏོ། །དེ་ནས་རིགས་ཀྱི་བུ་ཁྱོད་ལྷོ་ཕྱོགས་ལྡོང་ངར་གྱི་སྟོན་པ། ཤྭ་བ་རི་དབང་ཕྱུག་བྱ་བ་ཡིན་པས། འདིར་མ་སྡོད་པར་རྔོན་པའི་ཆས་སུ་ཞུགས་པ་ལྷོ་ཕྱོགས་དཔལ་གྱི་
རི་ལ་སེམས་ངལ་སོ་བའི་རི་ཡིད་འཕམ་པར་བྱེད་པའི་རི་ལ་སོང་ལ། དབང་པོ་ཡང་རབ་རྣམས་ཀྱི་དོན་གྱིས་ཤིག་ཅེས་ལུང་བསྟན། མིང་སྲིང་རྣམས་ཀྱིས་རྔོན་པའི་ཆས་སུ་ཞུགས་ནས་དཔལ་གྱི་རི་ལ་བྱོན་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ཏེ་
དིང་སང་གི་བར་དུའང་བཞུགས་ཞེས་གྲག་གོ། །
༈ སློབ་དཔོན་ལུ་ཨི་པ།
སློབ་དཔོན་ལུ་ཨི་པའི་ཡུལ་ཨུ་རྒྱན། ཡབ་ཡིག་མཁན་གྱི་རྒྱལ་པོ་ཟླ་བ་རོལ་པ། ཡུམ་ཟླ་བའི་དཔལ་རང་གི་མཚན་ཀུན་ཏུ་དགེ་བ། ཆེར་སྐྱེས་ནས་ཡིག་བརྩིས་དང་སྒྱུ་རྩལ་གནས་ལ་སོགས་པ་རིག་པ་དུ་མ་བསླབས།
དེའི་ཚེ་དཔལ་རི་ཁྲོད་དབང་ཕྱུག་དང་འབྱལ། མཎ་ཌལ་ཕུལ། གསོལ་བ་བཏབ་པས་རྗེས་སུ་བཟུང་། ནན་ཏན་གྱིས་སྒྲུབ་པ་མཛད་པའི་ཚེ། ཨུ་རྒྱན་པའི་ཡུལ་ཆོས་ཀྱིས་ཚེས་བཅུ་རྣམ་པ་གཉིས་ལ་དུར་ཁྲོད་དུ་མཆོད་པ་ལ་འགྲོ་བས། སློབ་དཔོན་གྱིས་ཀྱང་བྱོན། དེར་གཞན་
རྣམས་གྱེས་པའི་རྗེས་ལ་ཡུལ་ཉེར་བཞིའི་དཔའ་བོ་དང་རྣལ་འབྱོར་མ་ཐ་མལ་པའི་ལུགས་བཟུང་བ། སྒེག་ཅིང་རོལ་པ་རྣམས་ཀྱི་དབུས་ན་སྐྱེ་བདུན་གྱི་རོ་ཞིག་བཞག་འདུག་པ་ལ། དེ་རྣམས་ལ་ཕྱག་བྱས་པས། དྃ་ཚིག་རྫས་དེ་ལ་ཆོད་ལ་ངེད་ལ་དྲོངས་ཟེར་བས་དྲངས། ཁ་ན་མ་
ཐོ་བ་མེད་པ། ཉོན་མོངས་པ་དང་མ་འདྲེས་པའི་ཟས་ཡིན་པས། ཟོ་གསུང་། ཚམ་ཚོམ་མེད་པར་ཟོས་པས་ཤིན་ཏུ་མཉེས། སྐད་ཅིག་གིས་མི་སྣང་བར་གྱུར་པའི་སྐད་ཅིག་ལ། ཧེ་རུ་ཀའི་དཀྱིལ་འཁོར་དུ་བཅུག །དབང་བྱིན། རང་བྱིན་གྱིས་བརླབ་པའི་ཉམས་མྱོང་གི་བདེ་
1-1-17b

བའི་མཚོན་བྱེད་དཔེའི་ཡེ་ཤེས་རྒྱུད་ལ་བསྐྱེད་ནས་དེ་ཉིད་བརྟེན་ཞིང་(ཅིང་)བོགས་དབྱུང་བའི་ཕྱིར་གདམས་པ་དང་རྗེས་སུ་གདམས་པ་ཕོག་ནས་ཚེ་འདི་ཉིད་ལ་མཆོག་གི་དངོས་གྲུབ་མཚོན་བྱ་དོན་གྱི་ཡེ་ཤེས་མྱུར་དུ་རྟོགས་པའི་ཕྱིར་བསྐུལ་བའི་ཚིག །རྐང་པ་བརྐྱང་པ་སྤངས་ནས་ནི། །འཁོར་བའི་
མངག་གཞུག་དོར་ནས་སུ། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །ཞེས་གསུངས་ནས་མི་སྣང་བར་གྱུར་ཏོ། །དེའི་དོན་བསམས་པས་བསྒྲུབ་པ་ལ་རྩེ་གཅིག་ཏུ་འབད་དགོས་པར་དགོངས་ནས་འཚོ་བ་གང་ལ་བརྟེན་སྙམ་པས། བསོད་སྙོམས་ལ་སོགས་པ་
ཆགས་སྡང་སྐྱེ་ཞིང་། ཤིང་ཐོག་ལ་སོགས་པ་དགུན་དཀོན། ལག་གི་བླ་ལ་སོགས་པ་ནི་སྒྲུབ་པའི་བར་ཆད་དུ་འགྲོ་བར་དགོངས་ནས། རིམས་ཀྱིས་ལྗོངས་དང་དབེན་གནས་ཀུན་ཏུ་རྒྱུ་ཞིང་། མཐར་གྱིས་ཤར་ཕྱོགས་བྷྃ་ག་དང་ཉེ་བ་ཆུ་བོ་གང་གའི་འགྲམ་དུ་བྱོན་པས། ཉ་པ་
མང་པོས་ཉ་བསད་པའི་ལྟི་ལྟོའི་ཕུང་པོ་ཆེན་པོ་ལ་བྱ་གཅན་གྱིས་ཟ་བ་མཐོང་ནས། བདག་པོ་མེད་ཅིང་རྩོལ་བ་ཆུང་བར་གཟིགས་ཏེ། དེའི་ཕྱོགས་ཅིག་ཏུ་ཉ་རྒྱུ་གསོལ་ཞིང་རྩེ་གཅིག་ཏུ་ཉམས་སུ་བླངས་པས། ཕྱག་རྒྱ་ཆེན་པོའི་དངོས་གྲུབ་བརྙེས། གསོལ་ཟས་ལ་མཚན་དུ་གསོལ་
བ་ལུ་ཨི་པར་གྲགས་སོ། །
༈ སློབ་དཔོན་ཌེཾ་གི་པ།
དེ་ནས་སློབ་དཔོན་གྱིས་རྒྱ་གར་ལྷོ་ཕྱོགས་དང་ཉེ་བ་ན། ཨོ་ཊ་བི་ཤའི་ཡུལ་གྲོང་ཁྱེར་ཀུ་མ་རཱ་ཀྵེ་ཊ་ཞེས་བྱ་བ་ན། རྒྱལ་བོ་བྷི་མ་ལ་ཙནྟྲ་ཞེས་པ། རྒྱལ་སྲིད་ཀྱི་འབྱོར་པ་བདུན་དང་ལྡན་པ་ཞིག་ཡོད་པ་དེ་གདུལ་བའི་དུས་ལ་བབ་པར་གཟིགས་ནས་དེར་བྱོན།
རྒྱལ་པོ་དེ་སྐྱེད་མོས་ཚལ་དུ་བྱོན་པ་ལ་གྲོང་ཁྱེར་བ་རྣམས་ཀྱིས་ལམ་བར་ཐམས་ཅད་ཕྱག་དར་བྱས། དྲི་ཞིམ་པོའི་ཆུས་བྱུགས། མེ་ཏོག་ལ་སོགས་པའི་ཡོ་བྱད་ཐམས་ཅད་ཀྱིས་གཅལ་དུ་བཀྲམ་ཏེ། སྐྱེད་མོས་ཚལ་གྱི་དབུས་སུ་རིན་པོ་ཆེ་སྣ་ཚོགས་ཀྱིས་སྤྲས་པའི་ཁྲི་
1-1-18a

བཤམས་པ་ལ་སློབ་དཔོན་བསྙོན་པའི་སྤྱོད་པས་རྡོ་རྗེ་དཀྱིལ་ཀྲུངས་གིས་དགོངས་པ་མངོན་དུ་མཛད་ནས་བཞུགས་སོ། །དེའི་ཚེ་རྒྱལ་པོ་དཔུང་གི་ཚོགས་དང་བཅས་པ་བྱོན་པའི་སྔོན་དུ། མདུན་ན་འདོན་རྟ་པ་སུམ་ཅུ་སོ་གཉིས་པོ་བཀྲ་ཤིས་ཀྱི་བུམ་པ་ཐོགས་ཏེ་
ལམ་གྱི་བཀྲ་མི་ཤིས་པའི་རྟགས་རྣམས་མེད་པར་བྱེད་ཅིང་ཤིས་པའི་རྟགས་སོགས་བཅུག་སྟེ་འོངས་པ་དང་། ཁྲིའི་སྟེང་ན་སློབ་དཔོན་བཞུགས་པ་མཐོང་། ཅི་བསྙོན་པ་འདི་བསྐྲད་དགོས་ཟེར་ནས་དབྱིག་པས་བསྣུན་ཅིང་། སོང་། ཞེས་ལན་གསུམ་དུ་
བརྗོད་ཀྱང་ལན་མེད། སློང་བར་བརྩམས་ཀྱང་སྒུལ་བར་མ་ནུས། ཧ་ཅང་མ་རིག་པས། ཧ་ཧ་ཞེས་བརྒད་པས། སློབ་དཔོན་མཉམ་བཞག་ལས་ལངས་ཏེ། མ་ལུས་པ་འདི་ཇི་ཙམ་ཡིན་ཏེ་འཇིག་རྟེན་གསུམ་པོ་ཇི་ཙམ་ཡིན། དེ་ཆ་ཉིད་ཀྱི་གཅིག་ནི་མི་བདག་
གཞན་ཡིན་དེའི་གཡོག་ཡིན་ན། བློ་བཟང་དེ་ཡང་གཞན་གྱི་དམ་པའི་སྤྱོད་པ་བཞད་གད་བྱེད་པ་ནི། ཨེ་མ་འཁོར་བ་ངོ་མཚར་རེ་ཆེ་འདི་ལ་སྨྲ་མ་ཅི་ཞིག་དགོས། ཞེས་གསུངས་ཏེ། དང་པོ་སྒྲུབ་པ་ལ་ཞུགས་ནས་དེ་བར་ཕལ་ཚིག་དེ་ལས་མ་གསུངས། དེ་ནས་
བྲམ་ཟེ་དེ་དག་སྐྱེངས་ནས་སླར་ལོག་སྟེ་སྔར་གྱི། རྣམས་རྒྱལ་པོ་ལ་བསྙད་པས། རྒྱལ་པོ་ཁྲོས་ཏེ། དཔུང་གི་ཚོགས་ཐམས་ཅད་དེར་ཐོང་ལ་བརླག་པར་གྱིས་ཤིག་ཟེར་ནས། དེ་བཞིན་དུ་བྱས་པས། སློབ་དཔོན་གྱིས་སྡང་མིག་གིས་བལྟས་ནས། ཧ་ཧ་ཧི་ཧི་ཞེས་བགད་
པས། དཔུང་གི་ཚོགས་བསྙོ་ནས་ཧ་ཧ་ཟེར་ཞིང་བྲོས་སོ། །དེར་རྒྱལ་པོ་སྐྲག་ནས། བཟོད་གསོལ་མ་བྱས་ན། རྒྱལ་ཁམས་ཕུང་བར་བྱས་(བྱ་)འོང་སྙམ་ནས། མྱུར་དུ་གླང་པོའི་མཆོག་ལས་བབས། སློབ་དཔོན་གྱི་དྲུང་དུ་འོངས་མཎ་ཌལ་ཕུལ། བཟོད་པར་གསོལ་བས་སྔར་གྱི་རྣམས་གྲོལ་ལོ། །
1-1-18b

དེ་ནས་རྒྱལ་པོས། ཁྱོད་སུ་ཡིན། བརྗོད་པས། སློབ་དཔོན་ན་རེ་ཁྱོད་ཀྱང་སུ་ཡིན། ང་རྒྱལ་པོ་ཡིན། ངའང་རྒྱལ་པོ་ཡིན། འོ་ན་རྒྱལ་པོའི་ལོངས་སྤྱོད་ལ་སོགས་པ་ཡོད་དམ་དྲིས་པས། སློབ་དཔོན་གྱིས། ས་གཞི་མལ་སྟན་ཆེན་པོ་ཡིན་ཏེ་ལག་པའི་བློ་རྟེན་འབོལ་བ་ཁྲི། །ཟླ་བའི་
འོད་ཟེར་སྒྲོན་མ་གསལ་ཞིང་བསིལ་ཡབ་རྗེས་སུ་མཐུན་པའི་རླུང་། །རྒྱ་ཆེ་ནམ་མཁའི་བླ་རེ་ཆགས་བྲལ་སྟོང་པའི་བུད་མེད་ལ་སྤྱོད་ཅིང་། །ཨེ་མ་རྒྱལ་ལྟར་སྲིད་ན་འཇིགས་མེད་བདེར་ཉལ་རྣལ་འབྱོར་ཆེན་པོ་ཡིན། །ཞེས་གསུངས་པས་རྒྱལ་པོ་དད་ནས། སློབ་དཔོན་གླང་པོ་ཆེ་མཆོག་
གི་སྟེང་དུ་བཞག་སྟེ་ཁབ་ཏུ་སྤྱན་དྲངས། དབང་བསྐུར་ཞུས་པས་ཁྱེད་ནི་རིགས་སྙེམས་པའི་གང་ཟག་ཡིན། སྣོད་དུ་མི་རུང་ངོ་གསུངས་པ་ལ། རྒྱལ་སྲིད་སྤོང་བར་ཁས་བླངས་ནས་ཞུས་པས། དེ་ཉིད་དུ་འཁོར་ལོ་བདེ་མཆོག་གི་དཀྱིལ་འཁོར་རྫོགས་པར་སྤྲུལ་ནས།
དབང་བཞི་རྫོགས་པར་བསྐུར་རོ། །རང་བྱིན་གྱིས་བརླབས་པའི་བདེ་བ་ཉམས་མྱོང་རྒྱུད་ལ་བསྐྱེད་དོ། །བློན་པོ་བྲམ་ཟེ་གཙང་སྦྲ་ལ་དགའ་ཞིང་རིགས་ལ་མཆོག་ཏུ་འཛིན་པ་ཡིན། ང་རྣལ་འབྱོར་པ་ཤ་ཆང་ཟ་ཞིང་འཐུང་ན། དེ་ལ་ཁྱོད་མོས་སམ། མོས་ཟེར་ནས། དེ་ནས་དེ་ལ་ཡང་
ཉམས་མྱོང་རྒྱུད་ལ་བསྐྱེད་དོ། །དེ་ནས་རྒྱལ་བློན་གཉིས་ལ་གདམས་ངག་དབོག་པར་དགོངས་ནས་གནས་ལུགས་ཕྱག་རྒྱ་ཆེན་པོའི་དོན་ལ་སེམས་གཏོད་དུ་བཅུག་ནས་མཁྱེན་བཞིན་དུ། ཁྱེད་གཉིས་ད་ལྟ་སེམས་གང་ལ་འཕྲོ་ཞེས་དྲིས་པས་རྒྱལ་པོ་ན་རེ་སྨད་འཚོང་མ་ལའོ། །བློན་པོ་ན་རེ།
ཌེྃ་གི་སྒྲ་ལ་འཕྲོ་ཟེར། དེ་ནས་སློབ་དཔོན་གྱིས་ཌེྃ་གི་སྒྲ་ལ་གཞི་བྱས་ཏེ་བསྟན་པ་ན། ཌེྃ་གིའི་སྒྲ་དེ་ཚོམས་ན་འདུག་གམ། ཐོ་བ་དང་སྐྱེས་བུའི་རྩོལ་བ་ལ་སོགས་པ་གང་ལ་འདུག་རྟོག་ཤིག །ཅེས་གསུངས་པས་དེ་གཉིས་ཀྱིས་བརྟགས་པས། ཡ་གྱལ་གང་ལ་ཡང་མ་རྙེད་
1-1-19a

ནས། སྨྲས་པ། དཔེ་དེ་བཞིན་དུ་ཕྱག་རྒྱ་ཆེན་པོ་དེ་རྟོགས་པར་བྱེད་པའི་ཐབས་བླ་མའི་གདམས་ངག་དང་། སློབ་མའི་མོས་གུས་དང་། རྩོལ་བ་ལ་སོགས་པ་རྐྱང་པ་ལས་མི་འབྱུང་ཞིང་། དེ་རྣམས་འཚོགས་པ་ལས་རྟོགས་ཏེ། དེས་ན་ཆོས་ཐམས་ཅད་རྟེན་
ཅིང་འབྲེལ་བར་འབྱུང་བ་ཙམ་ཡིན་པས་དེའི་ཕྱིར་ཆོས་ཀྱང་སྐྱེ་བ་མེད་པའི་ཆོ་འཕྲུལ་དུ་ཤེས་པར་གྱིས་ལ་ལམ་མངོན་པར་རྟོགས་པ་སྒོམས་ཤིག །ཅེས་གསུངས་པས། དེ་གཉིས་ན་རེ། དེ་ཇི་ལྟ་བུ་ལགས་ཞུས་པས། སློབ་དཔོན་ན་རེ། ཚངས་པའི་གནས་
བཞི་བསྒོམ་པར་བྱའོ་ཞེས་པ་ལ་སོགས་པའི་མངོན་རྟོགས་གཞུང་དུ་བཀོད་དོ། །དེ་ནས་རྒྱལ་པོའི་རིགས་དང་འབྱོར་པ་ལ་སོགས་ཀྱི་ང་རྒྱལ་བཅག་པའི་ཆེད་དུ། ཁྱེད་ཀྱི་འབྱོར་པ་རྣམས་ཆ་གསུམ་དུ་བགོས་ལ། གཅིག་དགེ་སློང་དང་བྲམ་ཟེ་ལ་ཕུལ། གཅིག་
ཕོངས་པ་ལ་བྱིན། གཅིག་རྒྱལ་སྲིད་འཛིན་པ་ལ་ཞོག་ལ། རང་གཅེར་བུར་ཕྱུང་། ལུས་ཐལ་བས་བྱུགས། འདོམས་ལ་བཅོ་རས་ཀྱིས་དཀྲིས། དབྱུག་པ་དང་སློང་ཕོར་ཐོགས། བཙུན་མོ་རྣམས་ཐོང་ལ། འདི་ནས་ལྷོ་ཕྱོགས་ཀྱི་རྒྱུད་ན། ཨོ་ཊ་པུ་རི་
ཁུར་བའི་གྲོང་ཁྱེར་ཅེས་པ་ན། རྡོ་རྗེ་རྣལ་འབྱོར་མ་སྨད་འཚོང་མའི་ཆ་བྱད་འཛིན་པ་ཅིག་ཡོད་པས་དེའི་དྲུང་དུ་སོང་ལ། ཉིན་མོ་ཞིང་། ཞིང་ལས་གྱིས། ནང་ནུབ་རྐང་པ་འཁྲུད་པ་དང་སྐུ་མཉེ་ལ་སོགས་པ་གྱིས། དེར་ཆང་ཉོར་འོངས་པ་དང་ཉལ་པོ་ལ་འོངས་པའི་སྐྱེས་པ་
ཀུན་གྱི་རྐང་པ་བཀྲུ་བ་ལ་སོགས་པ་གྱིས། ནུབ་མོ་ཞིང་བསྒྲུབ་པ་གྱིས། དེ་ལྟར་བྱས་ན་ལོ་བཅུ་གཉིས་ན་བུད་མེད་སྟོང་ཕྲག་བཅུ་གཉིས་དང་བཅས་པ་གྲུབ་པ་ཐོབ་པར་འགྱུར་རོ། །ཞེས་གསུངས་ནས་བཏང་ངོ་། །བློན་པོ་ལ་བྲམ་ཟེའི་རིགས་ཀྱི་རྣམ་རྟོག་སྤང་བའི་ཆེད་དུ་
1-1-19b

གཞོན་ནུའི་གྲོང་ཁྱེར་དེ་ཉིད་ཀྱི་ཆང་འཚོང་མ་ཅིག་གི་དྲུང་དུ་བཏང་སྟེ། དེ་ཡང་ཉིན་ཞིང་། ཞིང་འཆུ་བ་དང་། ཆང་གིས་བཟི་བའི་སྐྱུགས་པ་དང་གོས་ལ་ཟོས་པའི་རྩིགས་མ་ཀུན་ཕྱོགས་ལ་ནུབ་མོ་སྒྲུབ་པ་གྱིས། དེ་ལྟ་ན་ལོ་བཅུ་གཉིས་ན་གྲུབ་པ་ཐོབ་ནས་ཡུལ་ཁམས་དེ་སྨིན་པར་
བྱས། མཐར་མི་ཕྱུགས་ཐམས་ཅད་མཁའ་སྤྱོད་ཀྱི་དངོས་གྲུབ་འཐོབ་བོ། །ཞེས་གསུངས་ནས་མི་སྣང་བར་གྱུར། དེ་ནས་རྒྱལ་པོས་སྲིད་བགོས། བཙུན་མོའི་འཁོར་སྟོང་ཕྲག་བཅུ་གཉིས་ཀྱི་ནང་ནས་ཐོན་ཏེ། ཁུ་བའི་གྲོང་ཁྱེར་དུ་སོང་ནས་སྔར་གྱི་ལྟར་
བྱས་པས། ནུབ་ཅིག་མོའི་དྲུང་དུ་ཉལ་པོ་ལ་འོངས་པའི་སྐྱེས་པ་ཅིག་གིས་ཕྱི་རོལ་དུ་ཕྱིན་ཙམ་ན། སྒོ་དྲུང་ན། ཁོལ་པོའི་སྤྱིལ་པོ་ལ་མེ་འབར་བ་མཐོང་ནས། བལྟས་པས་གཏུམ་མོའི་འོད་དུ་འདུག་ནས། མི་དེ་ན་རེ་བདག་ཅག་གིས་མ་ལེགས་པ་བྱས་པ་བཟོད་པར་
གསོལ་ཁྱེད་དངོས་གྲུབ་ཐོབ་ཙམ་ན། བདག་རྗེས་སུ་བཟུང་བར་ཞུ་ཟེར་རོ། །དེར་བཅུ་གཉིས་ལོན་ནས་ང་ཚོགས་འཁོར་བྱེད་པས་བུད་མེད་ཐམས་ཅད་འདིར་ཤོག་ཅིག་ཟེར་ཏེ། ཌ་མ་རུ་དཀྲོལ་བས། བུད་མེད་སྟོང་ཕྲག་བཅུ་བཞི་པོ་འདུས། ནུབ་མོ་ཚོགས་
འཁོར་བྱས། ཐོ་རངས་གྲུབ་པ་ཐོབ་སྟེ། མཁའ་སྤྱོད་དུ་གཤེགས་སོ། །བློན་པོས་ཀྱང་། སྔར་བཞིན་བྱས་པས་ཇི་ལྟར་གསུང་བ་བཞིན་གྲུབ་པ་ཐོབ་སྟེ། སློབ་དཔོན་ཆེན་པོ་ཌེྃ་གི་པ་ཞེས་གྲགས་གོ(སོ)། །
༈ ཌཱ་ཀི་མ་ཀུན་ཏུ་བཟང་མོ།
བཀའ་བབས་གསུམ་པའི་སུ་མ་ཏི་ཀུན་ཏུ་བཟང་མོ་ཞེས་བྱ་བ་དགོངས་
པ་སངས་རྒྱས་དང་མཉམ་པའི་ཌཱ་ཀི་མ་དེས། སློབ་དཔོན་ཐང་ལོ་པ་ཞེས་བྱ་བ། རླུང་ལས་སུ་རུང་བས་ཐང་ཤིང་ཉག་མ་རེའི་སྟེང་ན་དགོངས་པ་མཛད་པ་ཅིག་ལ། དེས་སློབ་དཔོན་ཀརྣ་རི་པ་ཞེས་བྱ་བ་སིང་ག་གླིང་དུ་རྫུས་ཏེ་འཁྲུངས་པ། སློབ་དཔོན་འཕགས་པ་ཀླུ་གྲུབ་(སྒྲུབ་)
1-1-20a

ལ་སོགས་པའི་དམ་པ་མང་པོས་རྗེས་སུ་བཟུང་བས། རྒྱུད་སྡེ་དུ་མ་ནས་ལུང་བསྟན་པ། ཨརྱ་དེ་བ་ཞེས་ཡོངས་སུ་གྲགས་པའི་རྣལ་འབྱོར་པ་ཆེན་པོ་དངོས་གྲུབ་བརྙེས་པ་དེ་ལ་གནས་པ་ཡིན་ནོ། །བཀའ་བབས་བཞི་པའི་ཨིནྡྲ་བྷོ་དྷི་ནི་ལ་བ་པ་དང་གཅིག་ཏུ་བཤད་པ། གྲུབ་པ་
མ་ཐོབ་པ་དང་ཐོབ་པའི་ཁྱད་པར་དུ་གཞེད་(བཞེད་)པའི་ལུགས་གོང་དུ་བསྟན་པ་དེ་ཉིད་ཡིན་པར་མངོན་ལ། ཐ་དད་དུ་བཞེད་པ་ལྟར་ན། ལ་བ་པའི་སློབ་མ་ཨིནྟྲ་བྷོ་དྷི་ཆུང་ངུར་གྲགས་པ་དེ་ཉིད་ཡིན་ནོ། །དེ་ཡན་ཆད་ཀྱི་རྒྱུ་མཚན་གོང་དུ་བསྟན་ཟིན་པ་བཞིན་ཡིན་ནོ། །
༈ ཏཻ་ལོ་ཤེས་རབ་བཟང་པོའི་རྣམ་ཐར།
ན་མཿ ཤྲཱི་ཏཱེ་ལོ་པ་ཡཱེ། གྲུབ་ཐོབ་བཀའ་བཞིའི་བཀའ་བབས་ཀྱི་བཅུད་འདུས་པ་སློབ་དཔོན་ཆེན་པོ་ཏཱཻ་(ཏཻ)ལོ་པ་ཡིན་ཏེ། ཁོང་གི་ཡུལ་རྒྱ་གར་ཤར་ཕྱོགས་ཟ་ཧོར་གྱི་གྲོང་ཁྱེར་ཛྷཿ ཀོ། ཡབ་བྲམ་ཟེ་གསལ་བ་ཡུམ་བྲམ་ཟེ་གསལ་ལྡན་མ། སྲས་མེད་པར་གྱུར་པ་ལ།
ཕྱི་ནང་གི་རྟེན་ཐམས་ཅད་ལ་མཆོད་པ་ཕུལ་ནས་གསོལ་བ་བཏབ་པས། སྲས་ཅིག་བཙས་པར་གྱུར་ཏེ། དེའི་ཚེ་རྒྱ་གར་ཤར་ཕྱོགས་ཐམས་ཅད་འོད་ཀྱིས་སྣང་བ་བྱུང་ནས། དེ་ལྟར་བསྙད་ནས་བྲམ་ཟེ་མཚན་མཁན་ལ་མཚན་བསྟན་པས། དེས་སྨྲས་པ། ཁྱེའུ་འདི་ཡི་
མཚན་བལྟས་ན། ལྷ་འམ་ཀླུ་འམ་གནོད་སྦྱིན་ནམ། སངས་རྒྱས་ཉིད་དམ་མི་ཤེས་ཀྱིས། མཆོག་གྱུར་འདི་ནི་གཅེས་པར་སྐྱོངས། འོད་ཀྱིས་ས་ཕྱོགས་ཐམས་ཅད་ཁྱབ་པ་བྱུང་ན། བྲམ་ཟེ་གསལ་འོད་བྱ་བར་མིང་ཐོགས་ཤིག །ཟེར་ནས་དེ་ལྟར་བཏགས་སོ། །དེ་གཅེས་པར་སྐྱོང་བའི་ཚེ་
དུས་རེ་ཤིག་ན་ཡབ་ཕྱིར་ཐལ་ནས། ཡུམ་སྲས་གཉིས་ཡོད་པ་དང་། གྲིབ་མ་ཧྲིབ་པ་ཅིག་(ཞིག་)བྱུང་ནས་བལྟས་པས་བུད་མེད་མི་སྡུག་པའི་མཚན་མ་སུམ་ཅུ་རྩ་གཉིས་དང་ལྡན་པ་ཅིག་(ཞིག་)ཕྱུང་ནས། གཅེས་པར་བསྐྱངས་ཀྱང་མི་འཆི་བའི། །ས་ཕྱོགས་དེ་ནི་ཡོད་མ་ཡིན། །རབ་ཏུ་བྱུང་། རིག་པ་སློབས། 
1-1-20b

ཟེར་ནས་སོང་། ཆེར་སྐྱེས་པ་དང་། རབ་ཏུ་བྱུང་། མཚན་ཤེས་རབ་བཟང་པོར་བཏགས། རིག་པའི་གནས་ལ་སྦྱངས་པའི་མཁས་པ་ཆེན་པོར་གྱུར། དེ་ཙམ་ན་སྔར་གྱི་ཌ་ཀི་མ་མི་སྡུག་པའི་མཚན་ཅན་དེ་བྱུང་ནས། བྱིན་གྱིས་བརླབས། ལུང་བསྟན་ནས་གྲུབ་པ་ཐོབ་པའི་བླ་མ་རྣམས་ལ་
རྗེས་སུ་བསྟན་པ་ཞུས། སོ་མ་པུ་རིའི་གཙུག་ལག་ཁང་དུ་ཞབས་ལ་ལྕགས་སྒྲོག་གསོལ་ནས་ལོ་བཅུ་གཉིས་སྒྲུབ་པ་མཛད། ཐུན་མོང་གི་དངོས་གྲུབ་ཡི་དམ་གྱི་ལྷ་ཞལ་གཟིགས་འབྱུང་བའི་སྐྱེ་མཆེད་རགས་པ་ལ་དབང་ཐོབ། སྤྱོད་པ་ལ་གཤེགས་པར་དགོངས་
ནས། མ་དང་མཁན་པོ་ལ་ཉའི་རྣམ་ཤེས་ལ་སྤར་བའི་རྫུ་འཕྲུལ་བསྟན་པས་དྲོད་ཐོབ་པར་ཤེས་ཏེ་ཅི་བདེ་བར་སོང་གསུང་། གུ་རུ་ན་གརྫུ་ན་འཚོལ་དུ་ཕྱིན་པས་ལྷོ་ཕྱོགས་ཀྱི་རྒྱུད་ས་ལ་བཻ་ར་བ། འཇིགས་བྱེད་གཞད་(བཞད་)པའི་དུར་ཁྲོད་ན། སློབ་དཔོན་བརྟུལ་ཞུགས་སྤྱོད་པ་མ་
ཏྃ་ཀིའི་སྤྱིལ་པོ་ན་བཞུགས་པ་དང་འབྱལ་བའི་ཞལ་སྔ་ནས། གུ་རུ་དྲི་ཟའི་རྒྱལ་པོ་ལ་ཆོས་སྟོན་དུ་གཤེགས། སྐྱེས་བུ་ཁྱོད་རྗེས་སུ་འཛིན་པ་ལ་ཁོ་བོ་བཏང་བ་ཡིན་ཟེར། མཎྜལ་ཕུལ། བླ་མར་བཟུང་བས། གསང་བ་འདུས་པའི་དབང་བསྐུར་ཏེ། གདམས་པ་
བྱིན་ནས། སེམས་ཀྱི་དེ་ཁོ་ན་ཉིད་འདི་ལྟར་ཡིན་པས། དེ་ཁོ་ན་ཉིད་ཀྱི་དོན་ལ་དུས་རྟག་ཏུ་མ་བརྗེད་པར་གྱིས་ཅིག་གསུང་། དེར་བླ་མས་ལུང་བསྟན་ཏེ། ཤར་ཕྱོགས་བྷྃ་ག་ལའི་རྒྱུད་ན། ཧ་རི་ཀེ་ལ་ཞེས་བྱ་བ་ཟ་ཧོར་གྱི་གྲོང་ཁྱེར་དེ་ན། སྤྲུལ་པའི་རྒྱལ་པོ་ཨུད་མ་སྐྱེས་པ་ཞེས་པས་
བྱིན་གྱིས་བརླབས་པའི་ས་ཕྱོགས་ཡིན་པས་རང་བཞིན་གྱིས་གྲུབ་ཐག་ཉེ་ལམ་བགྲོད་མྱུར་བ་ཡོད། དེ་ན་པཉྩ་པ་ན་ཞེས་བྱ་བའི་ཚོང་འདུས་ན་སྨད་འཚོང་མ་དཔོན་གཡོག་མང་པོ་ཡོད་པས་དེའི་གཡོག་གྱིས་ལ་རྟོགས་པ་སྦྱོངས་ཤིག་ཅེས་ལུང་བསྟན། དེར་བྱོན་སྨད་འཚོང་
1-1-21a

མའི་གཡོག་བྱས་པས་མོས་ཏིལ་རྡུང་དུ་བཅུག་སྟེ། སློབ་དཔོན་གྱིས་ཏིལ་རྡུང་ཞིང་ཉམས་སུ་བླངས་པས། ཏིལ་ལ་མར་གནས་ཀྱང་རྡུང་བ་དང་། བཙིར་བ་དང་བྱས་ན་མངོན་དུ་མི་འགྱུར། དེ་བཞིན་དུ་རང་སེམས་སངས་རྒྱས་སུ་གནས་ཀྱང་ཉམས་སུ་མ་བླངས་ན་མངོན་དུ་མི་
འགྱུར་བར་དགོངས་ཏེ་ཉམས་སུ་བླངས་པས། དེ་ཁོ་ན་ཉིད་མངོན་དུ་གྱུར་པའི་རྟོགས་པ་སྐྱེ་སྟེ། རྡོ་རྗེ་འཆང་གིས་མངོན་དུ་དབང་བསྐུར་བྱིན་གྱིས་བརླབས་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་བོ། །དེ་ཙམ་ན། གྲོང་ཁྱེར་པ་རྣམས་ལ་མཐོང་ཚུལ་
ཐ་དད་བྱུང་སྟེ། ལ་ལས་མེ་དཔུང་འབར་བ་ཅིག་ལ་མར་མེ་བཅུ་བཞིས་བསྐོར་བ་མཐོང་། འགའ་ཞིག་གིས་འོད་ཕུང་ཅིག་གི་ནང་ན་དགེ་སློང་ཅིག་མཉམ་གཞག་ལ་བཞུགས་པ་མཐོང་། ལ་ལས་ནི་རྣལ་འབྱོར་པ་དུར་ཁྲོད་ཀྱི་ཆས་ཀྱིས་བརྒྱན་པ་ཞིག་ལ་བུ་
མོ་མང་པོས་ཕྱག་དང་བསྐོར་བ་བྱེད་པར་མཐོང་ནས། དྷ་རི་མོ་ལ་བསྙད་དེ། བལྟར་ཕྱིན་པས། མདུན་གྱི་ནམ་མཁའ་ལ་འོད་ཕུང་གི་དཀྱིལ་ན། རྒྱལ་པོ་རོལ་པའི་སྟབས་ཀྱིས་བཞུགས་ནས། གཏུན་ཤིང་ལྷུང་ཐབས་སུ་སྐྱུར་ཞིང་ཏིལ་གྲུབ་མཐོང་བ་ལས། དྷ་
ར་མི་འགྱོད་པའི་མེས་གདུངས་ཏེ། ཕྱག་དང་བསྐོར་བ་དང་། མཎྜལ་སྔོན་དུ་འགྲོ་བས་ཞབས་སྤྱི་བོར་བླངས། རྗེ་བཙུན་ཁྱེད་གྲུབ་ཐོབ་ཏུ་འདུག་པ་ལ་ངོ་མ་ཤེས་ན། སྔན་ཆད་སྡིག་པ་བསགས་པ་བཟོད་པར་བཞེས་འཚལ། དེང་ཕྱིན་ཆད་རྗེས་སུ་བཟུང་དུ་
གསོལ། ཞེས་གསོལ་བ་བཏབ་པས། རྗེའི་ཞལ་ནས། ཁྱོད་ཀྱིས་གང་ཟག་དམ་པར་ཤེས་བཞིན་དུ་ལས་བཅོལ་བ་མ་ཡིན་པས་ཉེས་པ་མེད་དེ། ངས་སྤྱོད་ལམ་དེ་ལ་བརྟེན་ནས་ལམ་སྦྱངས་པ་ཡིན་པས། ད་ལྟ་ངའི་རྒྱུད་ལ་སྐྱེས་པའི་ཆོས་ཐམས་ཅད་ཀྱི་རང་བཞིན་
1-1-21b

སྐྱེ་བ་མེད་པ་གཉུག་མ་ལྷན་ཅིག་སྐྱེས་པའི་ཡེ་ཤེས་འདི་ཁྱོད་ཀྱི་སྙིང་ལ་ཞུགས་པར་གྱུར་ཅིག གསུང་ཞིང་མེ་ཏོག་སྤྱི་བོར་བཞག་ཙམ་གྱིས་དེ་ཉིད་དུ་གྲོལ། བྱིན་གྱིས་བརླབས་ཀྱིས་ལམ་ལ་སྣང་བ་ཐོབ་པའི་རྣལ་འབྱོར་མར་གྱུར་ཏོ། །དུས་དེར་རྣལ་འབྱོར་པ་
ཅིག་གིས་དྷ་རི་མོ་གྲོལ་བར་བྱས་སོ་ཞེས་ཐོས་ནས། རྒྱལ་པོ་གླང་པོ་ལ་ཞོན་པ་འཁོར་འབུམ་ཕྲག་མང་པོ་དང་ཐབས་ཅིག་ཏུ་ལྟ་བ་ལ་ལྷགས་པ་ལ། རྣལ་འབྱོར་པ་དང་། དྷ་རི་མོ། ཚོང་དུས་ཀྱི་སྲང་མདོར་ཤིང་ཏ་ལ་བདུན་སྲིད་དུ་ནམ་མཁའ་ལ་འཕགས་ཏེ་
བཞུགས་ནས། ཏིལ་མར་གྱི་དཔེས་མཚོན་པའི་ཟབ་མོའི་ཆོས་གསུངས་པས་རྒྱལ་པོ་འཁོར་བཅས་ཐམས་ཅད་དད་དེ། ཉམས་སུ་བླངས་པས་མཁའ་སྤྱོད་གྲུབ་སྟེ། རེ་ཤིག་ཡུལ་དེ་སྟོངས་པར་གྱུར་ཏོ། །དེ་ཙམ་ན་ལྷོ་ཕྱོགས་ཀྱི་རྒྱལ་པོ་ཙནྜ་དི་པ་བྱ་བ། མ་ལ་གུས་ཤིང་
ངག་མི་གཅོག་པ་ཞིག་ཡོད་པ་དེས། མའི་དོན་དུ་ཕྱི་ནང་གི་རྣལ་འབྱོར་པ་དང་པཎ་ཊི་(པཎྜི་)ཏ་ཐམས་ཅད་བསོགས་ནས་ཚོགས་ཀྱི་འཁོར་ལོ་བྱ་བར་དྲིལ་བསྒྲགས། ཕོ་ཉ་བ་དང་ཐམས་ཅད་འདུས། དེར་པཎ་ཊི་(པཎྜི་)ཏའ་མཁས་པ་དང་། རྣལ་འབྱོར་པའི་ནུས་པ་ཆེ་བ་ཅིག་གིས་
གཙོ་བྱེད་པ་ཡིན་པ་ལ། ཁོང་རྣམས་གང་གིས་བྱེད་མ་འཆམ་པའི་ཚེ། དེར་བུད་མེད་མི་སྡུག་པའི་མཚན་མ་ཅན་ཞིག་འོངས་ནས། ཁྱེད་རྣམས་ཀྱི་ནང་ནས་ཚོགས་དཔོན་སུས་བྱེད་ཟེར། དྲག་པ་ཅིག་གིས་འགྲན་ཟླ་མེད་པ་ངས་བྱེད་བྱས་པས། ཁྱེད་ཀྱིས་མི་འོང་ཟེར།
ད་ལྟ་ང་ལས་དྲག་པ་སུ་ཡིན་བྱས་པས། མོ་ན་རེ། ངའི་མིང་པོ་འགྲན་ཟླ་དང་བྲལ་བ་ཡིན་ཟེར། གང་ན་ཡོད་བྱས་པས། ཛཱ་ལན་དྷ་ར་ན་ཤིང་ཤ་བའི་སྡོང་པོ་ཅིག་གི་ཡལ་ག་ལ་རོའི་རྐང་པའི་ཐེའུ་ཆུང་གཉིས་རྟ་རྔ་ཅིག་གིས་བཏགས། དེའི་ལག་པའི་ཐེའི་ཆུང་
1-1-22a

གཉིས་ལ་རེ་མོས་འཇུས་ནས་ནམ་མཁའ་ལ་གར་བྱེད་ཅིང་སྣང་གིས་དེར་ཞུས་ཟེར། རྒྱལ་པོ་ན་རེ། མི་སྲིད་པའི་གཏམ་གསུམ་[བྱུང་། བདེན་རྫུན་ལྟོས་ལ་བདེན་]ན་ནུས་ལྡན་ཅིག་ཡོད་པར་འདུག་པས་སྤྱན་དྲངས་སོ་ཟེར། སྤྱན་དྲངས་ནས་ཁྲི་ལ་མཉམ་པོར་བཞུགས། ཐོག་མར་
སྒྲ་ཚད་ལ་བརྩད་པས་ཕམ་པར་བྱས། དེ་ནས་ནུས་པ་འགྲན་པའི་ཕྱིར། གཅིག་གིས་མཁའ་ལ་དཀྱིལ་འཁོར་བྲིས་པ་ཅིག་གིས་རླུང་གིས་བཤིག་པ་དང་། སེང་གེ་ལ་ཞོན་ནས་ནམ་མཁར་བང་གཏོང་བ་དང་། དུར་ཁྲོད་ནས་རོ་དགུག་པ་དང་། དེ་འདོད་ཡོན་དུ་བྱིན་གྱིས་རླབས་(བརླབས་)
པ་དང་། ཕྱིར་བཤིག་ནས་གཏོང་བ་དང་། དེ་རྣམས་རེ་མོས་བྱས་པས། ཏེ་ལོ་པས་ཁོང་གི་རྣམས་མེད་པར་བྱས། ཏེ་ལོ་པས་སྤྲུལ་པ་རྣམས་ཁོང་གིས་གཞིག་པར་མ་ནུས་ནས། སླར་ཡང་། ཏེ་ལོ་པས་ཉི་ཟླ་ཐང་ལ་ཕབ་པའི་སྟེང་དུ། རང་གི་ལུས་ཕྱིར་བཟློག་ནས་བ་སྤུའི་བུ་ག་
རེ་རེ་ལ་དཀྱིལ་འཁོར་དཔག་ཏུ་མེད་པ་སྤྲུལ། དཀྱིལ་འཁོར་གཅིག་ལ་དཀྱིལ་འཁོར་དུ་མར་སྣང་བ་བསྟན་པས་ཨེ་མ་འདི་ལྟ་བུའི་རྫུ་འཕྲུལ་ཅི་ལས་བྱུང་ཞེས་འགྲན་པར་མ་ནུས་པ་ལ། གསུངས་པ། བདག་ལུས་ཀྱེའི་རྡོ་རྗེ་སྟེ། །ངག་ནི་མ་ཧཱ་མ་ཡ་ཡིན། །སེམས་
ནི་བདེ་མཆོག་འཁོར་ལོའོ། །ཕུང་ཁམས་སྐྱེ་མཆེད་གསང་བ་འདུས། །ཡན་ལག་ནག་པོ་དགྲ་རྒྱུད་ཉིད། །ཉིང་ལག་རྡོ་རྗེ་འཇིགས་བྱེད་ལ། །བ་སྤུ་སངས་རྒྱས་ཐམས་ཅད་དོ། །ཅེས་སོ། །བླ་མ་ལ་སོགས་པ་ཇི་ལྟ་བུ་ཡིན་ཞུས་པས། ས་རབ་དགའ་བ་ངས་ཀྱང་ཐོབ། །
སྤྲུལ་པ་བྱེ་བ་ཕྲག་བརྒྱ་ཡིས། །ངས་ནི་ཞིང་ཁམས་བརྒྱར་ཡང་ཕྱིན། །ཀླུ་སྒྲུབ་ཨརྱ་དེ་བ་དང་། །སངས་རྒྱས་དང་ཡང་ང་གཏམ་བྱས། །ངས་ནི་སངས་རྒྱས་སྟོང་ཡང་མཐོང་། །ཞེས་གསུངས་ནས་ཕྱི་རོལ་པ་རྣམས་ཀྱི་ནུས་པ་བཟློག་སྟེ། ཚོགས་ཀྱི་འཁོར་ལོའི་གཙོ་བོ་མཛད་ཅིང་འགྲན་
1-1-22b

ཟླ་དང་བྲལ་བར་གྱུར་ཏོ། །འདིས་མི་ཡུལ་དུ་འགྲོ་དོན་མཛད་ནས་མཐར་ལུས་དེ་ཉིད་ཀྱིས་མཁའ་སྤྱོད་དུ་གཤེགས་སོ། །སློབ་དཔོན་ཆེན་པོ་ཏེ་ལོ་པའི་ལོ་རྒྱུས་རྫོགསྷོ།། །།
༈ དཔལ་ནཱ་རོ་པའི་རྣམ་ཐར།
ན་མཿ ཤྲཱི་ནཱ་རོ་པ་ཡཱེ། སློབ་དཔོན་ཆེན་པོ་ན་རོ་པའི་ཡུལ་ཁ་ཆེ། རིགས་བྲམ་ཟེའི་རིགས་ལ་
དཀར་ནག་བརྒྱད་ཡོད་པའི་ནང་ནས་བཟང་ཤོས་ན་རོ་ཏ་པ། ཡབ་ཞི་བའི་གོ་ཆ། ཡུམ་དཔལ་གྱི་བློ་གྲོས་མ། སྲས་ཀུན་ཏུ་བཟང་པོ། དེ་ཡང་དང་པོར་སྒྲ་ཚད་ལ་སོགས་པའི་རིག་པའི་གནས་ལ་སྦྱངས་པའི་མཁས་པར་གྱུར། ཕྱི་ནས་མཁན་པོ་སངས་རྒྱས་བསྐྱངས་ལ་རབ་ཏུ་བྱུང་།
མཚན་སྙན་གྲགས་བཟང་པོར་བཏགས། དེ་ནས་སྡེ་སྣོད་གསུམ་དང་རྒྱུད་སྡེ་བཞི་ལ་སྦྱངས་ཤིང་རིག་པའི་གནས་ཐམས་ཅད་ལ་མཁས་པའི་ཡོངས་སུ་རྫོགས་ཀྱི་པཎྜི་ཏར་གྱུར་ཏེ། དེའི་ཚེ་དཔལ་ནཱ་ལེན་ཏྲ་ན་མཁས་པའི་སྒོ་དྲུག་ཡོད་པའི་བྱང་སྒོ་བར་གྲགས་སོ། །དེར་ཐོས་པས་
ཉན་བཤད་ཀྱིས་འགྲོ་བའི་དོན་མཛད་ཅིང་བཞུགས་པའི་ཚེ། བདག་ཤེས་བྱ་རིག་པའི་གནས་ལྔ་ལ་མཁས་ཀྱང་། རང་གི་སེམས་པ་འཇོ་བའི་ནུ་མ་འཐེན་པའི་ཚོད་ཙམ་དུའང་མི་གནས་པས་སེམས་ལ་དབང་ཐོབ་པའི་གདམས་པ་ཅིག་བཙལ་དགོས་པར་འདུག་སྙམ་སྟེ།
གནས་དབེན་པར་དཔལ་འཁོར་ལོ་སྡོམ་པའི་ཉེ་སྙིང་ཡི་གེ་བདུན་པ་ལ་བསྙེན་པ་འབུམ་ཕྲག་བདུན་བྱས་པས་ས་གཡོ་བ་ལ་སོགས་པའི་ལྟས་བྱུང་ནས། ཤར་ཕྱོགས་སུ་ཏེ་ལོ་པའི་རིགས་ཡིན་ནོ། །ཞེས་མཁའ་འགྲོ་མས་ལུང་བསྟན་ཏོ། །དེར་རང་གི་གྲོགས་པོ་ལ་སྦྲན་པས་
རིན་ཆེན་རྡོ་རྗེ་ན་རེ། ཁོ་བོ་ཡོངས་སུ་རྫོགས་པའི་པཎྜི་ཆེན་པོར་གྱུར་ནས། ཀུ་སུ་ལུའི་རྐང་པ་ལ་ཕྱག་མི་འཚལ་ལོ་ཟེར་ནས་འགྲོར་མ་ཉན་ནོ། །དེར་སློབ་དཔོན་ཉིད་ཀྱིས་རྒྱ་གར་ཤར་ཕྱོགས་སུ་བྱོན་[ཏེ། དེ་ན་ཛྭ་ར་བི་ཧ་ར་ཞེས་བྱ་བ་དེར་བྱོན་ཏེ་མི་ཐམས་ཅད་ལ་]ཏེ་ལོ་པ་ག་ན་ཡོད་དྲིས་པས། ལ་ལ་ན་རེ་རབ་ཏུ་བྱུང་བའི་
1-1-23a

ལ་ལ་ན་རེ་རྣལ་འབྱོར་པའི་ཆ་ལུགས་སུ་བཞུགས་ཟེར་ཏེ་རེས་འདིར་འོང་། རེས་བུ་ལ་བི་ཧ་རའི་གཙུག་ལག་ཁང་དུ་འགྲོ་བ་ཡིན་ཟེར། ཕྱོགས་ཀུན་ཏུ་དྲིས་ཤིང་བཙལ་བས། ནགས་དེའི་ནང་ན་རྔོན་པ་ཅིག་འདུག་གིས་དྲིས་ཟེར། རྔོན་པ་ལ་དྲིས་པས། རི་དགས་
བཤོར་རོགས་གྱིས་དང་བསྟན་གྱིས་ཟེར། མ་བྱས་པས། དེ་མི་སྣང་བར་གྱུར། ནགས་ཚང་ཚིང་ལ་ལམ་སྟོར། ཉམ་ཐག །ཡང་གཅིག་ཏུ་དྲིས་པས། གྲོང་འདིའི་རྒྱབ་ན་ཡོད་ཀྱི་ཟེར། ཕྱིན་ཙམ་ན། མི་གཅིག་གིས་གཅིག་གི་རྒྱུ་མ་འདྲེན་པ་ཞིག་སྣང་ནས། ཏེ་ལོ་པ་
མཐོང་ངམ་བྱས་པས། འདི་འདྲེན་རོགས་གྱིས་དང་བསྟན་གྱིས་ཟེར། དེ་མ་ནུས་པས་ཅི་ཡང་མེད་པའི་ཐང་ཆེན་པོ་ཅིག་གི་དཀྱིལ་དུ་ཆོད་དུས་མེད་པར་གྱུར། དེ་ལ་སོགས་པའི་དཀའ་ཕྲན་བརྒྱ་བཅུ་གོ་ནས་བཙལ་ཡང་། བླ་མའི་སྤྲུལ་པ་རྣམ་པ་མང་པོར་བསྟན་པ་ངོ་མ་ཤེས་
མ་རྙེད་དོ། །ལན་ཅིག་རིམས་ནད་འཕྲོག་པའི་ལྷ་ཁང་ན་ཐམས་ཅད་ཆོས་སྟོན་ཟ་བའི་ཚེ། དགེ་འདུན་གྱི་གྲལ་བྱེད་པའི་ཕྱི་རོལ་ན་མེ་ཕུང་ཡོད་པའི་དྲུང་དུ། མི་སྔོ་བ། རིད་པ་ཉི་ལྷགས་ཀྱིས་ཁྱེར་བ་འདོམས་བཀྲིས་ཀྱི་རས་ཙམ་ལས་གོས་མེད་པ་ཞིག་བྱུང་སྟེ། ཉ་
རློན་པ་མ་ཤི་བ་ཁ་ཅིག་ཁྱེར་ཏེ་མེ་གསེབ་ཏུ་བཅུག་ཅིང་བསྲེགས་སོ། །དེ་ནཱ་རོ་པས་མཐོང་སྟེ། དེར་ཕྱིན་ནས་འདི་ལྟར་མ་བྱེད་སྨྲས་པས། ཉ་བསྲེགས་པ་ཆུར་བཅུག་སྟེ་ཕུས་བཏབ་པས་ཉ་རྣམས་མ་ཤི་བར་སོས་སོ། །དེར་འདི་ནུས་པ་ཐོབ་པ་ཞིག་འདུག་པས་ཏེ་ལོ་པ་
ཡིན་ནམ་སྙམ་པ་དང་། ནཱ་རོ་པ་ཡིན་ནོ་ཞེས་ཟེར་རོ། །དེས་གཅེར་འགྲེང་བྱེད་པ་སྨྱོན་པ་དང་འདྲ་བར་མཐོང་བས་འདི་ཏེ་ལོ་པ་མ་ཡིན་ནམ་སྙམ་པ་དང་དེ་མཁྱེན་ཏེ་མིན་མིན་གསུང་ངོ་། །རེས་མཉམ་པར་འདོག་པ་དང་འདྲ་བར་འདུག་པས་ཏཱེེ་ལོ་པ་ཡིན་ནམ་སྙམ་
1-1-23b

པ་ལ་དེ་མཁྱེན་ཏེ། ཡིན་ཡིན་ཅེས་གསུངས་པས་མངོན་ཤེས་མངའ་བར་ཤེས་ཏེ། ཕྱི་བཞིན་དུ་འབྲངས་པས། དགེ་འདུན་གྱི་གཙུག་ལག་ཁང་གི་སྟེང་གི་སུམ་ཐོག་དུ་(ཏུ་)ཕྱིན་ཏེ། སྙིང་སྟོབས་དང་ལྡན་པ་སུས་འདི་ན་མར་འཆོང་ནུས་གསུང་པ་ལ་ནཱ་རོ་པས་ཚམ་ཚོམ་མེད་པར་
མཆོངས་པས། མི་རྣམས་འདི་བསྙོ་བ་ཡིན་ནམ་ཟེར་ཏེ་འཛིན་དུ་བྱུང་ཡང་མ་ཟིན་པར་གཡང་ལ་ལྷུང་བས། ལུས་འདམ་བུ་བཅོམ་པ་ལྟར་གྱུར་ནས་སྡུག་བསྔལ་བའི་ཚེ། ཏེ་ལོ་པ་བྱོན་ནས་སྡུག་མི་བསྔལ་ལམ། གསུང་། སྡུག་བསྔལ་ལོ་ཞུས་པས། ཕྱག་གིས་རེག་
ནས། རོ་ག་ན་ཧི། ཕོ་ག་ན་ཧི། གསུང་བས་སྡུག་བསྔལ་ལས་གྲོལ་ལོ། །ཡང་ཕྱི་བཞིན་དུ་འབྲངས་པས། སྲིན་བུའི་རིགས་སོ་གདུག་པ་ཅན་མང་པོས་གང་བའི་ཆུ་ཞིག་གི་རྩར་བྱོན་ནས། སྐྱེས་བུ་སྙིང་སྟོབས་དང་ལྡན་པ་དག་འདི་ལ་ཟམ་པ་བྱེད་ནུས་སམ་གསུང་། ནཱ་རོ་པས་
ཟམ་པ་བྱས་པའི་སྟེང་ནས་སློབ་དཔོན་དལ་བུས་ནེམ་ནེམ་གཤེགས། ནཱ་རོ་པའི་གསུས་པ་ལ་སྲིན་བུས་སོ་བཏབ་སྟེ། མི་བཟོད་བར་གྱུར་ཀྱང་། བསལ་གྱིས་མ་ལང་ནས་སྡུག་བསྔལ་བའི་ཚེ། མི་ནའམ་གསུང་། སྡུག་བསྔལ་ལོ་ཞུས་པས། སྔར་བཞིན་གསུང་པས་
གྲོལ་ལ། །ཡང་ཕྱི་བཞིན་འབྲངས་པ་དང་། དགེ་འདུན་གྱི་ཚང་མང་ན། ཙནྡྣ་གྱི་མེ་དམར་ཧྲུྃ་མེ་འདུག་པའི་རྩར་བཞུགས་ནས། སྙིང་སྟོབས་དང་ལྡན་པ་སུས་འདིའི་ནང་དུ་འཇུག་ནུས་སམ་གསུང་། ནཱ་རོ་པས་ཞུགས་པས། ལུས་ཆུ་བུར་ཐུག་བྱུང་། མ་བཟོད་པས་ལྡོག་པར་
བརྩམས་པས། བླ་མས་ཕར་ཕུལ་བས་དེ་བས་ཀྱང་ཐལ་བ་ཙམ་དུ་གྱུར། སྡུག་བསྔལ་བར་མ་གྱུར་ཏམ་གསུང་། སྡུག་བསྔལ་ལོ་ཞུས་པས། སྔར་བཞིན་གསུང་བས་གྲོལ་ལོ། །ཡང་ཕྱི་བཞིན་འབྲང་པས། མི་ཞིག་གིས་རྣལ་འབྱོར་པ་ལ་རས་ཀྱི་སྟོད་གཡོགས་ཤིག་ཕུལ་
1-1-24a

ཏེ་ལྕགས་ཀྱི་ཐུར་མས་གཟེར་ཏེ་བཏང་བས། དེས་ཐུར་མ་བཏོན་ཏེ་ནཱ་རོ་པའི་གསང་གནས་ཀྱི་བུ་གར་བཅུག་སྟེ་གར་སོང་ཆ་མེད་པར་སོང་། དེར་གསང་གནས་སྐྲངས་ཏེ། འགྲོ་མི་ཤེས་པར་ན་བ་ལ། ཏཱེ་ལོ་བྱོན་ཏེ་མི་ནའམ་གསུངས་པས། སྡུག་བསྔལ་
ལོ་ཞུས་པས། ཐུར་མ་བསྟོན་ཏེ། སྔར་བཞིན་གསུང་པས་གྲོལ་ལོ། །ཡང་ཕྱི་བཞིན་འབྲངས་པས། གྲོང་ཁྱེར་ཞིག་ན་དགའ་སྟོན་ཆེན་པོ་བྱེད་པ་ལ་ཚོད་མ་བླངས་སློབ་དཔོན་ལ་ཕུལ་བས་དེས་གསོལ་ཏེ་ཤིན་ཏུ་ཞིམ་མོ་གསུང་བ་ལ། ནཱ་རོ་པས། ད་རུང་གསོལ་བར་འདུག་
སྙམ་སྟེ། ཡང་སློང་དུ་ཕྱིན་པས་མ་སྟེར་བ་ལ་བཅུས་ནས་བྲོས། བླ་མ་ལ་དྲངས། ཞིམ་ཞིམ་བསྟར་བསྟར་ལྟར་གསོལ་ནས། ད་དུང་ཁྱེར་ཤོག་གསུང་། མི་སྟེར་བར་འདུག་ཞུས་པས། ལྕགས་ཀྱི་དབྱུག་གུ་ཅིག་བསྐུར་ནས་ལྷག་རོལ་གང་འདུག་ཁྱེར་ལ་བྲོས་ཤོག །མི་ཡིས་
ཟིན་ན་དབྱུག་གུ་འདི་གླད་ལ་སྐོར་གསུང་། སླར་ཁོང་གི་ཁྱིམ་དུ་ཕྱིན་ཏེ་སྔར་གྱི་ཚོད་མའི་ལྷག་རོལ་འདུག་པའི་ཟངས་དང་བཅས་པ་ཁྱེར་ཏེ་བྲོས་སོ། །མི་མང་པོས་བརྡུངས་ཀྱང་ཟངས་མ་ཤོར་ཏེ་མི་རྣམས་ན་རེ་བརྐམ་ཆགས་ཅན་ཁྱོད་ཚོད་མ་ཁྱེར་ལ་ཟངས་
བྱིན་ཅིག་ཟེར་ཡང་མ་ཉན་པར་བྲོས་པས། ཕྱི་བཞིན་བསྙགས་བྱུང་བ་ལ་དབྱུ་གུ་གླད་ལ་བསྐོར་བས་ལྕགས་ཀྱི་སྤྱིལ་པོ་ཅིག་ཏུ་གྱུར་པའི་ནང་དུ་ཡོད་ཙམ་ན། རྒན་མོ་ཅིག་བྱུང་ནས། འདི་མ་འདྲེན་དྲགས། སོལ་བ་སྤུངས་ལ། མེ་རྒྱོབ་ཅིག་ཟེར། བརྒྱབ་པས་
ཤིན་ཏུ་ཉམས་ཐག་པར་གྱུར། བླ་མ་བྱོན་ནས་མི་ནའམ་གསུང་། སྡུག་བསྔལ་ལོ་ཞུས་པས། སྔར་བཞིན་གསུང་པས་གྲོལ་ལོ་ཡང་ཕྱི་བཞིན་འབྲངས་པས། ལམ་ཀ་ན་རྒྱལ་པོ་དང་། རྒྱལ་པོའི་བཙུན་མོ་འཁོར་དང་བཅས་པ་བྱུང་བ་མཐོང་བས་སློབ་དཔོན་ན་རེ། སྐྱེས་
1-1-24b

བུ་སྙིང་སྟོབས་དང་ལྡན་པ་དག །རྒྱལ་པོའི་བཙུན་མོ་ལ་སེན་མོ་དག་འདེབས། ནུ་མ་དག་ཉེད་ནུས་པ་ཡོད་དམ་གསུང་བ་ལ། ནཱ་རོ་པས་བྲམ་ཟེའི་ཆས་སུ་ཞུགས་རིགས་བྱེད་འདོན་གྱིན་ཕྱིན་བཙུན་མོའི་འགོར་མེ་ཏོག་བཞག་སེན་མོ་བཏབ། ནུ་མ་མཉེད་པས་འཁོར་རྣམས་
ཀྱི་ནཱ་རོ་པ་བརྡུངས་ཡན་ལག་སོ་སོར་བྲེགས་སོ། །དེར་སློབ་དཔོན་བྱོན་མི་ནའམ་གསུང་པ་ལ། ན་ཞུས་པས། སྔར་བཞིན་གསུང་བས་གྲོལ་ལོ། །ཡང་། དཔུང་བུ་ཆུང་གི་ཚོགས་ཀྱིས་བློན་པོའི་ཆུང་མ་བླངས་ཏེ་བྱུང་བ་ལ། སྐྱེས་བུ་སྙིང་སྟོབས་དང་ལྡན་པ་བློན་པོའི་ཆུང་
མ་ལ་འོ་བྱེད་ནུས་པ་ཡོད་དམ་གསུང་པས། ནཱ་རོ་པས་སྔར་བཞིན་བརྫུས་ཏེ་འོ་བྱས་པས། འཁོར་རྣམས་ཀྱིས་བརྡུངས་ཏེ། སྔུག་བསྔལ་བའི་ཚེ། ཏེ་ལོ་པ་བྱོན། ཡང་། རྒྱལ་པོའི་བཙུན་མོ་གླང་པོས་འདྲེན་པའི་ཤིང་། རྟའི་སྟེང་ནས་འགྲོ་བ་གཟིགས་ཏེ། སྐྱེས་བུ་སྙིང་
སྟོབས་དང་ལྡན་པ་བཙུན་མོའི་ཤིང་རྟའི་སྟེང་ནས་བསྐྱོད་པར་ནུས་པར་ཡོད་དམ་གསུང་། ནཱ་རོ་པས་བཙུན་མོ་ཤིང་རྟ་ལས་ཕབ་སྟེ་དྲུང་པས། འཁོར་རྣམས་ཁྲོས་ཏེ། ཐོ་བ་དང་དབྱིག་པ་ལ་སོགས་པས་བཅགས་ནས་ཏིལ་བཞིན་བཙིར། ཀུན་གཞི་མ་འཕོས་ཙམ་དུ་ཡང་
པའི་ཚེ། ཏེེ་ལོ་པ་བྱོན། ཡང་ལམ་ཅིག་ཏུ་ཏེ་ལོ་པས་སྒྱུ་མའི་སྐྱེས་བུ་ཞིག་སྤྲུལ་ནས། ནཱ་རོ་པ་ཕ་གི་དེད་གསུང་། ངལ་མ་སོ་བར་ཕྱི་བཞིན་བསྙགས་པས་དབུགས་ཆད་དེ་འགྱེལ། ཡང་བརྒྱལ་སངས་པ་དང་གད་མེད་གཡེང་མེད་བསྙགས་པས་གཅོང་རོང་ཤིན་
ཏུ་ཟབ་པ་ཞིག་ཏུ་ལྷུང་ནས་སྡུག་བསྔལ་བའི་ཚེ། ཏེ་ལོ་པ་བྱོན་ཡང་། ལམ་ཞིག་ན་བུ་མོ་མཚན་དང་ལྡན་པ་ཞིག་གཟིགས་ཏེ། ན་རོ་པ། འདི་ལས་ཀྱི་ཕྱག་རྒྱ་བསྟེན་གསུང་། བསྟེན་པས་བདག་པོ་འོངས་ནས་བརྡུངས་ཙམ་ན། ཏེ་ལོ་པ་བྱོན་ནས། འདི་
1-1-25a

མ་བདེན་པས་འདིའི་རྡོ་རྗེ་རྡུངས་གསུང་། འབྲས་གྲུ་བའི་ཐོ་བས་རྡོ་རྗེ་བརྡུངས་པས་སྡུག་བསྔལ་བའི་ཚེ། ཏེ་ལོ་པ་བྱོན་ཡང་བླ་མའི་ཞལ་ནས། གདམས་ངག་འདོད་ན་རྒྱལ་པོའི་བཙུན་མོ་ཁུག་ལས་རྒྱར་ཕུལ་ཅིག་གསུང་། ནཱ་རོ་པས་དགུག་པའི་སྦྱོར་བ་བྱེད་དུ་ཕྱིན་པས་
རྒྱལ་པོས་གཟུང་སྟེ་སྒྱོགས་ཀྱི་འཁྲུལ་འཁོར་དུ་བཅུག་སྟེ་འཕངས་པས། ཤ་ཁྲག་རུས་པ་དུམ་བུ་དུམ་བུར་འཐོར་ཡང་རྩའི་ཟུངས་ཀྱིས་སྦྲེལ་བས་ཀུན་གཞི་མ་འཕོས་ཙམ་དུ་ཡོད་པའི་ཚེ། ཏེ་ལོ་པ་བྱོན་མི་ན་འམ་གསུང་ན་ཞུས་པས། ན་བ་མེད། ཚ་བ་མེད་པར་གྱུར་ཅིག་
གསུང་བས། སྡུག་བསྔལ་ལས་གྲོལ་ལོ། །ཡང་ཕྱི་བཞིན་དུ་འབྲངས་པས། མྱ་ངན་གྱི་ཐང་སྟོང་པ་ཞིག་ཏུ་སླེབ་པ་དང་། གདམ་ངག་བྱ་ཡི་ཤོག་ཅིག་གསུང་ནས། སྐད་ཅིག་ཐང་དེའི་དཀྱིལ་དུ་བཞུད། ན་རོ་པས་རིངས་པར་ཕྱིན་ཀྱང་སླེབ་པའི་དུས་མ་བྱུང་ནས་བརྒྱུགས་པས་
བླ་མའི་དྲུང་དུ་སླེབ་པ་དང་། དབུགས་ཆད་དེ་ས་ལ་འགྱེལ། བརྒྱལ་སངས་ནས། བླ་མ་ལ་ཕྱག་དང་བསྐོར་བ་བྱས་ཏེ། མདུན་དུ་འདུག་ནས་གསོལ་བ་བཏབ་ཙམ་ན། བླ་མ་སྤང་ལ་བེའུ་ཕུར་བཏབ་པ་བཞིན་དུ་སྐུ་གཡོ་བ་མེད། གསུང་རྒྱུ་བ་མེད། ཐུགས་རྟོག་པ་མེད་པར་
ཏིང་ངེ་འཛིན་ལ་བཞུགས་ནས་ཅི་ཡང་མི་གསུང་། ནཱ་རོ་པས། གཉིད་དང་ཁ་ཟས་ཀྱི་འདུན་པ་ཙམ་ཡང་མེད་པར་ཕྱག་དང་བསྐོར་བ་བྱས་ཤིང་གསོལ་བ་བཏབ་པས། ཅི་ཞིག་ཙམ་ན། ཁྱོད་ཡུན་རིང་པོར་ཚ་གྲང་ལ་སོགས་པ་གང་ཡང་ཡིད་ལ་མི་བྱེད་པར་དཀའ་བ་སྤྱོད་པ།
ཅི་འདོད་པ་ཡིན་གསུང་། ནཱ་རོ་པས། ཡང་དག་པའི་གདམས་ངག་འདོད་པ་ཡིན། ཞུས་པས། མཎྜལ་ཕུལ་གསུང་། ནཱ་རོ་པས་ཆུ་བཙལ་བས་མ་རྙེད་ནས། རང་གི་ལུས་ལ་སྟོས་པ་མེད་པར་རྩ་བོ་ཆ་ཕུག་བའི་ཁྲག་གིས་ཆག་ཆག་བཏབ། དབང་པོའི་མཆོག་རྣ་བ་བཅད་
1-1-25b

པའི་མེ་ཏོག་བཀོད་པའི་མཎྜལ་ཕུལ། གསོལ་བ་བཏབ། སློབ་དཔོན་གྱིས། ཆགས་ཤིང་བླངས་ནས་ན་རོ་པའི་གདོང་དུ་བརྒྱབ་པས་མི་རྟོག་པའི་ངང་དུ་བརྒྱལ། སངས་བའི་དུས་སུ་བྱིན་བརླབས་གཞན་འཇུག་གི་གདམས་པ་དེ་ལ་བརྟེན་ནས་ལྷན་ཅིག་སྐྱེས་པའི་ཡེ་
ཤེས་ངོ་སྤྲོད་པར་མཛད། དེ་ནས་རྒྱ་གར་ལྷོ་ཕྱོགས་ཀྱི་རྒྱུད་ཤྲི་པར་པ་ཏ་ཨ་ཀྵ་ར་ཞེས་པའི་ཡུལ། རི་བོ་བྱ་རྐང་ཅན་གྱི་དྲུང་དུ། ནཱ་རོ་པ། སུ་རུ་པ། ཛཱ་ན་གརྦྷ་གསུམ་ལ། ཏེ་ལོ་པས། དཔལ་གསང་བ་འདུས་པའི་ལྷ་སུམ་བཅུ་(ཅུ་)སོ་གཉིས་ཀྱི་སྤྲུལ་པའི་དཀྱིལ་འཁོར་དུ་
དབང་སྐུར་ཏེ། རྣལ་འབྱོར་མ་ཙིཉྟེ། ཉིན་མོ་ཛཱཿ ཏ་མ་ལ་གསུམ་དུར་ཁྲོད་དགའ་བའི་མདངས་ཅན་ན་གསན་པ་དགུག་པའི་ལྟ་སྟངས་ཀྱིས་བཀུག་སྟེ། སྦྱོར་བའི་བརྡས་བསྐུལ་ནས་ཡེ་ཤེས་ལ་རོལ་པའི་སྤྱོད་པས་བདེ་བ་ཆེན་པོས་སྐུ་ཉམས་བསྟེར་ནས། རས་ཡུག་ཅིག་སྣ་
མེ་སྟག་ཕོག་པས་ཐུལ་གྱིས་ཚིག་པའི་བརྡས་མཚན་ནས་དཔེའི་ཡེ་ཤེས་ཐུགས་སུ་ཆུད་པར་མཛད་དེ། དབང་རྒྱུད། བསྟན་བཅོས་རྣམས་ཐོག་མར་གསུངས། དེ་ནས་གདམས་ངག་གཞི་འཁོར་བའི་གནད་རྩ་རླུང་བྱང་ཆུབ་ཀྱི་སེམས་དང་། བསྐྱེད་པའི་རིམ་པ་ལ་སོགས་པ་
མཚོན་བྱེད་ཐམས་ཅད་བསྟན་མཚོན་བྱའི་དོན་ཞུས་པ། ཀྱེ་ཧོ་འདི་ནི་རང་གི་རིག་པ་ཡིན་ཏེ། ངག་གི་ལམ་འདས་ཡིད་ཀྱི་སྤྱོད་ཡུལ་མིན། ཏེ་ལོ་པས་ཅི་ཡང་བསྟན་དུ་མེད། རང་ལ་རང་གིས་བརླན་ཏེ་ཤེས་པར་བྱའོ། །ཞེས་གསུངས་ཏེ། འདིས་ནི་རྒྱ་མཚོ་དང་འདྲ་བའི་
དོན་མཚོན་བྱ་བ་བསྟན་ནས་ཆུ་བོ་དང་འདྲ་བའི་མཚོན་བྱེད་རྩ་རླུང་ལ་སོགས་པའང་གནང་སྟེ། ད་ཁྱོད་པཎྚི་(པཎྜི་)ཏའི་ས་མ་འཛིན་པར་རྣལ་འབྱོར་པའི་ཆས་ཟུང་ལ་སྒྲུབ་པ་སྙིང་པོར་གྱིས་ཤིག །སྐྱེ་བ་འདི་མཆོག་གི་དངོས་གྲུབ་ཐོབ་པར་འགྱུར་རོ། །པཎྚི་(པཎྜི་)ཏའི་ས་
1-1-26a

བཟུང་སྟེ་རྩོད་པ་བྱས་ན་ཆོས་སྨོད་པའི་ལྟུང་བ་དྲུག་པ་འབྱུང་སྟེ་དངོས་གྲུབ་མི་འཐོབ་བོ་གསུང་སྟེ་དམ་ཚིག་ཕོག་ནས་མི་སྣང་བར་གྱུར་ཏོ། །དེ་ནས་ནཱ་རོ་པས། པུ་ལ་བི་ཧ་ར་ཞེས་བྱ་བ་མེ་ཏོག་བཟང་པོ་རྣམས་ཀྱང་། དེའི་ཚོན་གྱིས་ཟིལ་གྱིས་
གནོན་པས་མེ་ཏོག་གི་མདོག་འཕྲོག་པའི་ལྷ་ཁང་ཞེས་བྱ་བ་དེ་ལ་ཉེ་བའི་བྱང་ཕྱོགས་ན་གྲོང་ཆུང་ཞིག་ཡོད་པ་ན་རྒན་མོ་ཞིག་གིས་བཤོས་འདྲེན་ཅིང་བསྒྲུབ་པ་སྙིང་པོར་བྱེད་ཅིང་བཞུགས་པ་ལ། དུས་ནམ་ཞིག་ན་མུ་སྟེགས་གཅེར་བུ་པ་རྣམས་རྩོད་པ་རྒྱལ་ཏེ་སངས་
རྒྱས་ཀྱི་བསྟན་པ་འཇིག་པར་གྱུར་པ་ན་རྒྱལ་པོས་པཎྚི་(པཎྜི་)ཏ་ལྔ་བསོགས་ནས་མེ་ཏོག་གི་ཕྲེང་བ་བཏད་པས་སུས་ཀྱང་ལེན་མ་ནུས་ཏེ། རྒྱལ་པོ་ན་རེ། ད་དུང་ཁྱེད་བགྲོས་ལ་རྩོད་པ་གྱིས་ཤིག །གལ་ཏེ་རྩོད་པ་མི་ནུས་ན་གཙུག་ལག་ཁང་གཅེར་བུ་པ་ལ་འབུལ་ལོ་
བྱས་པས། པཎྚི་(པཎྜི་)ཏ་རྣམས་གྲོས་བྱེད་པའི་ཚེ་རྒན་མོ་ན་རེ། ངའི་ཁྱིམ་ན་ནཱ་རོ་པ་བཞུགས་ཟེར། དེར་དགེ་འདུན་གྱིས་ནཱ་རོ་པ་ལ་གསོལ་བ་བཏབ་པས། སློབ་དཔོན་གྱི་ཞལ་ནས་བསྟན་པ་འཇིག་ལ་ཁད་དམ། ང་ཡོད་པའི་སར་གཅེར་བུ་པ་འོངས། ཕམ་པར་བྱའོ་གསུང་
སྟེ་སྔར་སློབ་དཔོན་གྱིས་གསུང་བ་ལ་མ་དྲན་ཏེ་ཞལ་གྱིས་བཞེས་སོ། །དེར་གཅེར་བུ་པ་འོང་དུ་མ་བཏུབ་པ་ལ། ཁོའི་ལྷ་ཁང་གི་དྲུང་དུ་རྒོལ་བ་དང་། ཕྱིར་རྒོལ་བ་དང་། དཔང་པོ་རྒྱལ་པོ་དང་གསུམ་གྱི་ཁྲི་བཤམས་ཏེ་རྩོད་པ་བྱས་པས། སློབ་དཔོན་ཅུང་ཟད་ཞན་
འདྲ་བས་སློབ་དཔོན་གྱི་ཐུགས་ལ་ང་ལྟ་བུའི་སྨྲ་བའི་དབང་ཕྱུག་ཞན་པ་ལྟར་འདུག་པ་འདི་ཅི་ཡིན་སྙམ་ཏེ་བསམས་པས། སློབ་དཔོན་གྱི་གསུང་བཅག་འདུག་པའི་ཉེས་པ་དྲན་ཏེ་བཟོད་གསོལ་བྱས། ཡིད་ཀྱིས་གསོལ་བ་བཏབ་པས། སློབ་དཔོན་ཏེ་ལོ་པ་ཕྱག་གཡོན་པ་
1-1-26b

མིའི་ཐོད་པ་བཅད་མ་ཁད་ཅིག་ཐོགས་ཏེ་བྱོན་པ་ལ། ནཱ་རོ་པས་ཕྱག་འཚལ་བས། གཅེར་བུ་པ་ན་རེ། སངས་རྒྱས་པ་སྙིང་རྗེ་དང་བྲལ་བ། སྲིན་པོའི་གཟུགས་ཅན་འདི་ལྟ་བུ་ལ་ཕྱག་འཚལ་བ། དེ་ཉིད་ཕམ་པའི་གནས་སུ་གྱུར་ཏོ་ཞེས་ཟེར་རོ། །སློབ་དཔོན་ཏེ་ལོ་པའི་ཞལ་ནས་ཕྃ་
ཕམ་ཞེས་ཟེར། ཁོའི་ལྷ་ཁང་ཏེའུ་ལ་ཞེས་བྱ་བ་མཆོད་རྟེན་གྱི་གཟུགས་འདྲ་བ་ཟུར་བརྒྱད་པ། སུམ་ཐོག་ཡོད་པ་ལ། སྡིག་འཛུབ་ལན་གསུམ་བྱས་པས། ཐོག་གསུམ་ཀ་འགྱེལ་ཏེ་གཅེར་བུ་པ་རྣམས་སྐྲག་ནས། ཐམས་ཅད་ཀྱིས་སློབ་དཔོན་གྱི་ཞབས་ལ་ཕྱག་འཚལ་
སྟེ། སྐྱབས་འཚལ་ལོ། །གཅེར་བུ་པ་ཐམས་ཅད་སངས་རྒྱས་ཀྱི་བསྟན་པ་ལ་བཙུད་དོ། །དེ་ནས་སློབ་དཔོན་གྱི་ཞལ་ནས། ནཱ་རོ་པ་ལ་ཁྱོད་ཀྱིས་སྐྱེ་བ་འདི་ལ་མཆོག་གི་དངོས་གྲུབ་ཐོབ་པའི་སྐལ་བ་མེད་ཀྱིས། ད་ཁྱོད་ཀྱི་ཆོས་སྟོན་ཅིག་དང་། དེས་འགྲོ་བ་མང་པོ་ལ་
ཕན་པར་འགྱུར་ཏེ། ཁྱོད་པས་ཀྱང་། སློབ་མ་དང་། དེའི་ཡང་སློབ་མ་ལ་སོགས་པ་ན་མར་རིམ་པ་བཞིན་ཕན་ཇེ་ཆེ་ཇེ་ཆེར་འགྱུར་ལ། བར་དོར་ཕྱག་རྒྱ་ཆེན་པོ་ཐོབ་པར་འགྱུར་རོ་ཞེས་གསུང་ནས་མི་སྣང་བར་གྱུར་ཏོ། །དེར་ནཱ་རོ་པས་ཀྱང་བཤད་པ་དང་སྒྲུབ་པ་གཉིས་
ཀ་མཛད་ཅིང་བསྒོམས་པས། རྟོགས་པ་སྐྱེས་ཏེ། འདྲིས་མེད་ཀྱི་ཡུལ་ཕྱོགས་ཅིག་ཏུ། བཱེ་དུ་བྷྱ་ཧྱ་བྷྱ་ཧྱ་ཡང་ཟེར་བཱེ་དུ་ཟེར་ཞིང་ཐོད་པ་ཅིག་ཐོགས་ནས་ཕྱིན་ཙམ་ན། བ་ལང་རྫི་ཚན་ཅིག་འདུག་པའི་གསེབ་ནས། བྱིས་པ་བརྡ་ཤེས་པ་ཅིག་ན་རེ། འཇུ་ན་འདི་ཟོ་ཟེར་
ནས་ཆུ་གྲི་རྣོན་པོ་མེ་འདྲ་བ་ཅིག་བྱིན། ནཱ་རོ་པས་དེ་ལྡེམ་བཞུ་ནས་གསོལ་བས། བྱིས་པས་ཡ་མཚན་དུ་གཟུང་སྟེ། རྒྱལ་པོ་ལ་བསྙད། རྒྱལ་པོ་ཁྲོས་ནས། སླུ་བ་མཁན་ཅིག་ཡོད་པར་འདུག །དཔུང་ཚོགས་དེའི་ཐོག་ཏུ་ཐོང་ཅིག་ཟེར་ནས་བཏང་བས། སློབ་དཔོན་གྱིས་
1-1-27a

རེངས་པའི་ལྟ་སྟངས་ཀྱིས་རེངས་པར་མཛད། རྒྱལ་པོ་འགྱོད་ནས་གསོལ་བ་བཏབ་པས། རྗེས་སུ་གཟུང་ངོ་། །ཡང་རེ་ཞིག་ཁ་ཆེའི་གྲོང་ཁྱེར་ཆེན་པོ་ཅིག་གི་བཞི་མདོར། གླང་པོ་ཆེན་པོ་ཅིག་(ཞིག་)ཤི་བ་རོ་རུལ་ནས་ནད་ཡམས་བྱུང་གི་དོགས་ཤིང་མི་རྣམས་
སྡུག་བསྔལ་བཞིན་དུ། རིགས་སྲུང་བས་རེག་མ་ནུས་པ་ལ། སློབ་དཔོན་གྱི་གྲོང་འཇུག་མཛད་ནས། གྲོང་ཁྱེར་གྱི་མཐའ་ལོགས་ལས་རྒྱང་གྲགས་ཅིག་འདས་པར་བསྐྱལ་སྐད། གཞན་ཡང་སློབ་དཔོན་འདིས་ཚོགས་ཀྱི་འཁོར་ལོ་ལ་སོགས་པའི་དུས་སུ་ཆང་དང་ཤིང་
ཐོག་ལ་སོགས་པ་འགུགས་ནུས་པ་དང་། སྦྱིན་བསྲེག་གི་ཐབ་ཁུང་དུ་ལྷ་སུམ་ཅུ་རྩ་བདུན་ཞལ་ལྟ་ནུས་པ་དང་། ཏིང་ངེ་འཛིན་གྱི་རྟོག་པ་བརྟན་པ་ཐོབ་པས། ཐུན་མོང་གི་དངོས་གྲུབ་མངོན་པར་ཤེས་པ་ལ་སོགས་པ་མངའ་བ་དང་། མཆོག་གི་ཕྱག་རྒྱ་ཆེན་པོ་བརྙེས་པར་
གྲགས་སོ། །མཐར། འགའ་ཞིག་མཁའ་སྤྱོད་དུ་གཤེགས་པར་བཞེད། འགའ་ཞིག་སྐུ་གཤེགས་དེ་སྤུར་སྦྱངས་པའི་ཤུལ་དུའང་ཟླ་བ་རེ་རེ་ཞིང་། གཤེགས་པའི་དུས་སུ་ལྷའི་མཆོད་པ་ངང་འོང་སྟེ། རོལ་མོའི་སྒྲ་དང་མེ་ཏོག་གི་ཆར་དིང་སང་གི་བར་དུ་ཀུན་གྱིས་མཐོང་ཞིང་
ཐོས་པར་འོང་བ་ཡིན་ནོ། །ཞེས་གྲག་གོ། །དེ་ལྟར་རིགས་ལས་མཚན་དུ་གསོལ་བ་བླ་མ་ནཱ་རོ་པ་ཞེས་གྲགས་པ་དེ་ལ། ཌོྃ་བི་པ། ཤནྟི་པ། མེ་ཏྲི་པ། དྷ་རི་པ། ཀུ་སུ་ལུ་པ། ཁ་ཆེ་ཛྙཱ་ན་ཀ་ར། ཤར་ཕྱོགས་པ་ཛ་ཡ་ཀ་ར་སྟེ་རང་ལས་ཆེ་བར་གྲགས་པ་བདུན།
ཞི་བ་བཟང་པོ། ཞི་བའི་གོ་ཆ། ཇོ་བོ་སྨྲྀ་ཏི། ཨ་ཕྃ་བཛྲ། བི་ཏོད་པ། རད་(རཏྣ་ཤྲཱི་)མི་ཏྲ་ལ་སོགས་པའི་པཎྚི་(པཎྜི་)ཏ་དང་། པྲད་ཛྙ་ར་ཀྵི་ཏ། མ་ན་ཀ་ཤྲི། ཁ་ཆེ་བྱང་ཆུབ་བཟང་པོ། ཕྃ་ཏིང་བ། དྷརྨྨཿ མ་ཏི་སྟེ། ཡུན་རིང་བསྟེན་པའི་སློབ་མ་བཞི་དང་། གཅུང་འཇིགས་མེད་གྲགས་
1-1-27b

པ། དུས་འཁོར་བ། ཐང་ཆུ་པ་མར་པ་ལོ་ཙྪ་སྟེ། མོས་གུས་ཀྱིས་མཉེས་པའི་སློབ་མ་བཞི་ལ་སོགས་པ་མང་པོ་ཡོད་སྐད། སློབ་དཔོན་ཆེན་པོ་ནཱ་རོ་པའི་ལོ་རྒྱུས་རྫོགསྷོ།། །།
༈ སློབ་དཔོན་མཻ་ཏྲི་པའི་རྣམ་ཐར།
སློབ་དཔོན་མེ་ཏྲི་པ། ཡུལ་དྲ་བྱི་ལའི་གྲོང་ཁྱེར་ཛ་ག་ནི་ཀ་ར། བྲམ་ཟེ་ན་གུ་དང་། ཙིན་
ཏེའི་སྲས་སུ་གྱུར། ཕྱི་རོལ་པའི་བསྟན་བཅོས་དང་། རིགས་བྱེད་དང་སྒྲ་ཚད་མཁས་པར་མཁྱེན། དབྱུག་གུ་པའི་རྟུལ་ཞུགས་ཀྱིས་སྤྱོད་པའི་ཚེ། སློབ་དཔོན་ཤན་ཏི་པ་དང་བ་ད་པས་དེས་ཕམ་པར་མཛད་དེ། དེ་ཉིད་ལ་(ལས་)རབ་ཏུ་བྱུང་། བླ་མ་ནཱ་རོ་པ་ལ་སོགས་
པ་མང་དུ་བསྟེན། གྲུབ་མཐའ་བཞི་ལ་རིམས་ཀྱིས་སྦྱངས་ཏེ་ཡོངས་སུ་རྫོགས་པའི་པཎྚི་(པཎྜི་)ཏར་གྱུར་པ་ན། སྙིང་པོའི་དོན་སྟོན་པའི་བླ་མ་ཞིག་བཙལ་བར་དགོངས་ཏེ། མཁན་པོ་ལ་རྟགས་ཕུལ་ཏེ་བསླབ་པ་ལས་གཡེལ་བར་ནི་མི་བྱེད། མཆོག་གི་བླ་མ་
ཞིག་ཚོལ་དུ་འགྲོ་བས་རེ་ཤིག་བག་ཡངས་ཞུ་ཞེས་གནང་བ་ཞུས། འགའ་ཞིག་གནས་ཕྱུང་བ་འདིར་འཆད་དེ་མི་འགྲིག་གོ། །རྒྱལ་བུ་རྐང་འཁྱམ་པ་ས་ཀ་ར་ཞེས་པ་ཞིག་གཡོག་ཏུ་ཁྲིད་ནས་ལྷོ་ཕྱོགས་ཀྱི་འགྲོན་བུ་ལུས་པའི་གཙུག་ལག་གི་སྤྱན་རས་གཟིགས་དང་།
ཨ་ཡུ་ཏ་ར་གཡུ་ཁང་གི་སྒྲོལ་མ་ལ་གསོལ་བ་བཏབ་པས། མ་ནུ་བྷ་གའི་རི་ལ་ལྡོ་ངར་གྱི་སྟོན་པ་ཤ་བ་རི་པ་བཞུགས་ཁྱོད་དེའི་རིགས་ཡིན་ནོ་ཞེས་ལུང་བསྟན་པ་ཐོབ་ནས། ལྷོ་ཕྱོགས་སུ་འགྲོ་བའི་ཚོང་པ་དང་འགྲོགས་ཏེ་དཔལ་ལྡན་འབྲས་སྤུངས་སུ་ཕྱིན། གསོལ་
བ་བཏབ་པས། སྔར་ལུང་བསྟན་པའི་རིའི་རྣམ་པ་རྨི་ལམ་དུ་མཐོང་ཞིང་ཌཱ་ཀི་མས་ཀྱང་ལུང་བསྟན་ནོ། །དེ་ནས་ཟླ་བ་གསུམ་གྱི་དྷརྨཿར་ཛའི་མཆོད་རྟེན་ཅན་དུ་སླེབ་པ་ཡོད་པར་འབྲོག་དགོན་པ་དང་། མྱ་ངམ་གྱི་ཐང་ཡ་ང་བ་དག་བརྒལ་ཏེ་ཕྱིན་པ་ན། གཞོན་ནུ་མའི་གྲོང་
1-1-28a

ཞེས་བྱ་བ་བུད་མེད་མང་པོས་གང་བར་ངལ་སོ་བའི་ཚེ། ཚོང་པ་དེ་དག་གིས་འདི་ནས་གྲོང་མེད་པས་བརྒྱགས་ཟུང་ཤིག་ཟེར་ཏེ་འབྲས་མང་པོ་ཁྱེར་ནས་ཟླ་བ་ཕྱེད་ཙམ་དུ། ཆུ་སྤུས་ནུབ་ཉི་མ་མང་པོར་བརྒལ་ཏེ། འགྲོ་དགོས་པའི་སར་ཕྱིན་པ་ན།
མ་ལ་ཡའི་ཚལ་གྱི་དབུས་ཀྱི་དཔལ་རང་བྱུང་གི་མཆོད་རྟེན་དྷརྨ་ར་ཛ་མཐོང་། དེ་ནས་ཤར་དུ་ཕྱོགས་ཏེ་ཞག་ལྔ་ཙམ་འདས་པ་ནས། རིའི་མཚན་མ་མཐོང་བ་ལ། ཚོང་པ་དེ་དག་བྱང་ཕྱོགས་ནས་བསྐོར་ཏེ། སོང་བ་ལ་ཤིས་པ་བརྗོད་དེ་ལྷོ་ཕྱོགས་དཔལ་གྱི་རི་
ག་ལ་བ་དེར་ཚོལ་ཞིང་བྱོན་པས། མ་ཧེ་འཚོ་བ་དག་ཕྲད་ནས། མ་ནུ་བྷྃ་ག་ལ་དྲིས་པས། རི་མའི་གཟུགས་འདྲ་བ་དབུས་མཐོ་བ། མགོ་ལྟ་དཔལ་གྱི་རི། གཡས་གཡོན་གཉིས་དམའ་བ་ཕྲག་པ་ལྟ་བུ། ཡིད་ཕམ་བྱེད་དང་། ངལ་སོ་བའི་རི་ཡིན་ཟེར་
བ་ཅིག་(ཞིག་)བསྟན། འདི་ན་སུ་འདུག་ཤ་བ་རི་པ་བཞུགས་སམ་དྲིས་པས། རི་ཁྲོད་པ་མིང་སྲིང་གསུམ་འདུག་པ་རེས་མཐོང་། རེས་མི་མཐོང་། དེ་འདྲ་བ་མི་ཤེས་ཟེར་རོ། །དེ་ན་གཅན་ཟན་དང་རི་དགས་དང་བྱ་ཀུན་ཀྱང་ཅིག་ལ་ཅིག་ཡ་ང་མེད། ཐེ་ཚོམ་མེད་པར་ཟི་སེ་བུ་ནེ་
འདུག །འདི་ན་བསྙོ་ཆུ་ཡོད་པ་འཐུངས་པ་ཡིན་ཟེར། ཤིང་ཐོག་ལ་སོགས་པ་གསོལ་ཞིང་ཕྱོགས་གཅིག་ཏུ་བཙལ་ཡང་མ་རྙེད། ཁ་ཟས་ལ་ཆགས་པས་སམ་ཚོལ་བ་ལ་དཀའ་བ་མ་སྤྱད་པས་མ་གུས་པའི་ཉེས་པར་གྱུར་པ་ཡིན་སེམས་ནས་
གསོལ་བཅད་དེ་ས་སྦི་བཙུགས་ནས་མཎྚལ་(མཎྜལ་)ཕུལ་ཞིང་གསོལ་བ་བཏབ་པས་ཞག་གསུམ་སོང་བའི་ཐོ་རངས་རྨང་ལམ་དུ་མི་ནག་པོ་བོངས་ཐུང་བ། མིག་རྩ་དམར་བ། བསྙུག་ཐག་གིས་རལ་པ་སྤྱི་བོར་བཅིངས་པ། མ་རུའི་ཕྲེང་བས་སྐུ་བརྒྱན་པ། རྨ་བྱའི་མཇུག་སྒྲོས་སྐེད་པ་
1-1-28b

བཀབ་པ། གཡོན་ན་སྐུ་བ། གཡས་ན་མདའ་གསོར་བ། དོང་པ་རྩ་བ་ཅིག་ལ་ཁ་གཉིས་ན་མདའ་ལྔ་ལྔ་ཡོད་པ་དང་། འོད་མའི་གཞུ་མཆོག་གཉིས་ལ་ཕག་རྒོད་ཀྱི་རོའི་སྟོད་སྨད་སྐལ་བ་ཁུར་བ་རི་ཁྲོད་པའི་ཆ་བྱད་ཅན། གར་ཐབས་ཀྱིས་འགྱིང་བ། གཡས་ན་ཛྙཱ་
ན་ཝ་ཏི་དམར་མོ་གླིང་བུ་འབུད་པ། གཡོན་ན་པདྨ་ཝ་ཏི་དཀར་མོ་རྨ་བྱའི་རོ་ནམ་མཁའ་ལ་གཡོ་བ་འཛིན་པ། གཉིས་ཀྱི་སྐུ་བརྟེན་པ་ཞིག་མཐོང་ནས་གཡོག་ལ་སྨྲས་པས། གསེར་མ་སྐྱེས་པ་ཡིན་ནམ་ཟེར། པཎྚི་(པཎྜི་)ཏ་ཐུགས་མུག་སྟེ་རྣམ་སྨིན་གྱི་ལུས་
འདིས་བསྒྲིབས་པས་ལྟ་བའི་སྐལ་བ་མེད་ཀྱིས། སྲོག་ལ་ཆགས་པའི་ལན་པས་འདི་དོར་ལ་བར་དོར་འབྱལ་སྙམ་པའི་སྨོན་ལམ་གདབ་སྙམ་ནས་སྤུ་གྲི་བླངས་པས་གཡོག་གིས་སློབ་དཔོན་གྱིས་རྨིས་པ་འདྲ་བ་ཞིག་ནམ་མཁའ་ལ་བྱོན་པ་མཐོང་ནས་
སྦྲན་པས་མངོན་དུ་གྱུར་ཏེ། བརྐྱང་ཕྱག་འཚལ། ཞབས་སྤྱི་བོར་བླངས་ནས། རྗེ་བཙུན་དེ་ཙམ་དུ་ཞལ་མི་སྟོན་པ་ཐུགས་རྗེ་ནོངས་ཞེས་གསོལ་པས། ཁྱོད་རང་གི་སྒྲིབ་པས་ནོངས་ལ། ད་ལྟ་ལུས་དང་སྲོག་ལའང་ཆགས་པ་ཙམ་གྱི་གསུང་བས་མཐོང་གིས།
ང་འདི་ན་འོངས་པ་འམ་འདུག་པ་འམ་སོང་བ་མེད་ཀྱི། མཐོང་ངམ་མཐོང་ངོ་སྙམ་དུ་མ་སེཾ་[ཞིག །ཀྱེ་ཧོ་ར་མཐོང་བས་ནི་གྲོལ་འགྱུར་ཏེ། །ང་མ་མཐོང་བས་]ཀྱང་གྲོལ་བར་འགྱུར། ང་མཐོང་བས་ནི་འཆིང་འགྱུར་ལ། །ང་མ་མཐོང་བས་ཀྱང་འཆིང་བར་འགྱུར་གསུང་། དེར་ཡིད་ཀྱི་རྒྱུ་བ་ཆད་དེ་ཉི་མ་
ནུབ་ཀྱི་བར་དུ་འདས་པ་ལས་སད་པའི་མཐར། ཡིད་ཕམ་པའི་རི་ལ་ཕག་རྒོད་དང་། སེམས་ངལ་སོ་བའི་རི་ལ་རྨ་བྱ་བསད་དེ། དཔལ་གྱི་རི་ལ་ཚོགས་སུ་རོལ་ནས། ཁམས་གསུམ་འཁོར་བའི་ནགས་ཁྲོད་ན། །མ་རིག་ཕག་རྒོད་རྒྱུ་བ་ལ། །ཤེས་རབ་གསལ་བའི་
1-1-29a

མདའ་ཡིས་བསྣུན། །མ་རིག་རྒྱུ་བ་བདག་གིས་བསད། །ཤ་ནི་གཉིས་སུ་མེད་པས་ཟོས། །རོ་ནི་བདེ་བ་ཆེན་པོར་མྱོང་། །འཁོར་བའི་ཚང་ཚིང་སྐྱིད་མེད་ན། །གཟུང་འཛིན་འདབ་ཆགས་རྒྱུ་བ་ལ། །ཐབས་དང་ཤེས་རབ་གཞུ་རྡུངས་ནས། །སྙིང་པོ་དོན་གྱི་མདའ་
ཅིག་རྒྱབ། །གཟུང་འཛིན་རི་དགས་བདག་གིས་བསད། །གཉིས་སུ་མེད་པར་ཉམས་སུ་མྱོང་། །ཅེས་བརྡའ་བསྟན་ཏེ་བདག་བྱིན་གྱིས་བརླབ་པའི་ཉམས་བསྐྱེད་ནས། དུས་འདི་ཉིད་ཀྱི་ཡེ་ཤེས་ནི། །ཁྱོད་ཀྱིས་སྨྲོས་དང་ཇི་ལྟ་བུ། །མ་རྟོགས་ཞེས་སུ་བརྗོད་ན་ནི། །དྲན་པ་དེ་དག་ཅི་
སྟེ་མིན། །བླ་མས་སྟན་(བསྟན་)པ་མི་ཤེས་ན། །སློབ་མས་ཇི་ལྟར་གོ་བར་ནུས། །ཞེས་ཕྱག་རྒྱ་ཆེན་པོའི་དབང་བསྐུར་བ་ལས། ས་ཀ་ར་དེ་ཉིད་དུ་ཐ་མལ་གྱི་རྒྱུ་བ་ཆད་དེ་ཕྱག་རྒྱ་ཆེན་པོ་རང་གི་ལུས་ཐོབ། པཎྚི་(པཎྜི་)ཏ་བླ་མའི་མཛད་པ་རྔོན་པའི་ཚུལ་དང་སྲོག་ཆགས་བསད་པ་
ལ་ཐེ་ཚོམ་དུ་གྱུར་པས། རྗེ་བཙུན་གྱིས་བསད་པ་དག་སོ་སོར་བཏང་། རྣལ་འབྱོར་མས་སྐལ་བ་ངན་པ་འདི་ཞེས་ཞབས་སྤྱི་བོར་རྡེབས་ནས་མི་སྣང་བར་གྱུར་ཏོ། །དེར་བརྡའ་ཙམ་གྱིས་གྲོལ་བར་མ་ནུས་ཏེ་གུ་རུ་སངས་རྒྱས་དང་འདྲ་བ་ལ་འབྱལ་ནས། འཇིག་རྟེན་
ལ་བསྟན་པའི་སྔགས་ཀྱི་བརྒྱུད་པ་མ་དྲིས་སྙམ་པའི་ཡི་མུག་གིས་ངུ་ཞིང་གསོལ་བ་བཏབ་པས་ནམ་མཁའ་ལས། ང་ཡི་སྒྱུ་མ་ལྟ་བུའི་ལུས་ཀྱིས་སྟན་པའི་སྐལ་བ་དེ་ལས་མེད་ཀྱི། རིགས་ངན་གྱི་གྲོང་ཁྱེར་དྷུ་ཏི་ཞེས་པ་ན་དགེ་ཚུལ་རྒན་པོ་ཅིག་(ཞིག་)ལ་ཆུང་མ་བ་གཉིས་
དང་བཅས་པ་ཡོད་ཀྱིས། དེ་ཉིད་ངའི་སྤྲུལ་པ་ཡིན་པས་དེ་ལ་ཐེ་ཚོམ་མེད་པར་ཐུད་ཅིག །དེ་ལས་སྙིང་པོ་དོན་གྱི་བརྒྱུད་པ་འབྱུང་གིས་དེ་དར་བར་གྱིས་ཤིག །དེང་འདིར་མཆོག་མི་ཐོབ་ཀྱིས་ངའི་གཟུགས་བྲིས་ལ་གསོལ་བ་ཐོབ། བར་དོར་ང་དང་འབྱལ་ནས་གྲོལ་བར་འགྱུར་རོ་
1-1-29b

ཅེས་པའི་སྒྲ་བྱུང་ངོ་། །དེ་ནས་ལུང་བསྟན་པ་དེར་ཕྱིན་པས་སྤྲུལ་པ་དེ་དང་འབྱལ་ཏེ་དབང་བསྐུར་ནས་མ་རྒྱུད་ཀྱི་གདམས་པ་མ་ལུས་པར་གནང་ངོ་། །སླར་ལོག་སྟེ་ལམ་དང་ཆུ་ལ་རྒལ་བའི་ངལ་དུབ་གྱིས་(ཀྱིས་)གཉིད་དུ་སོང་བ་ལས་སད་ཙ་ན་རྗེས་སུ་བསྟན་པ་རྣམས་བརྗེད་འདུག་
ནས་ཡུལ་དབུས་སུ་འགྲོ་བ་ངོ་ཚ་བས་འདི་ཀར་ཤི་བ་རུང་སྙམ་སྟེ་སྤུ་གྲིས་སྙེག་པར་བརྩམས་པས་ཡང་(ཀྱང་)རྗེ་བཙུན་ནམ་མཁར་བྱོན་ཏེ། ཀྱེ་ཧོ་གཉིས་མེད་རྡོ་རྗེ་ཨ་བ་དྷུ་ཏི་པ། །དྲན་པ་མེད་ལ་རྗེད་པ་མེད། །མ་དྲན་པའི་ཆོས་རྣམས་ལ། །བརྗེད་ཅེས་བྱ་བ་ག་ལ་
ཡོད། །མ་སྐྱེས་པའི་ཆོས་རྣམས་ལ། །འགག་ཅེས་བྱ་བ་ག་ལ་ཡོད། ཅེས་གསོལ་བ་བཏབ་པས་སྙིང་པོའི་དོན་མ་ལུས་པར་ཐུགས་སུ་ཆུད་པར་མཛད་དེ་ཡུལ་དབུས་ཀྱི་བི་ཀ་མ་ལ་ཤི་ལར་བྱོན་ནས་བཞུགས་པའི་དུས་སུ་ཕྱི་ནང་གི་པཎྚི་(པཎྜི་)ཏ་ཐམས་ཅད་ཐེ་ཙོཾ་
དུ་གྱུར། མ་རངས་ནས་བརྩད་པས། ཐམས་ཅད་ལས་རྣམ་པར་རྒྱལ་བ་ལ། བདུད་ཀྱིས་བྱིན་གྱིས་བརླབས་པ་ཡིན་ཞེས་རང་གི་མཁན་པོ་ཤཱནྟི་པས་ལྟ་སྤྱོད་ལ་སྐྱོན་བཟུང་བའི་ཡི་གེ་སྒོ་གོང་དུ་བྲིས། ཡང་དེ་དུས་མེ་ཏྲི་པས་ཐུགས་དམ་རྣལ་འབྱོར་མའི་
སིན་དྷུ་རའི་མཆོད་པའི་དོན་དུ་མ་ད་ན་སྦས་ཤིང་བསྲེལ་བ་གཞན་གྱིས་ཐོས་ཏེ་དགེ་འདུན་བགྲོས་ནས་གཎ་ཌི་བརྡུངས། གནས་བརྟན་རྣམས་ཀྱིས་མི་བཙུན་པ་བྱེད་པ་གང་དེ་གནས་བྱུང་ཞིང་ཅེས་བསྐྲད་པ་ནན་ཏུར་གྱིས་ལས་བྱས་པས། ཉམས་པ་སྒོ་ལ་འགྲོར་མི་
རུང་ཟེར་ནས་རྩིག་པ་ལ་ཐལ་ནས། ཆུ་བོ་གངྒའི་སྟེང་དུ་ཀྲིཥྞ་ས་རའི་ལྤགས་པ་བཏིང་བའི་སྟེང་ནས་བཞུད་དེ། རི་བོ་གསེར་གླིང་གི་དགོན་པར་གཤེགས་སོ། །བི་ཀ་མ་ལ་ཤྲི་ལ་བ་ཐམས་ཅད་འགྱོད་དེ། གནས་བརྟན་ཆེན་པོར་དཔལ་མར་མེ་མཛད་ཀྱིས་ཀྱང་། རང་གི་ཐུགས་
1-1-30a

དམ་སྒྲོལ་མ་ལ་གསོལ་བ་བཏབ་ཏེ་ཞུས་པས། སེམས་དང་པོར་བསྐྱེད་པའི་བྱང་ཆུབ་སེམས་དཔའ་ཡིན། དེ་ལ་ལས་རྩུབ་མོ་བྱས་པས་སྡིག་ཤིན་ཏུ་ཆེ། རི་རབ་ལ་དཀྲིས་པས་ལན་གསུམ་དུ་འཁོར་བའི་སེམས་ཅན་ཆེན་པོའི་ལུས་ལ་བྱ་སྣ་ཚོགས་ཀྱིས་ཟ་
བའི་སྡུག་བསྔལ་ཡུན་རིང་དུ་མྱོང་དགོས་གསུང་། སྦྱང་ཐབས་ཞུས་པས། མཐའ་འཁོབ་ཏུ་ཐེག་པ་ཆེན་པོའི་ཆོས་བསྟན། ཉིན་རེ་ཚ་ཚ་བདུན་བཏབ་ན་གྲོལ་གསུང་བས་ཞབས་སྤྱི་བོར་བླངས་ནས་བཟོད་པར་གསོལ། ཕྱི་ནས་བརྩོད་མེད་དུ་གྱུར། ཀུན་གྱིས་གཙུག་ཏུ་ཁུར།
རྡོ་རྗེ་གདན་གྱི་མཆོད་པའང་མཛད། མངའ་བདག་ཆེན་པོ་ཞེས་གྲགས། སྙིང་པོ་དོན་གྱི་བརྒྱུད་པ་དར་བར་མཛད། དཔལ་རྡོ་རྗེ་གདན་ལ་སོགས་པའི་སློབ་མ་ཆེན་པོ་བཞིར་གྲགས་པའང་ཐོན་པར་གྱུར་ཏོ། །ལོ་རྒྱུས་འདི་ལ་མི་མཐུན་པ་སྣ་ཚོགས་སྣང་ཡང་། འདིར་
དོན་ལ་གནས་པ་དག་དཔྱད་ནས་བྲིས་པ་ཡིན་ནོ།། །།
